त‍इरकर 26:18 - पुना गच्छरना NT (BSI)

¹⁸ ऎन आर ही ख़न्न चलख़'आ गे निंगन आर गुसन त‍इय्या लगदन। ख़ने आर ऊख़ा ती बिल्‍ली तरा किर्रा ओंगोर, अरा सैतान ही अदिया ती धर्मेस तरा किर्रा ओंगोर। फिन आर पाप गुट्ठी ही छमा ख़क्‍खा ओंगोर अरा एंग्‍है म‍इय्याँ ता पत्त'अना ती नेम्‍हा मन्रका आलर गने अड्डा ख़क्‍खा ओंगोर।’

त‍इरकर 26:18 ပူးပေါင်းရင်းမြစ်များ

मत्तायोस 4:10

ख़ने येसुस अदिन बाचस, “अनय सैतान कगरार'अय कलय! एन्‍देरगेका नेम्हा पुथी नू लिख्रकी र'ई, ‘नीन निंग्‍है धर्मे उर्बासिन ऒड़ लक्‍के अरा आसी लेका महबा ननके।’”

मत्तायोस 4:16

पाप ही ऊख़ा नू र'ऊ आलर नाड़रना ही ओन्‍टा कोहाँ बिल्‍ली ऎरोर। अरा खे'अना ही एलचना नू अरा ऊख़ा राजी नू र'ऊ आलर मइय्याँ रिझ्रना ही बिल्‍ली बिल्‍चो।”

लू‍कस 1:77

नीन आसी आलर गे तम्‍‍है पाप छमा मन्ना ती नाड़रना ही लूर चि'ओय।

लू‍कस 1:79

ऊख़ा नू उज्‍जुरिन अरा खे'अना ही एलचना नू र'उरिन बिल्‍ली ऎद'आ गे अरा नम्‍है कोड़े ही डहरे नू ऎकत'आ गे आस बर'ओस।”

लू‍कस 2:32

ईस नन-यहूदीर गे धर्मेसिन दहदर नन्ना ही बिल्‍ली अरा निंग्‍है निज आलर इस्राऎल गे महबा आबोन ओन्‍द्र'ओस।”

लू‍कस 24:45

ख़ने आस धर्मेसी पुथिन बुझ्र'आ गे आर ही जियन कुल्‍लियस।

लू‍कस 24:47

अरा येरुसलॆम ती ऒड़ मनरकी जम्मा राजी नू आसी नामे नू जियन किर्त'अना दरा पाप छमा गे तेंगा कुद्दना मनो।

लू‍कस 4:18

“उर्बासी बॊलता एंग्‍है म‍इय्याँ र'ई, इदगे का आस एंगन कीड़र गे दौ कत्‍था मेन्‍त'आ गे चज्जिकादस। अरा आस एंगन हॆंरकारिन बछरनन तेंगा गे, अरा अन्‍धारिन ऎरत'आ गे, अरा ओर्मा तिरख़रकारिन छोड़ाब'आ गे,

यॊहनस 17:17

नीन आरिन निंग्‍है मानी ती निमा गे नेम्‍हा कम'आ, निंग्‍है कत्‍था दिम मानिम हवे।

यॊहनस 3:19

आर गे दंडे ही नेंव‍ई ही चड्डे ईद दिम का, बिल्‍ली ख़ॆख़ेल नू बरचा, लिकिन आलर बिल्‍ली ती कोड़हे ऊख़न पत्तारर, एन्‍देरगेका आर ही नलख गुट्ठी मलदौ रहचा।

यॊहनस 4:10

येसुस अदिन आनाकिर्ताचस, “धर्मेसी चि'अना इनामन अरा नॆ निंगन ‘एंगा ओना गे अम्मु चि'ई’ एन्ने ब'अदस, अदिन नीन अक्‍का होले, नीनिम एंग्‍है गुसते अम्मु ने'ओय दने। अरा ऎन निंगा गे उज्‍जना चि'ऊ अम्‍मन चिच्का र'ओन दने।”

