10 एन्देरगेका नाम धर्मेसी बैरी र'ओ बारी नाम धर्मेस गने आसी ख़द्दासी खे'अना ती निभ्रदत। अक्कुन नाम धर्मेस गने निभ्रकत ख़ने आस नमन तंग्दासी उज्जना ती दंडे ती नाड़ोस दिम।
जोक्क घड़ी ख़ॊख़ा ख़ॆख़ेल एंगन ऎरा दिम पोल्लो। लिकिन नीम गा एंगन ऎरोर, ईगेका ऎन उज्जालदन, नीम हूँ उज्जोर।
धर्मे बंगस गे उज्जनन चि'अना सवंग र'ई, अरा आस आ उज्जना चि'अना सवंगन आसी ख़द्दन एंगा चिच्कादस।
अरा एम्बासी मने ईद र'ई का, नॆ नॆ आसी ख़द्दन एंगन ईरका ती एंगा नू पत्त'अदर, आर गे जनमजुग उज्जना ख़क्ख्र'ओ, अरा छेद्दे उल्ला नू आरिन उज्जा चॊद'ओन।”
उज्जना चि'ऊ बंगस एंगन तइय्कादस, अरा बंगासी चड्डे दिम ऎन उज्जदन। अन्नेम नॆ एंगन मॊख़दस, आस गे एंग्है ती उज्जना ख़क्ख्र'ओ।
यहूदीर दौ कत्थन इंझ्र'आ गे मने मल नन्नर, औंगे आर धर्मेसी बैरी हिकनर। इदही चड्डे नन-यहूदीर दौ ख़क्खियर। लिकिन चाजरना ही चड्डे अरा आर ही पूरखर अब्राहम, इसाक, अरा याकॊबस गे चिच्का गच्छरना ही चड्डे धर्मेस आर मइय्याँ अक्कु गूटी चोन्हा नन्दस।
ईद लेका मला अक्कुन धर्मेस गने निभ्रनन चिच्का नम्है उर्बस येसु मसीस ती नाम धर्मेस नू कोड़हे रिझ्रदत।
एकाबारी नाम नमन नाड़ा पोल्ला लिक्कत, ख़नेम मसीस ठौका बेड़ा नू नम्है पाप गे केच्चस।
धर्मेस तंग्है ख़द्दासिन हूँ मल अम्बियस, आसिन नमा ओर्मर गे थोपचस चिच्चस। होले इवंदा चिच्का ख़ॊख़ा हूँ आस एकासे नमा गे तंग्है ख़द्दासिन चिच्चस अन्नेम नम्है उर्मी चाड़न सिथियम चि'ओस।
आरिन नॆ नेंवई ननरकी दंडे चि'आ उंगी? नॆ हूँ पुल्ली, एन्देरगेका मसी येसुस दंडे ख़क्खियस ती केच्चस। लिकिन आस गा केचका ती उज्जा चॊचस, अरा आस अक्कु धर्मेसी तीना पक्खा उक्कियस ती नमा गे गोहरारते र'अदस।
एन्देरगेका इकला आलर ही मने पाप मॆद सुबहा ही तबे नू र'ई, आर धर्मेसी बिड़दो नू र'अनर। आर धर्मेसी नॆग आबोन मल पॆस्रनर, अरा पॆस्र'आ हूँ पोलनर।
औंगे धर्मेस एम्है तरती दिम तंग्है ने'अनन नन्ना लेक्खा ऎम मसीसी पैकम हिकदम। ई चड्डे नीम धर्मेस गने मेसाब'आ ब'अरकी मसीसी ऊजी नू ऎम निमन ने'अदम।
धर्मेस नमा गे इकला हूँ पाप मल नंजका येसुसिन पाप ही दाँड़े कमचस। नाम मसीस नू धर्मेसी उजगो मना गे दिम आस एन्ने नंजस।
आस तान क्रुस नू केचका ती यहूदीरिन अरा नन-यहूदीरिन ओन्टे गुना कया लेक्खा धर्मेस गने मेसाबाचस। ई लेक्खा आर ही बैरी आबोन नठाबाचस।
अबड़र ही मझी नू नाम ओर्मत हूँ मुन्द ओंग्होल नम्है कया ही चिबाख़ारना ही लेक्खा उज्जा लिक्कत, कया अरा जिया ही मने गुट्ठी लेक्खा नना लिक्कत। अरा बछ्रका उर्मी आलर लेक्खा धर्मेसी कैर ही तबे नू रहचकत।
ई चड्डे आस गे जम्मा नू तंग्है भईर लेक्खा मन्ना चाड़ रहचा। औंगे आस धर्मेसी सुसर नन्ना नू आर ही सोग्गे ईरू अरा पत्त'अना जॊगे कोहाँ नैग मना ओंगोस, अरा आस आर ही पाप गुट्ठिन छमा नना गे दाँड़े नना ओंगोस।
औंगे नॆ ईसी तरती धर्मेस गुसन बरनर आरिन आस ओर्मा उल्ला गे नाड़ा ख़च्चा ओंग्दस, एन्देरगेका आस आर गे गोहरार'आ गे जनमजुग गूटी उज्जा लगदस।
अना एंग्है ख़द्दारो, ऎन इदगे इदन निमा गे लिखदन का नीम पाप अम्बोर नना। लिकिन नेकईम पाप नन्दस होले, धर्मेस बबस गुसन नमा गे गोहरार'ऊ ओन्टा सहाड़ा ननू र'अस। आसिम येसु मसीस, अरा आस उजगो दिम र'अस।
नाम धर्मेस मइय्याँ चोन्हा नंजका ती मला, आस नम्है मइय्याँ चोन्हा नंजका ती नम्है पाप गुट्ठिन ओथ्रना ही दाँड़े बेसे तंग्है ख़द्दासिन तइय्यस। ईदिम चोन्हा हवे।
अरा ऎन उज्जू र'अदन। ऎन केचका केरकन, लिकिन ऎरा, ऎन हुल्लो ती हुल्लो गूटी उज्जू र'अदन। अरा खे'अना अरा नरक गड्डी ही कुची गुट्ठी एंग्है गुसन र'ई।