गलातिया 4:5 - पुना गच्छरना NT (BSI)

⁵ अरा मूसासी नॆग ही तबे नू र'अना आलारिन अम्‍बत'ओस ती नाड़ोस। अरा नमा गे गॊद होच्‍का लेक्‍खा ख़द्द मना गे आकुस चि'ओस।

गलातिया 4:5 ပူးပေါင်းရင်းမြစ်များ

मत्तायोस 20:28

एन्‍देरगेका मनवा ख़द्दन ऎन आलारिन तेतर-सुसर नन्त'आ गे मला आलर गे तेतर-सुसर नना गे, अरा आलारिन तम्‍है पाप ही दंडे ती नाड़ा गे दाँड़े लेक्‍खा एंग्‍है मने ती खे'आ गे ख़ॆख़ेल नू बरचकन।”

लू‍कस 1:68

“इस्राऎल ही धर्मे उर्बस गे ओहमा मनन नेकअन, एन्‍देरगेका आस तंग्‍है आलारिन नाड़ा गे बरचकादस।

यॊहनस 1:12

लिकिन जेतेक आलर आसिन इंझ्रर अरा आसी नू पत्ताचर, अबड़ा ओर्मर गे आस धर्मेसी ख़द्द मना गे अदिया चिच्‍चस।

त‍इरकर 20:28

औंगे निम्‍है पत्त नू अरा धर्मेस तंग्‍है ख़द्दासी ख़ॆंस ती ख़ीन्‍दका तंग्‍है कलीसियन ख़ापा गे नेम्‍हा बॊलतस निमन ईरू-ख़ूजू उइय्का उर्मी खोंड़हा ही पत्त नू चिहुंक र'अके।

रोमी 10:4

एन्‍देरगेका धर्मेस एन्‍देर गे नॆग चिच्‍चस अदही मनेन मसीस पूरा नंजस, औंगे एका ओर्तर मसीसिन पत्त'ओर आर उजगो मनतार'ओर।

रोमी 8:14

नॆ धर्मेसी बॊलता ही कड़हाब'अना नू ऎकनर आर ओर्मर धर्मेसी ख़द्द-ख़र्रा हिकनर।

रोमी 8:15

निमा जॊंख़ मंज ख़च्‍चना ही बॊलता मल्‍ला ख़क्ख्रका का अन्‍ति नीम अत्रु मुन्‍द लेक्‍खा एल्‍चोर। लिकिन नीम धर्मेसी बॊलतन ख़क्‍खकर इकला आस निमन तंग्‍है ख़द्द-ख़र्रा बेसे गढ़चस। अक्‍कु नाम आसिन “अना बबा, अना बंग” ब'अदत।

रोमी 8:19

एन्‍देरगेका गोट्टा ख़ॆख़ेल ता गढ़र्रका आलॊ कोहाँ असरा ती धर्मेस नॆ नॆ तंग्‍है ख़द्दस एन्ने दहदर ननोस अदिन ऎरा गे पाब ऎरा लगी।

रोमी 8:23

ई ख़ॆख़ेल लेका मला, लिकिन नाम हूँ पाब ऎरना ती भितरी भितरी रेक'आ लगदत। नाम गा नेम्‍हा बॊलतासिन ख़क्‍खकादत एकदा धर्मेसी गच्छरका ही पहिल ख़ंजपा हिके। औंगे नाम धर्मेसी गोद होच्चका ख़द्द मंज ख़च्‍चना ही पाब ऎरा लगदत। इदही माने का नम्‍है कया पाप अरा खिलपत ती नाड़रना।

रोमी 9:4

आर इस्राऎल आलर हिकनर, अरा धर्मेसी गोद उइय्‍का ख़द्दर हिकनर। अरा आर धर्मेसी महबा आबोन ईरका र'अनर। अरा आर गे धर्मेसी अरा तम्‍है गने ता धर्मेसी गच्‍छरना र'ई। अरा धर्मेस आर गे चिच्का मूसासी पॆसका अरा महबा नन्ना ही नॆग अरा गच्‍छरना गुट्ठी र'ई।

गलातिया 3:13

मसीस नमा गे सर्पारस अरा ई लेक्‍खा नॆग ही सर्पारना ती नाड़ियस। एन्‍देरगेका नेम्हा पुथी नू लिख्रकी र'ई अन्ने मंजा, “नॆकन कंक नू ठोकतार'ई, आस सर्पारकादस।”

गलातिया 3:26

अरा नीम ओर्मर गा मसी येसुस म‍इय्याँ ता पत्त'अना ती धर्मेसी ख़द्दर मंजकादर।

गलातिया 4:21

नीम नॆग ही तबे नू र'आ बेद्ददर, नॆग एन्‍देर ब'ई अदिन नीम बलदर का? अदिन एंगन तेंगा।

