कोलोस्से 2:8 - पुना गच्छरना NT (BSI)

⁸ चिहुंक र'आ का नीकईम निमन अनभनियाँ अरा ठगना तत्व लूर ती अम्‍बोर फफड़'आ हो'आ, एकदा पुरखौती अरा ख़ॆख़ेल ता बॊलता गुट्ठी ही सवंग ता सिखाब'अना लेक्‍खा गा र'ई, लिकिन मसीसी लेक्‍खा मलकी।

कोलोस्से 2:8 ပူးပေါင်းရင်းမြစ်များ

मत्तायोस 10:17

लिकिन आलर ती चिहुंक र'अके। नीम एंग्‍है गने चॊख़र'उर र'अना चड्डे आर निमन कोहाँ सभा गुट्ठी नू चि'ओर अरा तम्‍है गोड़हा एड़पा नू कोर्रा ती ल'ओर।

मत्तायोस 16:6

येसुस आरिन चेताबाचस, “ऎरा, नीम फरिसीर अरा सदुकीर ही बिदगी ही पत्त नू बड़ियर र'अके।”

मत्तायोस 7:15

ठकवा धर्मेसी कत्‍था तिंगुर ती चिहुंक र'आ। आर ऎरना नू लुद‍ऊ लेक्‍खा भेंडो ही बेसे निम्‍है गुसन बरनर। लिकिन आर मानिम नू चर्रना मॊख़ना हड़हा र‍'अनर।

त‍इरकर 17:18

अरा एपिकूरी अरा स्‍तोईकी धरम ता जोक्‍क सिखाब'उर आसी गने कत्‍था बरता मना हेलरर। अरा जोक्‍कोर बाचर, “ई पोरपोरोस एन्‍देर ब'आ बेद्ददस?” अरा नन्नर बाचर, “ईस गा नन्ना देंवता गुट्ठी ही कत्‍था तिंगुस लगदस।” एन्‍देरगेका पौलुस येसुसी अरा आसी उज्‍जा चो'अना ही पत्त नू तेंगा लगियस।

त‍इरकर 17:32

केचका ही उज्‍जा चो'अना ही पत्त ता कत्‍थन आलर मेंजर ती जोक्‍क आलर अलखा हेलरर। अरा जोक्‍क आलर बाचर, “ई कत्‍था ही पत्त नू ख़ॊख़ा ऎम अउरिम निंग्‍है ती मेनोम।”

रोमी 16:17

अना भ‍ईरो! निमन ऎन गोहरारदन का नीम एन्‍देर सिखाब'अना ख़क्‍खकर अदही बिड़दो नू निमन ख़ाँड़नर‍ अरा निम्‍है डहरे ती मूड़त'अनर आर ही ती चिहुंक अरा तरकूटी र'आ।

1 कोरिन्‍थ 10:12

औंगे एका ओर्तस सोचदस का आस बड़ियर इज्‍जकादस, आस चिहुंक र'अन नेकअन का अम्‍बोस खत्र'आ।

1 कोरिन्‍थ 8:9

लिकिन नीम चिहुंक र'आ का, निम्‍है छछिन्‍द पत्त'अना नू पयहा आलारिन पाप नू अम्‍बोर खत्रत'आ।

2 कोरिन्‍थ 10:5

अत्रु ती ऎम आनानख्रना गुट्ठी अरा धर्मेसी पत्त ता लूर ही बिड़दो नू चॊचकी र'ऊ उर्मी फुलई मन्नन खंडदम। अरा ओर्मा सोचनन मसीसिन पॆस्र'आ गे हॆंरदम।

गलातिया 1:14

एंग्‍है बग्‍गे जातियर गुट्ठी ती नॆ एंग्‍है गने ता रहचर, आर ती यहूदी खोंड़हा नू परदनुम मुन्‍द काला लिक्‍कन। अरा एम्‍है पूरखर ही चाल गुट्ठी गे नगदे रिझ्र'आ लिक्‍कन।

गलातिया 4:3

अन्नेम नाम ख़द्दत रहचकत आ गूटी ख़ॆख़ेल ता उर्मी बॊलता गुट्ठी ही तबे नू रहचकत।

गलातिया 4:9

लिकिन अक्‍कु नीम धर्मेसिन अक्‍ख ख़च्‍चिकर। मानिम नू धर्मेस ती नीम अक्कर। होले नीम एकन्ने पयहा अरा लंडी सिखाब'अना तरा किर्रदर? अउरिम अबड़ा ही जॊंख़ मना बेद्ददर।

गलातिया 5:15

नीम निम्‍है ती ओर्त ओर्तारिन पल्‍ल ती चब'अर, गिर्रो गोत्तो नना गे तिहा नन्‍दर, होले चिहुंक र'आ, मला होले नीम निम्‍है ओर्त ओर्तारिन नठाब'ओर।

