मरकुस 6:34 - पुना गच्छरना NT (BSI)

³⁴ येसुस डोंगा ती इत्तियस ख़ने पिंडी नू कोहाँ गोंहड़न ईरियस। आस गे आर ही म‍इय्‍याँ सोग्‍गे लग्‍गिया, एन्‍देरगेका आर ख़ापुर मलका भेंडो लेक्‍खा रहचर। ख़ने आस आरिन कैनो गोटंग कत्‍था ही पत्त नू सिखाब'आ हेलरस।

मरकुस 6:34 ပူးပေါင်းရင်းမြစ်များ

मत्तायोस 14:14

आस अंड़सियस ती डोंगा ती इत्तियस ती कोहँम गोंहड़न ईरियस अरा आरिन सोग्‍गे ईरियस अरा आर ही रोगेन कोड़े नंजस।

मत्तायोस 15:32

येसुस तंग्‍है चेलारिन तंग्‍है गुसन मॆख़रकी बाचस, “एंगा ई गोंहड़न सोग्‍गे लग्‍गी, एन्‍देरगेका ईर तीन उल्‍ला ती एंग्‍है गने र'अनर। अक्‍कुन गा आर ही गुसन ओन्ना-मॊख़ना मुंज्रा। ऎन आरिन कूल कीड़ा ती त‍इय्‍या गे मल बेद्ददन का आर डहरे नू पयहा मनोर क'ओर।”

मत्तायोस 9:36

येसुस गोंहड़न ईरयस ख़ने आस गे आर ही मइय्याँ सोग्‍गे लग्‍गिया, एन्‍देरगेका आर ख़ापुर मलका भेंडो लेक्‍खा भिड़कारका अरा बींड्रका रहचर।

मरकुस 6:33

लिकिन बग्‍गे आलर आर ही कानन ईरियर ती आरिन चिन्‍हचर अरा अक्‍खर का येसुस अरा आसी चेलर एक्सन कालनर। अरा आर हेद्दे हेद्दे ता उर्मी पद्दा ती ख़ॊंड़ररकी आर ती मुन्‍द असन बोंग अंड़सियर।

मरकुस 6:35

बीड़ीपुत बारी चेलर बरचर ती येसुसिन बाचर, “ईद उछिन्‍द अड्डा हवे, अरा ईद बीड़ीपुतना बेड़ा हवे।

मरकुस 8:1

अबड़ा उल्‍ला नू फिन ओन्‍टा कोहाँ गोंहड़ा येसुसी ओनबेंड़र'आ ख़ूँड़रकी रहचा। अरा आर ही ओन्‍द्रका ओन्ना-मॊख़ना मुंज्रा केरा। ख़ने येसुस तंग्‍है चेलारिन मॆख़रकी बाचस,

मरकुस 8:2

“एंगा ई गोंहड़न सोग्‍गे लग्‍गी, एन्‍देरगेका ईर तीन उल्‍ला ती एंग्‍है गने र'अनर। अक्‍कुन गा आर ही गुसन ओन्ना-मॊख़ना मुंज्रा।

लू‍कस 9:11

लिकिन आलर इदन अक्‍खर ती आसी ख़ॊख़ा चॊंख़्रर। अरा येसुस आरिन परघाचस, अरा आर ही गने धर्मेसी राजी ही पत्त नू तिंगियस, अरा नॆ कोड़े मना बिद्दियर आरिन कोड़े नंजस।

इब्रानी 2:17

ई चड्डे आस गे जम्मा नू तंग्‍है भ‍ईर लेक्‍खा मन्ना चाड़ रहचा। औंगे आस धर्मेसी सुसर नन्ना नू आर ही सोग्‍गे ईरू अरा पत्त'अना जॊगे कोहाँ नैग मना ओंगोस, अरा आस आर ही पाप गुट्ठिन छमा नना गे दाँड़े नना ओंगोस।

इब्रानी 4:15

नम्‍है एन्ने कोहाँ नैगस र'अस का नॆ नम्‍है पयहा नू नम्‍है गने दुक्‍खे सार'आ ओंग्दस। आस गा ख़ॆख़ेल नू उज्‍जो बारी उर्मी रकम ती नम्‍है लेक्‍खा बिढ़्रस, लिकिन एन्‍देर हूँ पाप मल नंजस।