इफेसुस 5:2 - पुना गच्छरना NT (BSI)

² एकासे मसीस तंगन धर्मेस गे पत्तारना महकारना दान अरा दाँड़े बेसे नम्है चड्डे चिच्चस ती नम्‍है गने चोन्‍हा नंजस, अन्नेम नीम हूँ चोन्हा ही उज्जना उज्जा।

इफेसुस 5:2 ပူးပေါင်းရင်းမြစ်များ

मत्तायोस 20:28

एन्‍देरगेका मनवा ख़द्दन ऎन आलारिन तेतर-सुसर नन्त'आ गे मला आलर गे तेतर-सुसर नना गे, अरा आलारिन तम्‍है पाप ही दंडे ती नाड़ा गे दाँड़े लेक्‍खा एंग्‍है मने ती खे'आ गे ख़ॆख़ेल नू बरचकन।”

यॊहनस 13:34

ऎन निमा गे ओन्‍टा पुना पॆसका चि'अदन, नीम ओर्त ओर्त गने चोन्‍हा नना। एकासे ऎन निमन चोन्‍हा नंजकन, अन्नेम नीम हूँ ओर्त ओर्त गने चोन्‍हा नन्‍ना र'ई।

यॊहनस 6:51

मेर्ख़ा ती इत्तका उज्‍जना चि'ऊ असमा ऎन हिकदन। नेक‍ईम ई असमन मॊख़दस होले, आस उर्मी उल्‍ला उज्‍जोस। अरा ई असमा एंग्‍है अहड़ा हवे। इदन ऎन ख़ॆख़ेल ता आलर ही उज्‍जना गे चि'ओन।”

रोमी 15:16

नन-यहूदीर गे मसी येसुसी जॊंख़ मंजकन। ऎन आसी दौ कत्‍थन सिखाब'अना ती नैगस लेक्‍खा धर्मेसी तेतर-सुसर नंजकन। होले नन-यहूदीर नेम्‍हा बॊलतस ती नेम्‍हा मंजका ती धर्मेस गे इंझ्रना दाँड़े बेसे मना ओंगोर।

रोमी 4:25

येसुस नम्‍है अक्‍का-बलका गुट्ठी गे खे'आ गे चितारस, अरा नमन उजगो आल कम'आ गे केचका ती उज्‍जा चॊच्‍चस।

रोमी 8:3

नमा पाप मॆद सुबहा ही चड्डे मूसासी नॆग लेड़पोंयहा मंजा, ख़ने आद तंग्‍है नलखन मुंज ख़च्‍चा गे पोल्‍ला। लिकिन धर्मेस गा अदिन नंजस एकदा मूसासी नॆग नना पोल्‍ला। आस तंग्‍है ख़द्दासिन नाम पपहर ही कया बेसे ता कया नू पाप दाँड़े चि'आ गे त‍इय्यस। ई बेसे धर्मेस ओन्‍टा आल कया नू पाप आबोन दंडे चिच्‍चस।

रोमी 8:37

लिकिन इबड़ा उर्मी कत्‍था गुट्ठी नू नाम धर्मेस ती एकास नमन चोन्‍हा नंजकादस जितनन ख़क्‍खका ती हूँ कट्टिका र'अदत।

1 कोरिन्‍थ 16:14

नीम एन्‍देर एन्‍देर नन्‍दर उर्मिन चोन्‍हा ती नना।

1 कोरिन्‍थ 5:7

पच्चा तिस्‍सन अम्‍बरकी पुना लिंडका गुंडा लेक्‍खा निमन नेम्‍हा कम'आ। मानिम नू नीम एन्ने बिगर तिस्‍सा ही आलर हिकदर, एन्‍देरगेका नम्‍है कट्टना ही भेंडो ख़द्द मसीस नमा गे दाँड़े मन्रकादस।

2 कोरिन्‍थ 2:14

लिकिन धर्मेसी धन्‍यावाद मनन, आस सगरो जित'आ गे मसीस नू नमन कड़हाब'अदस, अरा आसी पत्त ता लूरन एम्‍है ती गोट्टा अड्डा नू महकारना लेक्खा बींड़दस।

2 कोरिन्‍थ 2:15

एन्‍देरगेका ऎम नाड़रना आलर ही मझी नू अरा नठारना आलर ही मझी नू दौ कत्था तेंगना ती धर्मेसी ऎरना नू मसीसी एम्‍बा महक हिकदम।

