7 फेन मेर्ख़ा नू लड़ाई मंजा। मिख़ाऎल अरा आसी पैकर डेना र'ऊ नेर्रे गने लड़'आ उरखर। अरा डेना र'ऊ नेर्रे अरा अदही पैकर आर ही गने लड़चर।
अरा मनवा ख़द्दन ऎन एंग्है पैकारिन ख़ॆख़ेल नू तइय्योन, अरा आर एंग्है राजी ती उर्मी पाप नन्त'उरिन अरा उर्मी मलदौ ननुरिन ख़ॊजोर,
मनवा ख़द्दन ऎन एम्बासी महबा अरा आसी पैकर गने किर्रोन। अरा आ उल्ला ऎन ओर्मर गे तम्है तम्है नलख लेक्खा ख़ंजपा चि'ओन।
अरा ऎन एंग्है पैकारिन पेंड़हे ही कोड़हे सड़ा गने तइय्योन, अरा आर मेर्ख़ा ही ई गंडा ती आ गंडा गूटी, चरियो खूंट ती एंग्है चज्जिका आलारिन ख़ॊंड़'ओर।
आ बारी ऎन बॆलन डेब्बा पक्खे ता आलारिन ब'ओन, ‘अना सरपारका आलारो, एंग्है मुन्द ती आ मल तेभ्रना चिच्ची नू किर्रिम बि'आ, एकदा नाद अरा अदही पैकर गे सपड़ाचका र'ई।
नीन एन्देर बलदय का ऎन एंग्है बंगासिन गोहरार'आ ओंग्दन, अरा आस मेर्ख़ा पैकर ही बारा फउदन ती बग्गे तइय्योस चि'ओस दने?
अन्नु हूँ एंगा नू धर्मेसी कोड़हे देखार दहदर नन्तारकी र'ई। ऎन इबड़ा नू फुलई अम्बोन मना। औंगे एंग्है कया नू ओन्टा अच्च कुड़चका र'ई। ईद एंगा गे सस्ती चि'ऊ सैतान ही ओन्टा पैकस हवे, औंगे ऎन फुलई मल मनोन दने।
एन्देरगेका नम्है ई अरबानख्रना ख़ॆंस अरा अहड़ा ती लेका मला। ईद मलदौ राजी ननुर गे, अरा मल ऎथरना सौंसे ही अदिया गुट्ठी गे, अरा ई ख़ॆख़ेल ही ऊख़ा ही कोड़हे सवंग गुट्ठी गे, अरा ताका ही राजी ता मलदौ बॊलता गुट्ठी गे बिड़दो नू र'ई।
अरा सस्ती नू र'अदर निमा गे आस ख़न्न ऎख़ना ही ख़ंजपा चि'ओस। अन्नेम आस एमा हूँ चि'ओस। उर्बा येसुस तंग्है सवंगिय मेर्ख़ा पैकर गने लघ्रना चिच्ची गने मेर्ख़ा ती दहदर मन्ना बेड़ा नू ईद मनो।
धर्मेस उर्मी जिनिसन कमचस, अरा अबड़ा उर्मी आसी महबा गे र'ई। आस मने नंजस का आसी महबन बग्गे ख़द्दर हिसा मनोर। औंगे आस आलर ही नाड़रना ही उर्बस मसीसिन आसी दुक्खे चॊदना ती ओन्टा पखड़ मुद्धस कमचस।
एकाबारी मेर्ख़ा पैकर पाप नंजर ख़ने, धर्मेस आरिन हूँ मल अम्बियस, लिकिन नरक नू हेबड़ियस ती ख़ोड़ख़ा ऊख़ा गड़डी नू रायबड़ी उल्ला गे सिकड़ी ती हॆंचका उइय्कादस।
लिकिन मुध मेर्ख़ा पैकस मिख़ाऎल एन्ने मल नंजस। एकाबारी आस मूसासी मरी ही पत्त नू नाद गुसन आनानख्रस ख़ने, आस आद ही बिड़दो नू मलदौ ब'अना ती बदी नना गे डिढ मल नंजस। लिकिन आस नाद गुसन इवंदम बाचस का, “उर्बस निंगन केबोस।”
लिकिन डेना र'ऊ नेर्रे अरा अदही पैकर जित'आ पोल्लर, औंगे आर मेर्ख़ा नू तम्है अड्डन एब्सर चिच्चर।
अरा आ नगदे कोहाँ डेना र'ऊ नेर्रे किइय्या हेबड़तारा। ईदिम गोट्टा ख़ॆख़लन ठक'ऊ नाद अरा सैतान बारना पच्चा नेर्रे हवे। आद ख़ॆख़ेल नू हेबड़तारा अरा अदही उर्मी पैकर हूँ अदही गनेम ख़ॆख़ेल नू हेबड़तारर।
अरा अदगे नेम्हा आलर गने लड़'आ ती जित'आ गे अदिया चीरा। अरा उर्मी गोतोर अरा आल खोंड़हा अरा भखा अरा राजी ही मइय्याँ हूँ अदगे अदिया चीरा।
आस आ नगदे कोहाँ डेना र'ऊ नेर्रेन धरचस। ईदिम नाद अरा सैतान बारना आ पच्चा नेर्रे हवे। अरा आस अदन ओन हजार बछर गे हॆंचस।