25 ख़ने आस बाचस, “आस पपहा र'अस का मला, ऎन बलदन। ऎन ओन्टे लेका कत्थन अख़दन ऎन अन्धहा रहचकन अरा अक्कु ऎरा लगदन।”
लिकिन आस आरिन बाचस, “नॆ एंगन कोड़े नंजस आस बाचस, ‘निंग्है पिटरिन चॊद'आ ती ऎका।’”
फेन आर अन्धहा रहचस आसिन दोसर खेप हूँ मीख़ियर ती बाचर, “धर्मेसी मुन्दहारे किरिया मॊख़ा का नीन मानिम ब'अदय। ऎम अख़दम का आस पपहा आलस।”
ख़ने आर आसिन मेंजर, “आस निंगा गे एन्देर नंजस? आस एकासे निंग्है ख़न्नन कोड़े नंजस?”
आस आरिन बाचस, “निम्है ई कत्था गा हैकट कत्था हवे। आस एंग्है ख़न्नन कोड़े नंजस, अन्नु हूँ नीम इदिन हूँ बलदर आस एस्तेक बरचस।
एकास धर्मेसी ख़द्दस मइय्याँ पत्त'अदस, आस तंग्है जिया नू अख़दस का धर्मेसी ई गोवाह मानिम र'ई। अरा एकास धर्मेसिन मल पत्त'अदस, आस धर्मेसिन ठकवा कमदस, एन्देरगेका धर्मेस तंग्है ख़द्दासी पत्त नू तिंका गोवाहन आस मल पत्ताचस।