2 कोरिन्‍थ 8:9

नीम गा नम्है उर्बस येसु मसीसी मया आबोन अख़दर का, आस उरुब रहचका ती हूँ निम्‍है चड्डे कीड़ा मंजस, ईगेका नीम आसी कीड़ा मन्ना ती उरुब मना ओंगोर।

गलातिया 1:4

येसुस दिम धर्मेसी अरा बंगासी मने ती ई मलदौ ख़ॆख़ेल ती नमन नाड़ा गे नम्‍है पाप गुट्ठी गे केच्‍चस।

गलातिया 2:20

ऎन मसीस गने क्रुस नू ठोकरकादन, अक्‍कु ऎन मल्‍ला उज्‍जना, लिकिन मसीस एंग्‍है नू उज्‍जा लगदस। अक्‍कु ऎन एंग्‍है कया नू उज्‍जा लगदन होले धर्मेसी तंग्‍दस येसु मसीस नू पत्त'अना ती उज्‍जा लगदन, एकास एंगन चोन्‍हा नंजस अरा एंगा गे तंग्‍है उज्‍जनन चिच्‍चस।

इफेसुस 1:4

नाम आसी ऎरना नू नेम्हा अरा बिगर बदी र'आ गे ख़ॆख़ेल ही गढ़्रना ती मुन्द दिम आस नमन मसीस नू चज्जियस। आस तंग्है चोन्‍हा ही चड्डे

इफेसुस 3:17

अरा मसीस मइय्याँ ता निम्है पत्त'अना ही चड्डे मसीस निम्‍है जिया नू ओक्करदस नेकअन, अरा नीम चोन्‍हा नू मन्न ही पादा ख़ोड़ख़ा एत्तना लेक्खा मनरकी बन्चका र'अन नेकअन।

इफेसुस 3:19

अरा नीम मसीसी चोन्‍हन अख़दर नेकअन, एकदा अख़ना लूर ती गेच्‍छा र'ई। ई लेक्‍खा नीम धर्मेसी उर्मी लेक्खा निंदका ती निंद्रदर नेकअन।

इफेसुस 4:15

ऊजी नू चोन्‍हा गने मानी ब'अना ती उर्मी कत्था गुट्ठी नू आसी मॆद कलीसिया ही कुक्कु मसीस नू पर्दनुम क'ओम।

इफेसुस 4:2

नीम सगरो निमन सन्नी नना ती लुदऊ गने अरा खतिर मन्ना ती र'आ, अरा ओर्त ओर्तोरिन सहना ती चोन्‍हा गने ऎका।

इफेसुस 5:15

औंगे नीम एकासे उज्जदर अदही पत्त नू चिहुंक र'आ। लूर मलका आलर बेसे अमा उज्जा, लिकिन लूरगर बेसे उज्जा।

इफेसुस 5:25

अना मॆतारो, एकासे मसीस कलीसियन चोन्‍हा नंजस ती तंग्है जियन अदगे चिच्चस, अन्नेम नीम हूँ तम्है तम्है मुक्‍कन चोन्‍हा नना।

फिलिप्‍पी 4:18

ऎन नीम तइय्का उर्मिन ख़क्खकन, ईद एंग्है चाड़ ती बग्गे र'ई। नीम एपाफ्रोदितोस ती तइय्का इनाम गुट्ठिन ख़क्‍खकन ती ऎन उड़चकन केरकादन। आद गा महकारना दान अरा इंझ्रना जॊगे दाँड़े बेसे हवे, एकदा धर्मेस गे दौ लग्‍गी।

कोलोस्से 3:14

अरा इबड़ा उर्मी दौ गुन्न ती कोड़हे, चोन्‍हा आबोन अत्ता। आदिम अबड़ा उर्मिन बड़ियर ओन्टेम मन्ना नू हें'अरकी उइय्की र'ई।

1 थेस्‍सलोनिकॆयर 4:9

अउर हूँ ऎम निमा गे भईरिन चोन्‍हा नन्ना ही पत्त नू लिखना ही चाड़ मलकी, एन्‍देरगेका तम्है ती नन्नर संगे चोन्‍हा ती र'आ गे धर्मेस निमन मुन्‍द तिम सिखाबाचका चिच्कादस।

1 तीमोथियुस 2:6

आस तंगन ओर्मा आलारिन नाड़रना ही दामे नू चिच्‍चस, ई कत्‍था दिम धर्मेस ती आलर गे ठौका बेड़ा नू चितारा।

