2 कोरिन्‍थ 11:3 - पुना गच्छरना NT (BSI)

³ लिकिन ऎन एल्‍चदन का एकासे नेर्रद तंग्‍है चतरा ती हवा आबोन भुरियाचा, अन्नेम निम्‍है जिया नू मसीस गे र'अना मानिमन ती अरा मानिम भगती ती नीम बेहड़ार'ओर दने।

2 कोरिन्‍थ 11:3 ပူးပေါင်းရင်းမြစ်များ

मत्तायोस 24:24

एन्‍देरगेका जोक्‍कोर फसक‍ट'ओर ती ‘ऎन मसी हिकदन’ ब'ओर अरा जोक्‍कोर फसकट'ओर ती ‘ऎन धर्मेसी कत्‍था तिंगुस’ ब'ओर। अरा बेड़ाब'आ गे आर कोड़हे चिन्हा अरा अजगुत नलख गुट्ठिन ऎद'ओर, मना ओंगो होले धर्मेसी चज्‍जरका आलारिन हूँ बेड़ाब'ओर चि'ओर।

यॊहनस 8:44

नीम निम्‍है बंगस सैतान ही र'अदर। अरा निम्‍है बंगासी मने गुट्ठिन पूरा नना बेद्ददर। आस गा ऒरे तिम पिटू रहचस। आस नू मानी मलकी, औंगे मानी आस नू इज्‍जकी र'आ पोल्‍ला। आस ठक'ओ बारी आसी मानी सुबहा आबोन ऎद्ददस, एन्‍देरगेका आस ठकवा हवदस, अरा ठकना गुट्ठी ही बंगस हवदस।

रोमी 12:8

एकास गे रिझाब'अना ही ख़ंजपा र'ई, आस नन्नारिन रिझाब'अना नू बोथ्रका र'अना र'ई। अरा एकास गे दान चि'अना ही ख़ंजपा र'ई आस चि'अना नू हरकट मन्ना र'ई। एकास गे कड़हाब'अना ही ख़ंजपा र'ई आस गे अदिन मानिम गने नन्ना र'ई। एकास गे सोग्‍गे ऎदना ही ख़ंजपा र'ई, आस गे अदिन रिझ ती नन्ना र'ई।

2 कोरिन्‍थ 1:12

अक्‍कुन ऎम ख़ॆख़ेल नू अरा कोड़हे गा निम्‍है गने ता नता नू, धर्मेस चिच्का नेम्‍हा अरा मानिम गने ईक्‍कम, इदगे दिम ऎम फुल‍ई मन्‍दम। इदगे एम्‍है लखना गोवाह चि'ई। ऎम अदन ख़ॆख़ेल ता लूर ती मला, धर्मेसी मया तिम नंजकम।

2 कोरिन्‍थ 11:20

एन्‍देरगेका नीकईम निमन बिट्ठी ननू जॊंख़ कम'आ बेद्ददस, अरा नीकईम निमन नुलख़दस, अरा नीकईम निम्है ओदहा ती अपन नफा हो'अदस, अरा नीकईम तंगन कोहाँ नन्दस, अरा नीकईम निमन चटक'अदस, होले हूँ नीम अबड़ारिन रिझ गने सहदर।

2 कोरिन्‍थ 11:29

नन्नर पयहा र'अनर ख़ने, ऎन हूँ पयहा र'अदन। नन्नर पाप नू मूड़नर ख़ने, एंग्‍हा जिया कैर ती ऊली।

2 कोरिन्‍थ 2:17

बग्‍गेर तम्‍है नफा गे धर्मेसी कत्‍था नू मेसाब'अनर, लिकिन ऎम अबड़ा आलर लेक्‍खा मलकम। ऎम गा धर्मेस ती तइरका आलर लेक्‍खा धर्मेसी मुन्‍दहारे मसीसी सवंग गने मानिम गने कत्‍थन तेंगा कुद्दम।

2 कोरिन्‍थ 4:2

अरा ऎम लज्‍जे ही नुड़ना लेक्खा नलख गुट्ठी मल नन्दम, अरा ऎम कसरहा मल नन्दम, अरा ऎम धर्मेसी कत्‍थन मल बदल'अदम। अन्‍ति मानिमन दहदहर'आ तेंगा कुद्दम ती धर्मेसी मुन्दहारे ओर्त ओर्त आलासी लखना नू ऎम उजगो आलम एन्ने ऎद्ददम चि'अदम।

गलातिया 1:6

धर्मेस मसीसी मया ती निमन मीख़ियस। एंगा हैकट मंजा का एन्ने चाँड़हे नीम आसिन अम्‍बकर ती नीम नन्‍ना रकम ही दौ कत्‍थन मेंजकर ती किर्रा लगदर।

गलातिया 2:4

ऎम इबड़ा कत्‍थन इदगे तिंकम का जोक्को ठकवा पत्त'ऊ भईर कलेकसे नम्है मझी नू कोरचकाचर अरा आर मसी येसुस नू नमा ख़क्‍ख्रकी र'ई आ छछिन्‍द आबोन हो'आ गे अरा अत्रु ती नमन मूसासी नॆग ही जॊंख़ कम'आ गे अन्‍थन जॊहना लेक्‍खा बरचका रहचर।

गलातिया 3:1

अना बोया गलातिया ता आलारो! नॆ निमन नस्‍सा? येसु मसीसिन क्रुस नू ठोकचर अदिन निम्‍है ख़न्न ही मुन्‍दहारे ऎदका रहचा।