यॊहनस 4:14

लिकिन नॆ एंग्‍है चि'अना अम्मन ओन्‍दस आस फेन इकला हूँ ओनक'आ मल सार'ओस। एका अम्मन आस गे ऎन चि'अदन, आद आस नू ओन्‍टा पझरा फुटना ती जनमजुग उज्‍जनन चि'ओ।”

यॊहनस 8:12

तहाँ येसुस अउरिम आलर गने कछनख्र'आ हेलरस, अरा बाचस, “ऎन ख़ॆख़ेल ही बिल्‍ली हिकदन। एकास एंग्‍है गने चॊंख़्रदस आस इकला हूँ ऊख़ा नू मल र'ओर, लिकिन आस उज्‍जना चि'ऊ बिल्‍लिन ख़क्‍खोस।”

यॊहनस 9:39

तहाँ येसुस बाचस, “नेंवई गे ऎन ख़ॆख़ेल नू बरचकन। ख़ने नॆ अन्धहा र'अनर आर ऎरोर, अरा नॆ तमन ऎम ऎरदम एन्ने सोचनर, आर अन्धहा बार'ओर।”

यॊहनस 9:5

ऎन ख़ॆख़ेल नू र'अना बारी ऎन ख़ॆख़ेल ही आलर गे बिल्‍ली र'अदन।”

त‍इरकर 10:43

आसी पत्त नू उर्मी धर्मेसी कत्‍था तिंगुर गोवाह चि'अनर का नॆ आसिन पत्त'ओर आर गे आसी नामे ती पाप छमा ख़क्‍खोर।”

त‍इरकर 13:47

औंगे उर्बस एमन एन्ने बाचस ती पॆसकादस, ‘ऎन निमन नन-यहूदीर गे बिल्‍ली कमचकादन, एकत्रु निम्‍है ती बछरना ही दौ कत्‍था ख़ॆख़ेल ही ठुट्ठु गूटी बिंड़र'ओ क'ओ।’”

त‍इरकर 15:9

अरा आस आर ही जियन पत्त'अना ती नेम्‍हा नंजस अरा नम्‍है नू अरा आर नू एन्‍देर हूँ फरक म‍ल नंजस।

त‍इरकर 2:38

पतरस आरिन बाचस, “नीम जियन किर्त'आ, अरा नीम ओर्मा आलर निम्‍है पाप गुट्ठी ही छमा गे येसु मसीसी नामे ती नॊड़र'आ। होले नीम इनाम नू नेम्‍हा बॊलतासिन ख़क्‍खोर।

त‍इरकर 20:21

अरा यहूदी अरा नन-यहूदी आलारिन चेताबचकन का आर जियन किर्त'अना र'ई अरा नम्‍है उर्बस येसु मसीसिन पत्त'अना चांड़ र'ई।

त‍इरकर 20:32

अक्‍कु ऎन निमन धर्मेस गे अरा आसी मया ही कत्‍था नू अम्‍बदन, आद निमन परद'आ उंगी, अरा धर्मेस नेम्‍हा मंजका उर्मी आलर नू मेस्र'अरकी आसीस चि'आ उंगी।

त‍इरकर 26:19

इदगे बॆलायो अग्रिप्‍पा, ऎन आ मेर्ख़ा ता देखार आबोन पॆस्रकन।

त‍इरकर 26:23

मसीस दुक्‍खे भोग'ओस अरा केचका मधेर ती उर्मी ती मुन्‍द उज्‍जा चो'ओस ती यहूदीरिन अरा नन-यहूदीरिन हूँ धर्मेसी बिल्‍लीन ओन्‍द्र'ओस।”

त‍इरकर 3:19

औंगे नीम जियन किर्त'आ, होले धर्मेस निम्‍है उर्मी पापन छमा ननोस।

त‍इरकर 5:31

धर्मेस दिम आसिन उर्बस अरा बछाब'ऊ नंजस ती तंग्‍है तीना चोक्‍ख म‍ईन ही अड्डन चिच्‍चस, एकत्रु का आस इस्राऎल आलर गे जिया किर्त'अना अरा पाप छमा चि'ओस।

