दहदर मंजका कत्‍था 11:15 - पुना गच्छरना NT (BSI)

¹⁵ फेन सातवाँ मेर्ख़ा पैकस पेंड़हे ऊरचस ख़ने, मेर्ख़ा नू जॊरसरिया सड़ा गुट्ठी एन्ने बाचा, “ख़ॆख़ेल ता राजी नम्‍है उर्बासी अरा आसी मसीसी राजी मंजा केरा, अरा आस हुल्लो ती हुल्लो गूटी राजी ननोस।”

दहदर मंजका कत्‍था 11:15 ပူးပေါင်းရင်းမြစ်များ

मत्तायोस 24:31

अरा ऎन एंग्‍है पैकारिन पेंड़हे ही कोड़हे सड़ा गने तइय्योन, अरा आर मेर्ख़ा ही ई गंडा ती आ गंडा गूटी, चरियो खूंट ती एंग्‍है चज्जिका आलारिन ख़ॊंड़'ओर।

मत्तायोस 6:13

अरा एमन पाप नन्ना ही चिबाख़ारना नू खतर'आ अमा चि'आ, लिकिन मलदौ ती एमन नाड़ा। [एन्‍देरगेका राजी दरा सवंग दरा ओहमा हुल्‍लो गुटी निंग्‍है दिम र'ई। आमेन।]’

लू‍कस 1:33

आस याकॊबसी बनस ता आलारिन मुंजामलका गूटी राजी ननोस, अरा आसी राजी कहियों माल मुंज्र'ओ।”

लू‍कस 15:10

ऎन निमन ब'अदन, एन्नेम ओन्‍टा जियन किर्ताचका आलासी पत्त नू धर्मेसी पैकर ही मुन्‍दहारे रिझी मनी।”

लू‍कस 15:6

अरा आस एड़पा बरदस ती तंग्‍है संगीरिन अरा अरबर-परबारिन ख़ॊंड़दस अरा ब'अदस, ‘एंग्‍है गने खुसमार'आ, एन्‍देरगेका ऎन एंग्‍है एबस्रका भेन्‍ड़ोन बिद्दका र'अदन।’

त‍इरकर 4:26

ख़ॆख़ेल ता बॆलर लड़ाई गे चॊचर अरा अक्‍स'उर उर्बासी बिड़दो अरा आसी मसीसी बिड़दो नू ख़ॊंड़रर।’

इब्रानी 1:8

लिकिन धर्मेस तंग्‍है ख़द्दासी पत्त नू एन्ने ब'अदस, “अना धर्मे, निंग्‍है बॆल-गदिया हुल्‍लो ती हुल्‍लो गूटी र'ओ, अरा नीन निंग्‍है राजी आबोन उजगो गने राजी ननोय।

दहदर मंजका कत्‍था 10:7

लिकिन सातवाँ मेर्ख़ा पैकास तंग्है पेंड़हेन ऊरना र'अस, अउला धर्मेसी नूख़्रका कत्‍था पुरा मनो। आस तंग्है जॊंख़र धर्मेसी कत्‍था तिंगुर गे तिंका लेक्खा अबड़ा पुरा मनो।”

दहदर मंजका कत्‍था 12:10

इदही ख़ॊख़ा ऎन मेर्ख़ा नू ओन्टा जॊरसरिया सड़ा एन्ने ब'अना मेंजकन, “अक्‍कु नाड़ना अरा सवंग अरा नम्‍है धर्मेसी राजी अरा आसी मसीसी राजी नन्ना ही अदिया बरचकी र'ई, एन्‍देरगेका नम्‍है भई बहिनर मइय्याँ बदी ननुस नॆ उल्‍ला माख़ा नम्है धर्मेसी मुन्दहारे आर ही मइय्याँ बदी नना लगियस, आस किइय्या हेबड़तारस केरस।

दहदर मंजका कत्‍था 15:4

अना उर्बयो, निंग्‍है ती नॆ मल एल्‍चो? अरा नॆ निंग्‍है नामे ही महबा मल ननो? एन्‍देरगेका नीन ओर्त लेका नेम्‍हा र'अदय। उर्मी राजी बर'ओ ती निंग्है मुन्दहारे ऒड़ लग्‍गो, एन्‍देरगेका निंग्‍है उजगो ही नलख गुट्ठी दहदर मंजकी किरकी र'ई।”

