रोमी 2:12 - पुना गच्छरना NT (BSI)

¹² एका ओर्तर धर्मेसी पॆसकन बलनर ती पाप नन्नर, होले हूँ आर नठार'ओर। अरा एका ओर्तर धर्मेसी पॆसकन अख़नर ती पाप ननतेम र'अनर, आर धर्मेसी पॆसका ती नेंव‍ई नन्तार'ओर।

रोमी 2:12 ပူးပေါင်းရင်းမြစ်များ

मत्तायोस 11:22

अन्‍नु हूँ ऎन निमन ब'अदन, रायबड़ी उल्‍ला नू तुरोस दरा सीदॊन नगरे ही दंडे ती निम्‍है दंडे बग्‍गे मलदौ मनो।

मत्तायोस 11:24

अन्‍नु हूँ ऎन निमन ब'अदन, रायबड़ी उल्‍ला नू सोदोम नगरे ही दंडे ती निम्‍है दंडे बग्‍गे मलदौ मनो।”

यॊहनस 19:11

येसुस आनाकिर्ताचस, “निंगा गे धर्मेस ती अदिया मल चीरका होले, निंगा एंग्‍है नू एन्‍द्रा हूँ अदिया मल र'ओ दने। औंगे नॆ एंगन निंग्‍है ख़ेक्खा नू सोंपचस, आस कोड़हे पाप ही बदी नू र'अदस।”

त‍इरकर 2:23

धर्मेसी ओक्‍ताचका चिता बुता अरा धर्मेस ती मुन्‍द बाचका कत्‍था लेक्‍खा आस सोंपतारस। आ येसुसिन नीम धरतारकी पपहर ही ख़ेक्खा ती क्रुस नू अरगकर ती पिटकर।

रोमी 1:32

आर गा धर्मेसी ई नॆगन अख़नर का एन्ने एन्ने नलख ननुर खे'अना दंडे ही जॊगे र'अनर। अन्नु हूँ आर ताम लेका एन्ने मल नन्नर, लिकिन एन्ने नलख ननू आलर ती हूँ रिझ्रनर।

रोमी 4:15

एन्‍देरगेका पॆसका धर्मेसी ख़ीसन लेका ओन्‍द्र'आ ऊंगी। एक्सन पॆसका मल्‍ला असन अदिन टांड़ना ही कत्‍था मल मनी।

रोमी 8:3

नमा पाप मॆद सुबहा ही चड्डे मूसासी नॆग लेड़पोंयहा मंजा, ख़ने आद तंग्‍है नलखन मुंज ख़च्‍चा गे पोल्‍ला। लिकिन धर्मेस गा अदिन नंजस एकदा मूसासी नॆग नना पोल्‍ला। आस तंग्‍है ख़द्दासिन नाम पपहर ही कया बेसे ता कया नू पाप दाँड़े चि'आ गे त‍इय्यस। ई बेसे धर्मेस ओन्‍टा आल कया नू पाप आबोन दंडे चिच्‍चस।

1 कोरिन्‍थ 9:21

नॆ यहूदी नॆग नू मलनर आरिन मसीस गुसन ओन्‍द्र'आ गे ऎन हूँ यहूदी नॆग मलका बेसे मंजकन। अन्नु हूँ ऎन धर्मेसी नॆगन मल अम्‍बकन, अरा मसीसी नॆगन ऎन पॆस्रकन।

गलातिया 3:10

औंगे एवंदा आलर नाड़र'आ गे नॆग नू असरा नन्नर, आर ओर्मर सर्पारनर। एन्‍देरगेका नेम्हा पुथी नू लिख्रकी र'ई, “नॆ नॆग ता लिख्रका उर्मी कत्‍था ही बेसे मल मन्‍नर, आस ओर्त ओर्त सर्पारदस।”

गलातिया 3:22

लिकिन नेम्हा पुथी ब'ई का नाम ओर्मत पाप ही आकुस नू र'अदत। एकत्रु येसु मसीस नू पत्त'अना ती पत्त'उर धर्मेसी गच्‍छरना आबोन ख़क्‍खनर नेकअन।

याकॊब 2:10

एकासे का, एका ओर्तस गोट्टा पॆसकन पॆस्रदस, लिकिन ओन्टे कत्था नू झुकरदस होले, आस उर्मी कत्‍था नू बदी खत्रदस।