रोमी 8:17

अरा नाम धर्मेसी ख़द्द-ख़र्रा होले नाम आसी पुंजी हूँ हिकदत। अरा मसीस गने धर्मेसी ख़क्ख्र'ऊ म‍ईन आबोन ख़क्ख'ऊ पुंजी हिकदत। नाम गा मसीस गने दुक्‍खे चॊददत होले मसीस गे ख़क्ख्रना आ म‍ईन नू हूँ आसी गने र'ओत।

1 कोरिन्‍थ 1:2

कोरिन्‍थ नगरे नू मसी येसुस नू नेम्‍हा मन्तारका अरा नेम्‍हा मना गे मॆख़्रका धर्मेसी कलीसिया गे अरा नमा अरा आर ही उर्बस नम्‍है येसु मसीसी नामेन उर्मी अड्डा नू ऒड़ ननू ओर्मर गे ऎम लिखदम।

1 कोरिन्‍थ 1:30

आसी तिम नीम मसी येसुस नू र'अदर। मसीस दिम नमा गे धर्मेस तरती बरचका लूर। आस दिम नमन धर्मेस गने उजगो कमदस, अरा आस नमन नेम्‍हा कमदस, अरा आस नमन पाप ती अम्‍बत'अदस।

2 कोरिन्‍थ 4:4

ई सौंसार ही देंवता मल पत्त'ऊ आलर ही जियन अन्धहा नंजकी चिच्‍चकी र'ई। औंगेम आर मसीस नॆ धर्मेसी रूप हिकदस आसी महबा ही दौ कत्‍था ही बिल्‍चिनन ऎरा गे पोलनर।

2 कोरिन्‍थ 4:6

“ऊख़ा ती बिल्‍ली बिल्चन नेकअन” एन्ने बाचका धर्मेस तंग्है बिल्लिन एम्‍है जिया नू बिल्‍चताचस चिच्चस। येसु मसीस नू र'ई आ धर्मेसी महबा ही लूर ही बिल्लिन एमा चि'आ गे धर्मेस इदन नंजस।

2 कोरिन्‍थ 6:14

मल पत्त'उर गने अमा पुन्दर'आ। उजगो अरा नॆग मलका ही एन्‍देर मेसर-नखरना? बिल्‍ली ही ऊख़ा गने एन्‍देर संगे-लोंगे?

गलातिया 2:20

ऎन मसीस गने क्रुस नू ठोकरकादन, अक्‍कु ऎन मल्‍ला उज्‍जना, लिकिन मसीस एंग्‍है नू उज्‍जा लगदस। अक्‍कु ऎन एंग्‍है कया नू उज्‍जा लगदन होले धर्मेसी तंग्‍दस येसु मसीस नू पत्त'अना ती उज्‍जा लगदन, एकास एंगन चोन्‍हा नंजस अरा एंगा गे तंग्‍है उज्‍जनन चिच्‍चस।

गलातिया 3:14

ईद इदगे मंजा का मसी येसुस ती अब्राहमसी आसीस नन-यहूदीर गे हूँ ख़क्‍ख्र'आ गे आस नमन नाड़ियस। अरा नम्‍है पत्त'अना ती ई बॊलतस नमा ख़क्‍‍ख्र'आ ओंग्‍दस एकासी पत्त नू गच्‍छरकी रहचा।

गलातिया 3:2

ऎन निम्‍है ती ओन्‍टा कत्‍था ही पत्त नू अख़'आ बेद्ददन का एकासे नेम्‍हा बॊलतासिन नीम इंझ्रकर? मूसासी नॆगन नन्ना ती निमा गे बॊलतस ख़क्‍ख्रस का महले नीम मेंजका येसु मसीसी दौ कत्‍थन पत्त'अना ती ख़क्‍खरस का?

