इफेसुस 3:4 - पुना गच्छरना NT (BSI)

⁴ ऎन निमा एन्देर लिखचका र'अदन, अदिन नीम पढ़'ओर होले, मसीसी गम चिताबुता ही पत्त ता एंग्है बुझुरकन नीम अख़'आ ओंगोर।

इफेसुस 3:4 ပူးပေါင်းရင်းမြစ်များ

मत्तायोस 13:11

आस आनाकिर्ताचस, “निमा मेर्ख़ा राजी ही नूख्रका कत्‍था आबोन बुझ्र'आ गे चीरकी र'ई, लिकिन नन्‍नर गे ईद मल्‍ला चीरका।

लू‍कस 8:10

आस बाचस, “निमा धर्मेसी राजी ही नूख्रका कत्‍था आबोन बुझ्र'आ गे चीरकी र'ई, लिकिन नन्‍नर गे जोक्‍खा ख़ीरी ती तेंग्र'ई। ईगेका, नेम्हा पुथी नू एन्ने लिक्‍खरकी र'ई, ‘ऎन नन्‍दन अदिन ऎरदर लिकिन अत्रु ती एन्‍द्रा हूँ मल सिख्र'ओर, ऎन ब'अदन अदिन मेन्‍दर लिकिन अदही माने मल बुझुर'ओर।’

रोमी 11:25

अना भ‍ईरो! ऎन निमन ई भेद ही मनेन बुझुरत'आ गे बेद्ददन, होले नीम निमन कोड़हे लूरगर अम्‍बोर बुझ्र'ओर। इस्राऎल ता कुदहा आलर अक्‍कुन बेड़हा मंजका र'अनर। लिकिन गोट्टा नन-यहूदीर हूँ आसिन पत्त'अना गूटी लेका आर एन्ने र'ओर।

रोमी 16:25

धर्मेस गे ओहमा मनन नेकअन। आस दौ कत्‍था ती निमन पत्त'अना नू बड़ियर नना ओंग्दस, एका कत्‍थन ऎन येसु मसीसी पत्त नू निमन तिंकन। ई कत्‍था ही गम हुल्‍लो ती नूख़्रकी रहचा।

1 कोरिन्‍थ 13:2

ऎन धर्मेसी कत्‍थन मुन्‍द तिंगू आलन, अरा उर्मी नूख़्रका ही गम्मन अरा उर्मी लूरन अख़ना ही सवंग र'ऊ आलन, अरा परता गुट्ठिन हूँ गुछाब'अना ही कोड़हे बड़ियर पत्त'अना र'ऊ आलन, अन्नु हूँ एंग्‍है नू चोन्‍हा मलकी होले, ऎन एन्‍देर हूँ मलकन।

1 कोरिन्‍थ 4:1

आलर एमन मसीसी जॊंख़ अरा धर्मेसी गम ही कत्‍था गुट्ठिन बुझ्रत'अना ही नलखन ख़क्ख्रका आलर अख़नर नेकअन।

2 कोरिन्‍थ 11:6

ऎन भासन चि'अना नू सवंगिय मलदन, अन्नु हूँ लूर नू अन्ने मला। ऎम गा इदन उर्मी तरती उर्मी कत्‍था नू दहदर नंजकादम।

इफेसुस 1:9

आस तंग्‍है चिताबुता ही गम आबोन नमा गे चलख़स। आद आस तंग्है दौ मने ही लेक्खा तान मसीस नू नन्ना चिताबुता रहचा।

इफेसुस 3:3

धर्मेस तान तंग्है गम चिताबुतन एंगा दहदर नंजस। ऎन इदही पत्त नू मुन्द दिम अंछर ती लिखचका र'अदन।

इफेसुस 3:9

आ गम चिताबुतन ओर्मा आलर गे बुझुरत'आ गे ऎन चज्रकादन, एकदा उर्मिन गढ़'ऊ धर्मेस ती मुन्द ता परिया गुट्ठी नू नुड्डका उइय्का रहचा।

इफेसुस 5:32

ईद ओन्टा कोहाँ गम हवे। लिकिन ऎन गा मसीस अरा कलीसिया ही पत्त नू ब'आलदन।

इफेसुस 6:19

अरा एंगा गे हूँ गोहरार'आ का ऎन एका एका बारी धर्मेसी कत्थन तेंगोन, आ बारी डिढ ती दौ कत्‍था ही गम आबोन तेंगा गे धर्मेस कत्था गुट्ठिन चि'अदस नेकअन।

कोलोस्से 1:26

ई दौ कत्था दिम गम हिके, एकदा ऒर ती अरा परिया परिया ती नूख़ुरकी गा रहचा, लिकिन अक्‍कु आद आसी नेम्‍हा आलर गे दहदर मन्तारा।

कोलोस्से 2:2

नीम हूँ अरा आर हूँ रिझ्रारकी चोन्‍हा ती मेस्रका र'अना र'ई, ईद दिम एंग्है मने हवे। होले नीम उर्मी बुझुरना गने अजगुत आसीसन ख़क्‍खोर ती धर्मेसी गम आबोन अख़'ओर चि'ओर। आ गम मसीस दिम हवे।

कोलोस्से 4:3

अरा इदही गने एमा गे हूँ गोहरार'आ का धर्मेस एमा गे दौ कत्‍था तेंगा गे बलिन तिसगदस नेकअन। होले ऎम मसीसी पत्त ता गम ही कत्‍थन तेंगा ओंगोम। ई नलख ही चड्डेम ऎन जेहेल नू हॆंरकादन।

1 तीमोथियुस 3:16

ओर्मर अख़नर का महबा ही गम नगदे कोहाँ र'ई। धर्मेस आल कया नू तान ऎथरस अरा नेम्‍हा बॊलतस ती आस धर्मेसी ख़द्दस एन्ने इजताचस अरा मेर्ख़ा पैकर हूँ आसिन ईरियर। आस यहूदी मलनर आ जातियर नू मेन्‍तारस। अरा आस सौंसे ख़ॆख़ेल ता आलर ती पत्ततारस अरा आस मेर्ख़ा नू चोतारस।

1 तीमोथियुस 3:9

अरा आर पत्त‍'अना ही मानिम गड्डी आबोन निमन लखना ती सम्ड़'ऊ उइय्‍युर र'अना र'ई।