4 एंग्है उज्जना ख़द्द परिया तिम एंग्है उज्जना ही ऒर एंग्है देस नू अरा ख़ॊख़ा येरुसलॆम नू एंग्है उज्जना ओक्कना एकासे रहचा, अदिन उर्मी यहूदीर अख़नर।
“ऎन गा यहूदी आलन हिकदन। ऎन किलिकिया देस ता तरसोस नगरे नू कुन्द्रकन। अरा ई येरुसलॆम नगरे नू पर्दकन ती गमालिऎलसी ख़ेड्डमूली उक्कन ती नम्है पूरखर ही नॆग अरा चाल गुट्ठिन ठौका ठौका सिख्रकन। अरा धर्मेस गे एन्ने मूलख़का रहचकन, एकासे इन्ना नीम ओर्मर र'अदर।
ऎन निंग्है मुन्दहारे ई कत्थन मन्दन का, एका डहरेन ऎन मन्दन ती ऎकदन आ डहरेन आर ठौका मल्ला ब'अनर। ऎन एंग्है पूरखर ही धर्मेसिन ऒड़ नन्दन, अरा एकदा एकदा मूसासी नॆग अरा धर्मेसी कत्था तिंगुर ही पुथी नू लिख्रकी र'ई, अबड़ा उर्मिन ऎन पत्त'अदन।
ऎन मुन्द यहूदी धरम नू रहचकन ख़ने एकासे उज्जा ओक्का लिक्कन अदिन नीम अख़दर। ऎन कैयो खेप धर्मेसी कलीसिया आबोन बुड़ाब'आ गे चिताबुता नंजकन।
एंग्हा कुन्द्रका ती आठ उल्ला नू एंग्है खतना मंजा, अरा ऎन इस्राऎल आलर ता हिकदन, अरा ऎन बेनियमिन गोतोर ता हिकदन, अरा एंग्है अयंग बंगर निमन इब्रानी आलर हिकनर ती ऎन हूँ निमन इब्रानी आलन हिकदन, अरा मूसासी नॆग उर्मिन पॆस्रना ही पत्त नू गा ऎन फरिसी हिकदन।
लिकिन ऎन आलारिन एन्देर सिखाब'अदन, अरा एकासे ऎन उज्जदन, अरा एंग्है उज्जना नू एंग्है चिताबुतन, अरा धर्मेस नू एंग्है पत्त'अनन, अरा आलर नू एंग्है कयास अरा चोन्हा नन्नन अरा दुक्खे सारनन नीन बॆस अख़दय।