इफेसुस 1:11

तंग्है उर्मी चिताबुतन तंग्है मने ही लेक्खा पूरा ननू धर्मेसी चिताबुता ही लेक्खम नाम मुन्द दिम ठंचका ती मसीस नू चजका र'अदत।

इफेसुस 1:14

नाम नॆ धर्मेसी अर्ज'अना हिकदत, नाड़रनन ख़क्खना गूटी धर्मेस तंग्है आलर तंग्है गच्छरकन ख़क्ख्रना गे नेम्हा बॊलतस दिम बयाना र'अस, का आसी महबा गे ओहमा मनन।

इफेसुस 1:18

ऎन गोहरारदन का आस निमा जिया गे बिल्‍ली चि'अदस नेकअन। अत्रु तिम आस निम्है मॆख़ना ही असरा आबोन नीम अख़'आ ओंगोर, अरा तंग्है नेम्हा आलर गे मंजका आसीस ही महबा ही खुर्जी आबोन नीम अख़'ओर चि'ओर।

इफेसुस 1:7

मसीस नू आस बाहताचका ख़ॆंस ती नमा गे नाड़रना र'ई। ईद नम्है अक्‍का-बलका गुट्ठी गे धर्मेसी मया ही निंदका ती ख़क्ख्रना पाप छमा हवे।

इफेसुस 2:8

मसीस मइय्याँ ता पत्त'अना ती धर्मेसी सोग्‍गे ती नीम नाड़रदर। ईद निम्‍है चिहुट ती मल्‍ला मंजका, लिकिन ईद धर्मेसी इनाम हवे।

इफेसुस 4:18

आर मानिम कत्थन बुझुरना नू पैहा र'अनर, अरा आर धर्मेसी चि'अना उज्‍जना ती छिन्‍डरका केरका ती उज्जनर। ईद तम्है जिया बेड़हा चड्डे मंजका आर ही लूर मलका ती मंजा।

इफेसुस 5:11

अरा ऊख़ा ही ख़ंजपा मलका नलख गुट्ठी नू अमा मेस्र'आ, लिकिन आलर गे ऎद'आ का अबड़ा नलख गुट्ठी मलदौ हवे।

इफेसुस 5:14

एन्देरगेका बिल्ली दिम उर्मिन ईद'ई चि'ई। ई चड्डेम एन्ने लिख्रकी र'ई का, “अना ख़न्‍द्र'ऊ, एज्र'आ, केचकार ती उज्‍जा चो'आ, होले मसीस निंग्‍है मइय्याँ बिल्‍चोस।”

इफेसुस 5:8

एन्देरगेका मुन्द नीम ऊख़ा रहचकर, लिकिन अक्‍कु नीम उर्बासी र'अना ती बिल्‍ली र'अदर। औंगे बिल्‍लिन ता ख़द्दर लेक्‍खा ऎका।

इफेसुस 6:12

एन्‍देरगेका नम्‍है ई अरबानख्रना ख़ॆंस अरा अहड़ा ती लेका मला। ईद मलदौ राजी ननुर गे, अरा मल ऎथरना सौंसे ही अदिया गुट्ठी गे, अरा ई ख़ॆख़ेल ही ऊख़ा ही कोड़हे सवंग गुट्ठी गे, अरा ताका ही राजी ता मलदौ बॊलता गुट्ठी गे बिड़दो नू र'ई।

2 तीमोथियुस 2:26

होले आर सैतान ही फंदा ती बछर'अरकी तम्‍है मानी लूर नू किर्रोर, एकदा तंग्‍है मने बेसे नना गे आरिन धरचकी उइय्‍की रहचा।

इब्रानी 10:10

ई लेक्‍खम आसी मने ती नाम येसु मसीसी मॆद ही उनीम हॆल दाँड़े मन्ना ती नेम्‍हा मन्‍तारका र'अदत।

इब्रानी 10:14

औंगे आस उनिम दाँड़े ती नेम्‍हा मनू आलारिन जनमजुग गे पखड़ नंजस।

इब्रानी 11:6

बिगर पत्त'अना ती धर्मेसिन नॆ हूँ इकला हूँ रिझ्रत'आ पोल्‍लोर। एन्‍देरगेका धर्मेस गुसन बरना आलर पत्त'अना र'ई का धर्मेस र'अस अरा आस तंगन बिद्दू आलर गे इनाम चि'ओस।