दहदर मंजका कत्‍था 16:17

फेन सातवाँ मेर्ख़ा पैकस तंग्‍है डुबहन ताका नू तुन्दियस चिच्‍चस। ख़ने मन्दिर नू ती बॆल-गदिया ती ओन्टा जॊरसरिया गड्डी सड़ा एन्ने बाचा, “मंजा केरा।”

दहदर मंजका कत्‍था 17:14

इबड़र भेंडो ख़द्द मसीस गने लड़ई ननोर। लिकिन भेंडो ख़द्द मसीस अरा आसी गने गुड़ियार'उर आरिन जित'ओर। एन्‍देरगेका भेंडो ख़द्द मसीस उर्बर ही उर्बस अरा बॆलर ही बॆलस हिकदस। अरा आसी गने गुड़ियार'उर धर्मेस ती मॆख़्रका अरा चज्रका अरा पत्त'ऊ आलर हिकनर।”

दहदर मंजका कत्‍था 19:1

इबड़ा कत्था गुट्ठी ही ख़ॊख़ा ऎन मेर्ख़ा नू ओन्टा कोहाँ आल गोंहड़ा ही चिच्चियारना लेक्खा ओन्टा सड़न मेंजकन। आद एन्ने बाचा का, “हल्‍लेलुया! नाड़रना अरा महबा अरा सवंग नम्है धर्मेसी दिम हिके।

दहदर मंजका कत्‍था 19:6

फेन ऎन ओन्टा सड़न मेंजकन, आद कोहाँ आल गोंहड़ा ही चिच्चियारना लेक्खा, अरा कोड़हे बग्गे अम्मु बाहना ही ख़रख़ना लेक्खा, अरा जॊर मुर्रना ही ख़रख़ना लेक्‍खा रहचा। आर एन्ने ब'आ लगियर, “हल्‍लेलुया! उर्मी ती सवंगिय नम्है धर्मे उर्बस राजी नन्दस।

दहदर मंजका कत्‍था 20:4

फेन ऎन बॆल-गदिया गुट्ठिन अरा नेंवई नना गे अदिया चीतारका आलारिन अइय्या उक्का ईरकन। अरा नॆख'आ कुक्‍कु येसुसी पत्त नू गोवाह चि'अना चड्डे अरा धर्मेसी कत्‍थन तेंगा कुद्दना चड्डे एड़बताचका आलर ही बॊलता गुट्ठिन हूँ ऎन ईरकन। आर आ मेक्‍खो ही मलता अदही मूर्ती ही ऒड़ मल नंजकाचर, अरा तम्है कपड़े नू मलता ख़ेक्खा नू अदही छपा मल होच्‍चका रहचर। आर उज्‍जा चोचर ती बॆलर लेक्खा मसीस गने ओन हजार बछर गे राजी नंजर।

दहदर मंजका कत्‍था 8:12

अरा चौथा मेर्ख़ा पैकस पेंड़हे ऊरचस ख़ने, तीन ती ओन भाग बीड़ी, अरा तीन ती ओन भाग चन्‍दो, अरा तीन ती ओन भाग बीनको नठारा। औंगे अबड़ा नू तीन ती ओन भाग ऊख़ा मंजा केरा। अरा तीन ती ओन भाग उल्‍ला नू अरा तीन ती ओन भाग माख़ा नू बिल्‍ली मल रहचा।

दहदर मंजका कत्‍था 9:1

पांचवाँ मेर्ख़ा पैकस पेंड़हे ऊरचस ख़ने, ऎन ओन्टा बीनकोन मेर्ख़ा ती ख़ॆख़ेल नू खत्रना ईरकन, अरा आस गे भयभयान ख़ोड़ख़ा गड्डी ही बली ही कुची चीरा।

दहदर मंजका कत्‍था 9:13

फेन छैवाँ मेर्ख़ा पैकस पेंड़हे ऊरचस ख़ने, सोना ही गोड़हा एकदा धर्मेसी ही मुन्दहारे र'ई अदही चार मरग ती बरचका ओन्टा सड़न मेंजकन।