1 तीमोथियुस 4:12

नीन जॊंख़य र'अदय, औंगे नॆका हूँ निंगन दुस'आ अमके चि'आ। लिकिन निंग्‍है ब'अना, अरा उज्‍जना ओक्‍कना, अरा चोन्‍हा, अरा पत्त'अना, अरा नेम्‍हा उज्‍जना नू पत्त‍'उर गे नीन चिन्‍हा मना।

तीतुस 2:14

आस तान तंगन नमा चिच्‍चस उइय्यस, होले आस नमन उर्मी रकम ही पाप ती नाड़ा गे दाम चि'आ ओंग्दस। अरा नमन नेम्‍हा ननरकी तंगा गे एन्ने जाती कमदस, एकदा दौ नलख गुट्ठिन नना गे सगरो सपड़ारकी र'ई।

इब्रानी 8:3

उर्मी कोहाँ नैगर दान गुट्ठिन अरा दाँड़े गुट्ठिन अरग'आ गे ओक्‍तारकानर। ई चड्डे नम्‍है कोहाँ नैगस गे हूँ इन्द्रिइम अरग'आ गे चाड़ र'ई।

इब्रानी 9:14

अन्ने होले मसीसी ख़ॆंस नमा लखनन मलदौ नलख गुट्ठी ती एका कोड़हे सुध ननो दने, औंगे नाम उज्‍जना धर्मेसिन सुसर नना ओंग्दत। एन्‍देरगेका मसीस जनमजुग ही बॊलतासी सवंग ती तंगन नम्‍है पाप गुट्ठी गे पखड़ दाँड़े बेसे धर्मेस गे अरगस।

इब्रानी 9:23

ई चड्डे मेर्ख़ा ता मानिम जिनिस ही रूपे लेक्‍खा नू र'ऊ कोहाँ कुम्‍बा अरा अदही जिनिस जम्मा ई लेक्‍खा दाँड़े गुट्ठी ती सुध मन्‍तारना ही चाड़ र'ई। अन्ने होले मेर्ख़ा ता मानिम जिनिस गा इबड़ा ती कोड़हे बॆस दाँड़े गुट्ठी ती सुध मन्‍तारना र'ई।

इब्रानी 9:26

अन्ने चाड़ रहचा होले, ख़ॆख़ेल गढ़्रका ती आस गे घड़ी घड़ी दुक्‍खे चॊदना मनो दने। लिकिन अक्‍कु सौंसे ही छेद बेड़ा नू आस ओंग्‍होन लेका तंगन खे'अना ही दाँड़े ती पाप गुट्ठिन ओथ्र'आ गे दहदर मंजकादस।

1 पतरस 4:8

उर्मी ती कोहाँ गा ओर्त ओर्त गने कोड़हे चोन्हा नना, एन्देरगेका चोन्हा कोड़हे पाप गुट्ठिन भुलाब'अती चि'ई।

1 यॊहन 3:16

मसीस तंग्है जियन नमा गे चिच्का ती नाम इदन अख़दत का चोन्हा एन्द्रा र'ई। औंगे नाम हूँ नम्है संगे मसी भईर गे नम्है जियन चि'अना र'ई।

1 यॊहन 3:23

अरा नाम आसी ख़द्दस येसु मसीसी नामे नू पत्त'अना र'ई, अरा आस नमन पॆसका रहचका लेक्खा ओर्त ओर्त गने चोन्हा नन्ना र'ई। ईदिम आसी पॆसका हवे।

दहदर मंजका कत्‍था 1:5

अरा येसु मसीस ती निमा मया अरा कोड़े बर'अन नेकअन। मसीस दिम पत्त'अना जॊगे गोवाह, अरा केचका ती उज्‍जा चो'अना नू जेट्ठा, अरा ख़ॆख़ेल ता उर्मी बॆलारिन राजी ननू र'अदस। आस दिम नमन चोन्‍हा नंजस ती नमन तंग्‍है ख़ॆंस ती नम्‍है पाप गुट्ठी ती नाड़ियस।

दहदर मंजका कत्‍था 5:9

अरा अबड़र ओन्टा पुना डंडी पाड़ा हेलरर का, “नीन आ पुथिन हो'आ गे अरा अदही मरका गुट्ठिन ख़च्‍चा गे जॊगे र'अदय। अरा नीन पिटतारकय ती निंग्‍है ख़ॆंस ती उर्मी गोतोर अरा भखा अरा आल खोंड़हा अरा राजी ती धर्मेस गे आलारिन ख़ीन्दकादय।