इब्रानी 9:15

मसीस दिम पुना गच्‍छरना ही धर्मेस अरा आलर ही मझी आलस र'अस, औंगे धर्मेस ती मॆख़्रका आलर ओर्मर आसी गच्‍छरका जनमजुग आसीस आबोन ख़क्‍खा ओंगनर। एन्‍देरगेका आलर मुन्‍द ता गच्‍छरना ही बेड़ा नू नंजका पाप गुट्ठी ती आरिन अम्‍बत'आ गे मसीस केच्‍चस।

याकॊब 2:5

अना एंग्‍है चोन्‍हा भईरो, मेना, एन्‍देर धर्मेस ई ख़ॆख़ेल ता कीड़ा आलारिन पत्त'अना नू उरुब मना गे, अरा तंग्है मइय्याँ चोन्हा ननुर गे तान गच्छरका राजी ही अदिया मना गे मल्ला चज्जिका का?

1 पतरस 1:4

इदही गने धर्मेस निमा गे ओन्टा कोड़हे आसीसन मेर्ख़ा नू उइय्कादस। आद इकला हूँ मल नठार'ई अरा सोतरा मल मनी अरा मल चड़मी।

1 पतरस 2:25

मानिम नू मुन्द नीम बेहड़ारका भेंडो लेक्‍खा रहचकर, लिकिन अक्‍कु निम्‍‍है जिया गुट्ठी ही ख़ापुस अरा ईरु-ख़ूजुस मसीस गुसन किर्रका बरचका र'अदर।

1 पतरस 2:9

लिकिन नीम गा ओन्टा चज्‍जिका जंईपुंई, अरा ओन्टा बॆल नैग ख़ोंड़हा, अरा ओन्टा नेम्‍हा जाती, अरा धर्मेसी तंग्‍है आलर हिकदर। नॆ निमन ऊख़ा ती ओथ्रस ती तंग्है अजगुत लौकारना बिल्‍ली नू मीख़ियस ओन्द्रस, आसी कोहाँ नलख गुट्ठिन आलर गे तेंगा गेम नीम एन्ने मन्रकादर।

1 यॊहन 1:9

लिकिन नाम नम्है पाप गुट्ठिन आसिन तेंग्र'ओत होले, आस नम्है पाप गुट्ठिन छमा नना गे, अरा नमन नम्है उर्मी मलदौ ती निमन नना गे पत्त'अना जॊगे अरा पूरेम दौले र'अस।

1 यॊहन 2:12

अना चोन्हा ख़द्दारो, येसुसी नामे ती निम्है पाप गुट्ठी छमा मन्तारका ती ऎन निमा लिखदन।

1 यॊहन 3:8

एका ओर्तस पाप नन्तेम र'अदस, आस नाद ही आलस र'अदस, एन्देरगेका नाद गा ऒड़ तिम पाप नन्तेम र'ई। लिकिन धर्मेसी ख़द्दस नाद ही नलख गुट्ठिन नठाब'आ गेम दहदर मंजस।

1 यॊहन 5:19

नाम अख़दत का, नाम धर्मेसी हिकदत, अरा सौंसार ता उर्मी मलदौ आलर मलदौ आबोन नन्त'ऊ सैतान ही तबे नू र'अनर।

यहूदा 1:1

येसु मसीसी जॊंख़ अरा याकॊबसी भईस ऎन यहूदा, धर्मे बंगासी दुलार अरा येसु मसीसी ख़ापना नू र'ऊ धर्मेस ती मॆख़्रका आलर गे ई चिठिन लिखदन।

दहदर मंजका कत्‍था 21:27

अरा अइय्या एकअम सोतबोड़'आ आलॊ मल कोर'ओ, अरा घिनघिना नलख ननू आलर अरा ठकवा कत्‍था कम'ऊ आलर अइय्या मल कोर'ओर। लिकिन नॆख'आ नामे भेंडो ख़द्दासी उज्‍जना ही पुथी नू लिख्रकी र'ई, आर लेका आ नगरे नू कोर'ओर।