गलातिया 4:7

ईगे अक्‍कु नीन बिट्ठी ननू जॊंख़ मलदय। नीन धर्मेसी ख़द्दय हिकदय। नीन आसी ख़द्द र'अना ती नीन धर्मेसी गच्‍छरका आसीस आबोन ख़क्‍खोय।

इफेसुस 1:5

नमन येसु मसीस ती आसी गोद उइय्का ख़द्द मना गे मुन्द दिम ओकताचस। आस इदन तंग्‍है चिताबुता ती अरा तंग्है मने ती नंजस।

इफेसुस 1:7

मसीस नू आस बाहताचका ख़ॆंस ती नमा गे नाड़रना र'ई। ईद नम्है अक्‍का-बलका गुट्ठी गे धर्मेसी मया ही निंदका ती ख़क्ख्रना पाप छमा हवे।

इफेसुस 5:2

एकासे मसीस तंगन धर्मेस गे पत्तारना महकारना दान अरा दाँड़े बेसे नम्है चड्डे चिच्चस ती नम्‍है गने चोन्‍हा नंजस, अन्नेम नीम हूँ चोन्हा ही उज्जना उज्जा।

तीतुस 2:14

आस तान तंगन नमा चिच्‍चस उइय्यस, होले आस नमन उर्मी रकम ही पाप ती नाड़ा गे दाम चि'आ ओंग्दस। अरा नमन नेम्‍हा ननरकी तंगा गे एन्ने जाती कमदस, एकदा दौ नलख गुट्ठिन नना गे सगरो सपड़ारकी र'ई।

इब्रानी 1:3

आस धर्मेसी महबा ही त्रास ऎथ्रदस अरा आसी सुबहा आबोन अन्नेम ऎद्ददस। आस तंग्‍है सवंगिय कत्‍था ती ओर्मा जिनिसन समड़'अदस। आस नम्‍है पाप गुट्ठिन सुध नंजस ती उर्मी सवंग ती निन्‍द्रका धर्मेसी तीना पक्‍खे उक्‍का र'अदस।

इब्रानी 9:12

मसीस बोकड़ा अरा बछरु गुट्ठी ही ख़ॆंस ती मला, लिकिन तंग्‍है ख़ॆंस ती दिम ओंग्‍होन लेका कोड़हे नेम्‍हा अड्डा नू कोरचस, औंगे आस जनमजुग नाड़रनन नमा गे चि'आ उंगियस।

इब्रानी 9:15

मसीस दिम पुना गच्‍छरना ही धर्मेस अरा आलर ही मझी आलस र'अस, औंगे धर्मेस ती मॆख़्रका आलर ओर्मर आसी गच्‍छरका जनमजुग आसीस आबोन ख़क्‍खा ओंगनर। एन्‍देरगेका आलर मुन्‍द ता गच्‍छरना ही बेड़ा नू नंजका पाप गुट्ठी ती आरिन अम्‍बत'आ गे मसीस केच्‍चस।

1 पतरस 3:18

इवंगेका मसीस नन्नर ही पाप गुट्ठी गे ओंग्होल लेका केच्चस केरस। आस धर्मेसी ऎरना नू उजगो रहचस, लिकिन आस निमन धर्मेस गुसन अंड़सत'आ गे धर्मेसी ऎरना नू उजगो मलकर गे केच्‍चस। आस कया ती गा पिटतारस, लिकिन बॊलतस नू उज्‍जतारस।

दहदर मंजका कत्‍था 14:3

अरा आर बॆल-गदिया ही मुन्दहारे अरा चरियो उज्‍जना आलॊ ही मुन्दहारे अरा सेयान आलर ही मुन्दहारे ओन्टा पुना डंडी पाड़ा लगियर। अरा ख़ॆख़ेल ती नाड़रका ओन लाक चौवालीस हजार आलारिन अम्‍बर नॆ हूँ आ डंडीन सिख्र'आ पोल्‍ला लगियर।

दहदर मंजका कत्‍था 5:9

अरा अबड़र ओन्टा पुना डंडी पाड़ा हेलरर का, “नीन आ पुथिन हो'आ गे अरा अदही मरका गुट्ठिन ख़च्‍चा गे जॊगे र'अदय। अरा नीन पिटतारकय ती निंग्‍है ख़ॆंस ती उर्मी गोतोर अरा भखा अरा आल खोंड़हा अरा राजी ती धर्मेस गे आलारिन ख़ीन्दकादय।