यॊहनस 6:45 - पुना गच्छरना NT (BSI)

⁴⁵ धर्मेसी कत्था तिंगुर ती नेम्‍हा पुथी नू लिख्रकी र'ई, ‘आर ओर्मर धर्मेस ती सिखाबाचका र'ओर।’ अन्नेम नॆ बंगासिन में‍जका ती आस ती सिख्रर, आर ओर्मर एंग्‍है गुसन बर'ओर।

यॊहनस 6:45 ပူးပေါင်းရင်းမြစ်များ

मत्तायोस 11:27

एम्‍बस एंगा गे उर्मी लूर अरा सवंगन सोंपचकादस। अरा नॆ हूँ बलनर का ऎन नॆ हिकदन एम्‍बस लेका अख़दस। अरा बंगस एकास अदिन नॆ हूँ बलनर ऎन लेका अख़दन, अरा ऎन नॆकन नॆकन बंगासिन ऎद'आ बेद्ददन आर अख़'ओर।

मत्तायोस 17:5

अरा एन्ने ब'अम लगियस का ओन्‍टा बिल्‍चना बदाली आरिन कुल्‍लिया चिच्‍चा। अरा बदाली ती धर्मे बबस अबड़ा चेलारिन बाचस, “ईस एंग्‍है चोन्‍हा ख़द्दस, ईस ती ऎन नगदे रिझ्रदन, ईसहीन मेना।”

मरकुस 1:2

ईद एन्ने ऒड़ मनी, धर्मेसी कत्‍था तिंगू यसायास तंग्‍है पुथी नू लिखचकादस, “ऎरा! ऎन एंग्‍है पैकासिन निंग्‍है मुन्‍द त‍इय्‍या लगदन, आस निंग्है डहरेन सपड़'ओस।

लू‍कस 1:70

आस तंग्‍है नेम्‍हा धर्मेसी कत्‍था तिंगुर ती हुल्‍लो नू बाचकाचस का

लू‍कस 18:31

तहाँ येसुस बारो चेलारिन तंग्‍है गुसन मीख़ियस ती बाचस, “ऎरा, नाम येरुसलॆम कादत, अरा एवंदा कत्‍था मनवा ख़द्दन एंगा पत्त नू धर्मेसी कत्‍था तिंगुर ती लिख्रकी र'ई अबड़ा जम्मा मनो।

यॊहनस 10:27

एंग्‍है भेंडो एंग्‍है सड़न मिनी। ऎन अबड़न अख़दन, अरा अबड़ा एंग्‍है गने गुड़ियार'ई।

यॊहनस 6:37

बंगस नॆकन एंगा चि'अदस, अबड़र ओर्मर एंग्‍है गुसन बर'ओर, अरा नॆ एंग्‍है गुसन बरदस आसिन इकला हूँ ऎन मल दुस'ओन।

यॊहनस 6:65

फेन येसुस बाचस, “इदगेम ऎन निमन बाचकन का, बंगस ओर्तोसिन एंग्‍है गुसन बर'आ गे मल चि'अदस होले, नॆ हूँ एंग्‍है गुसन बर'आ पोल्‍लनर।”

त‍इरकर 13:40

औंगे चिहुंक र'आ का, एकाद धर्मेसी कत्‍था तिंगुर ती तिंका र'ई आद निम्‍है म‍इय्याँ अम्‍बन बर'आ।

त‍इरकर 7:42

तहाँ धर्मेस आर ही बिड़दो मंजस ती आरिन चन्‍दो बीड़ी अरा बीनको गुट्ठिन ऒड़ लग्‍गा गे अम्‍बियस चिच्‍चस। एन्ने धर्मेसी कत्था तिंगुर ही पुथी नू लिख्रकी र'ई का, ‘अना इस्राऎल आलारो, नीम टोड़ंग नू चालीस बछर गूटी एंगा गे दान गुट्ठी अरा दाँड़े गुट्ठी मल ओन्‍द्रकर।

इफेसुस 1:17

अरा नीम धर्मेसिन अउरिम कोड़हे अख़'आ गे, आस निमन लूर अरा चलख़रनन चि'ऊ नेम्हा बॊलतस ती नीदा गे गोहरारदन। इदगे नम्है उर्बस येसु मसीसी धर्मेस महबा ही बंगस गुसन गोहरारते र'अदन।

फिलिप्‍पी 3:15

औंगे नम्‍है नू एवंदा आलर बड़ियर मंज ख़च्चकानर, आर ओर्मर एन्नेम सोचनर नेकअन। अरा एकअम कत्‍था नू नीम नन्नम सोच नू र'अदर होले, अदिन हूँ धर्मेस दिम फरी ननोस।

1 थेस्‍सलोनिकॆयर 4:9

अउर हूँ ऎम निमा गे भईरिन चोन्‍हा नन्ना ही पत्त नू लिखना ही चाड़ मलकी, एन्‍देरगेका तम्है ती नन्नर संगे चोन्‍हा ती र'आ गे धर्मेस निमन मुन्‍द तिम सिखाबाचका चिच्कादस।

इब्रानी 10:16

“अबड़ा उल्‍ला ही ख़ॊख़ा ऎन उर्बस आर गने पुना गच्‍छरनन गच्‍छर'ओन, आद ईद का, ऎन एंग्‍है नॆग गुट्ठिन आर ही जिया नू उइय्योन अरा अबड़न आर ही जिया नू लिख'ओन।”

1 यॊहन 2:27

लिकिन निमा गे नेम्हा बॊलतस ख़क्ख्रका र'अदस, आस निम्है नू र'अदस। औंगे एकअम आलर ही सिखाब'अना निमा गे चाड़ मलकी। निमा एन्द्रन अख़'आ गे चांड़ र'ई अबड़ा उर्मिन नेम्हा बॊलतस निमा गे सिखाब'अदस। आसी सिखाब'अना मानिम र'ई, ठकवा मल्ली। औंगे आसी सिखाब'अना लेक्खा नीम मसीस नू बन्चका र'आ।