इफेसुस 2:2

आ बेड़ा नू नीम ई ख़ॆख़ेल ता मलदौ डहरे नू ईक्कर। अरा नीम ताका राजी ता बॊलता ही सवंग गुट्ठी मइय्याँ राजी ननुस गेम पॆस्रकर। अरा आ बॊलता दिम धर्मेसिन मल पॆस्र'उर मइय्याँ अक्कु नलख ननी।

इफेसुस 4:20

लिकिन नीम गा मसीसी पत्त नू ई लेक्खम मल सिख्रकर।

इफेसुस 5:6

नॆ हूँ निमन अयंध'आ कत्था गुट्ठी ती ठग'आ गे अड्डा अमा चि'आ। एन्‍देरगेका इबड़ा नलख चड्डेम धर्मेसी कैर आसिन मल पॆस्र'उर मइय्याँ बर'ई।

फिलिप्‍पी 3:2

अल्‍ला गुट्ठी लेक्खा ठकवा सिखाब'उर ती चिहुंक र'आ, आर मलदौ ननुर अरा नाड़रना गे खतना मन्ना र'ई एन्ने ब'ऊ आलर हिकनर।

कोलोस्से 2:18

नॆ हूँ निमन ठकना लुदऊ नू अरा मेर्ख़ा पैकारिन ओहमा मन्ना नू मन्दस ती नीम निम्है इनाम आबोन मल ख़क्खना ही जॊगे मना गे अड्डा अमा चि'आ। ई लेक्खा आलस तंग्है ईरका देखार ही पत्त नू बग्गे बुझुरत'अदस। बॊलता ही सुबहा मलका आसी जिया अनभनियाँ सोच ती फुलई मनी।

कोलोस्से 2:20

नीम मसीस गने केचकादर, ख़ने आस निमन ख़ॆख़ेल ता बॊलता गुट्ठी ही सवंग ती अम्तारका केरकादस। औंगे नीम एन्देरगे अक्कु गूटी ख़ॆख़ेल ता आलर लेक्खा अदही नॆग गुट्ठी नू एन्ने ऎकालदर का,

कोलोस्से 2:22

इबड़ा उर्मी आलॊ बउरारनुम बउरारनुम नठार'ओ, एन्‍देरगेका इबड़ा आलर ही पॆसका अरा सिखाबाचका गुट्ठी हवे।

कोलोस्से 2:23

इबड़ा नॆग गुट्ठी महबा नन्ना ही चाल, अरा लुदऊ मन्ना, अरा मॆदन सिझा ब'अना लूर लेक्‍खा गा ईथ्र'ई, लिकिन मॆद ही चिबाख़ारना गुट्ठिन छेंक'आ गे इबड़ा ती एन्‍देर हूँ संगरा मल मनी।

1 तीमोथियुस 6:20

अना तीमोथियुस धर्मेस निंगा सोंपचकादस अदन ख़ापा। अरा महबा मलका ब'अनन अरा एकाद लूर मल्‍ला अदिन लूर ब'अरकी मलदौ कछनख्रना ती तरकूटी र'आ।

2 तीमोथियुस 3:13

लिकिन मलदौ आलर अरा भुरिंयु आलर दगा चि'अनुम अरा दगा मूख़नुम बगड़ारते किर्रिमबि'ओर।

इब्रानी 13:9

कैनो रकम ही नन्ना नन्ना सिखाब'अना ती अमा बेहड़ार'आ। अरा चाल ही ओन्ना-मॊख़ना गुट्ठी ती मला धर्मेसी मया ती नम्‍है जिया बड़ियर मन्ना बॆस हवे। ई चाल ही ओन्ना-मॊख़ना गुट्ठिन मूख़ू आलर गे अबड़ा ती एन्‍द्रा हूँ फयदा मल्‍ला।

इब्रानी 3:12

अना भ‍ईरो! नीम चिहुंक र'आ। निम्‍है ती नॆखा हूँ मलदौ अरा मल पत्त'अना ही जिया अम्‍बन मना, एकदा निमन उज्‍जना धर्मेस ती तरकूटी ननो।

1 पतरस 1:18

एन्‍देरगेका नीम अख़दर का निम्‍है पूरखर ती इत्तनुम बर'आ लगी निम्है अयंदहा उज्‍जना ही डहरे ती निम्‍है नाड़रना सोना मलता चाँदी लेक्‍खा नठारना आलॊ ही दाम ती मल मंजकी र'ई।

2 पतरस 3:17

औंगे अना चोन्हा आलारो, मुन्द तिम नीम इदन अख़ना ती, चिहुंक र'आ। एन्ने अम्बो मना का, अबड़ा नॆग मलका आलर ही मलदौ नू बझ्रर'अरकी निम्है ठिमठिमने दसा ती अम्बोर खतर'आ।

2 यॊहन 1:8

नीम चिहुंक र'आ, होले नीम एन्देरगे कोड़हे नलख नंजकादर अदही ख़ंजपन मल एब्स'ओर, अरा निम्है सुसर गे धर्मेस ती गोट्टा ख़ंजपन ख़क्खा ओंग्दर।