दहदर मंजका कत्‍था 11:17 - पुना गच्छरना NT (BSI)

¹⁷ अरा बाचर, “नॆ र'अदस अरा रहचस आ उर्मी ती सवंगिय धर्मे उर्बायो, ऎम निंगन धन्‍यवाद नन्दम, एन्देरगेका नीन निंग्‍है कोहाँ सवंगन होच्चकादय ती राजी नना हेलरकय।

दहदर मंजका कत्‍था 11:17 ပူးပေါင်းရင်းမြစ်များ

मत्तायोस 11:25

आ बारी येसुस बाचस, “अना बबा होय! मेर्ख़ा दरा ख़ॆख़ेल ही उर्बायो! ऎन निंगन महबा नन्‍दन का नीन इबड़ा कत्‍था गुट्ठिन तमन अख़'उर अरा लूरगर आलर लेक्‍खा सोचनर आर ती नुड्डकादय, अरा तमन लुदऊ लेक्‍खा सन्नी ख़द्दर गे ऎदकय।

लू‍कस 10:21

आ बारिम येसुस नेम्‍हा बॊलतस नू खुसमारस ती बाचस, “अना बबा होय! मेर्ख़ा दरा ख़ॆख़ेल ही उर्बायो! ऎन निंगन महबा नन्‍दन का नीन इबड़ा कत्‍था गुट्ठिन अख़'उर अरा लूरगर आलर लेक्‍खा तमन सोचनर आर ती नुड्डकादय, अरा लुदऊ लेक्‍खा ई सन्नी ख़द्दर गे ऎदकय। हाँ, अना बंग, निंगा ईदिम बॆस लग्‍गिया।

यॊहनस 11:41

ख़ने आर पखनन टाँड़चर। फिन येसुस म‍इय्‍याँ मॆन ईरियस ती बाचस, “अना बंगायो, ऎन निंगन धन्‍यवाद नन्‍दन का एंग्‍हैन नीन मेंजका र'अदय।

2 कोरिन्‍थ 2:14

लिकिन धर्मेसी धन्‍यावाद मनन, आस सगरो जित'आ गे मसीस नू नमन कड़हाब'अदस, अरा आसी पत्त ता लूरन एम्‍है ती गोट्टा अड्डा नू महकारना लेक्खा बींड़दस।

2 कोरिन्‍थ 9:15

धर्मेस चिच्कादस आ थाह'आ पोलना बरदान गे धन्‍यवाद।

1 तीमोथियुस 1:12

ऎन नम्‍‍है उर्बा मसी येसुस गे धन्‍यवाद चि'अदन, एन्‍देरगेका आसिम एंगा सवंग चि'अरकी एंगन पत्त‍'अना जॊगे ब'अरकी तंग्‍है नलख नू उइय्यस।

दहदर मंजका कत्‍था 1:4

ऎन यॊहन आसिया देस ता अबड़ा सतियो कलीसिया गुट्ठी गे एन्देर लिखदन का: नॆ र'अदस, अरा रहचस, अरा बर'ऊ र'अदस आ धर्मेस ती निमा मया अरा कोड़े बर'अन नेकअन। अरा आसी बॆल-गदिया मुन्दहारे र'ऊ सतियो बॊलता गुट्ठी ती,

दहदर मंजका कत्‍था 1:8

नॆ र'अदस, अरा रहचस, अरा बर'ऊ र'अदस, अरा उर्मी ती सवंगिय र'अस, आ धर्मे उर्बस ब'अदस, “ऎन अल्‍फा अरा ओमेगा हिकदन।”

दहदर मंजका कत्‍था 11:15

फेन सातवाँ मेर्ख़ा पैकस पेंड़हे ऊरचस ख़ने, मेर्ख़ा नू जॊरसरिया सड़ा गुट्ठी एन्ने बाचा, “ख़ॆख़ेल ता राजी नम्‍है उर्बासी अरा आसी मसीसी राजी मंजा केरा, अरा आस हुल्लो ती हुल्लो गूटी राजी ननोस।”

दहदर मंजका कत्‍था 15:3

अरा आर धर्मेसी जॊंख़स मूसासी डंडीन अरा भेंडो ख़द्द मसीसी डंडीन पाड़ियर, “अना उर्मी ती सवंगिय धर्मे उर्बायो, निंग्‍है नलख गुट्ठी कोहाँ अरा अजगुत र'ई। जुग गुट्ठी ही बॆलायो, निंग्‍है डहरे गुट्ठी उजगो अरा मानिम र'ई।

दहदर मंजका कत्‍था 16:14

इबड़ा अजगुत नलख गुट्ठी ही चिन्‍हा ईद'ऊ नाद ही बॊलता गुट्ठी हवे। इबड़ा उर्मी ती सवंगिय धर्मेसी कोहाँ उल्‍ला नू मन्ना लड़ई गे सौंसे ख़ॆख़ेल ता बॆलारिन ख़ॊजा गे क'ई।

दहदर मंजका कत्‍था 16:5

फेन ऎन ओर्मा अम्मु ही मइय्याँ अदिया उइय्यू मेर्ख़ा पैकासिन एन्ने ब'अना मेंजकन, “अना नेम्हाय, अरा नॆ र'अदय, अरा नॆ रहचकय, नीन उजगो हिकदय, एन्देरगेका नीन एन्ने लेक्खा इबड़ा नेंवई गुट्ठिन तइय्कादय।

दहदर मंजका कत्‍था 16:7

फेन ऎन गोड़हा ती एन्ने आनाकिर्त'अनन मेंजकन, “हाँ, अना उर्मी ती सवंगिय धर्मे उर्बायो, निंग्‍है नेंवई गुट्ठी मानी अरा उजगो र'ई।”

दहदर मंजका कत्‍था 18:8

औंगे उन्दुल नुम खे'अना अरा ख़ोदख़ोरना अरा कीड़ा ही सस्ती अदही मइय्याँ अंड़सा ख़च्‍चो, आद चिच्‍ची नू बस्‍र'ओ कालो। एन्‍देरगेका अदिन नेंवई ननू धर्मे उर्बस सवंगियस र'अस।”

दहदर मंजका कत्‍था 19:11

फेन ऎन मेर्ख़न तिसगिरका ईरकन, अरा ऎरा, ओन्टा पंडरु घोड़ो असन इज्जकी रहचा। अरा एका ओर्तस आ घोड़ोन चलाब'अदस आस पत्त'अना जॊगे अरा मानिम बारदस। आस उजगो गने नेंवई अरा लड़ई नन्दस।

दहदर मंजका कत्‍था 19:6

फेन ऎन ओन्टा सड़न मेंजकन, आद कोहाँ आल गोंहड़ा ही चिच्चियारना लेक्खा, अरा कोड़हे बग्गे अम्मु बाहना ही ख़रख़ना लेक्खा, अरा जॊर मुर्रना ही ख़रख़ना लेक्‍खा रहचा। आर एन्ने ब'आ लगियर, “हल्‍लेलुया! उर्मी ती सवंगिय नम्है धर्मे उर्बस राजी नन्दस।