गलातिया 4:11

एंगा निम्‍है पत्त नू इल्‍चिक'आ मनी। एन्ने अम्‍बो मना का निम्‍है मझी नू एंग्‍है अर्जाचका सिथिया मनो।

इफेसुस 4:14

होले नाम अक्कु ती खद्दत लेक्खा मल र'ओत, अरा ताका अरा लहरा ती अत्र इत्र मन्ना बेसे नाम आलर ही कसरहा अरा लबरा ती चत्रा चाल ही पुना पुना सिखाब'अना ती अत्र इत्र मल मनोत।

इफेसुस 4:22

औंगे नीम निम्है पच्चा उज्‍जना ओक्‍कनन अरा पच्चा आल सुबहन एकदा घुरिय'अना सुख-सौंरत चड्डे बगड़ारनुम काला लगी, अदन अम्बा चि'आ।

इफेसुस 6:24

नॆ नम्‍है उर्बस येसु मसीसिन मल मुंज्रना चोन्‍हा ती चोन्हा नन्नर, आर ओर्मर मइय्याँ धर्मेसी मया मनन नेकअन।

कोलोस्से 2:18

नॆ हूँ निमन ठकना लुदऊ नू अरा मेर्ख़ा पैकारिन ओहमा मन्ना नू मन्दस ती नीम निम्है इनाम आबोन मल ख़क्खना ही जॊगे मना गे अड्डा अमा चि'आ। ई लेक्खा आलस तंग्है ईरका देखार ही पत्त नू बग्गे बुझुरत'अदस। बॊलता ही सुबहा मलका आसी जिया अनभनियाँ सोच ती फुलई मनी।

कोलोस्से 2:4

इदन ऎन निमन इदगे तेंगदन का नीकईम निमन लहर'अना कत्‍था गुट्ठी ती अम्‍बोर ठग'आ।

कोलोस्से 2:8

चिहुंक र'आ का नीकईम निमन अनभनियाँ अरा ठगना तत्व लूर ती अम्‍बोर फफड़'आ हो'आ, एकदा पुरखौती अरा ख़ॆख़ेल ता बॊलता गुट्ठी ही सवंग ता सिखाब'अना लेक्‍खा गा र'ई, लिकिन मसीसी लेक्‍खा मलकी।

1 थेस्‍सलोनिकॆयर 3:5

औंगे एंग्‍है नू कयास मल मंजा ख़ने, निम्‍है पत्त'अना ही पत्त नू अख़'आ गे तीमोथियुसिन तइय्कन। इदगेका बिढ़'उस इन्द्रिइम कत्‍था नू बिढ़'ओस अइय्या खत्र'ओर होले, एम्‍है अर्ज'अना अनभनियाँ मनो ई चड्डे ऎन इल्‍चिकन।

1 तीमोथियुस 1:3

ऎन मकेदोनिया जिला कालो बारी निंगन आनकाचकन, अन्नेम नीन इफेसुस नगरे नू ओकर'आ। अइय्या जोक्‍क आलर बिड़दो सिखाब'आलनर, आरिन अक्‍कु ती एन्ने अमा सिखाब‍आ गे आना।

1 तीमोथियुस 2:14

अरा आदमस सैतान ती मल्‍ला ठकरका, मुक्‍का गा ठकरा ती पपही मंजा।

2 तीमोथियुस 3:13

लिकिन मलदौ आलर अरा भुरिंयु आलर दगा चि'अनुम अरा दगा मूख़नुम बगड़ारते किर्रिमबि'ओर।

तीतुस 1:10

एन्‍देरगेका नगदे आलर मल गदन‍'ऊ अरा अन्‍भनियाँ कछनख्र‍'ऊ अरा ठक‍'ऊ र'अनर। कोड़हे गा नाड़र'आ गे खतना ही चाड़ र'ई ब'ऊ आलर एन्ने र'अनर।

इब्रानी 13:9

कैनो रकम ही नन्ना नन्ना सिखाब'अना ती अमा बेहड़ार'आ। अरा चाल ही ओन्ना-मॊख़ना गुट्ठी ती मला धर्मेसी मया ती नम्‍है जिया बड़ियर मन्ना बॆस हवे। ई चाल ही ओन्ना-मॊख़ना गुट्ठिन मूख़ू आलर गे अबड़ा ती एन्‍द्रा हूँ फयदा मल्‍ला।

2 पतरस 3:17

औंगे अना चोन्हा आलारो, मुन्द तिम नीम इदन अख़ना ती, चिहुंक र'आ। एन्ने अम्बो मना का, अबड़ा नॆग मलका आलर ही मलदौ नू बझ्रर'अरकी निम्है ठिमठिमने दसा ती अम्बोर खतर'आ।

2 पतरस 3:3

उर्मी ती मुन्द नीम इदन अख़'आ गे बेद्ददन का, छेद्द उल्ला गुट्ठी नू निंदा ननरकी अलखू आलर बर'ओर, आर मानी आबोन निंदा ननरकी अलख़ोर अरा तम्है तम्है मलदौ चिबाख़ारना नू ऎकोर।

1 यॊहन 2:18

अना ख़द्दारो, ईद छेद्द उल्ला हवे। नीम मेंजकादर का ठकवा मसीस बर'आ लगदस। अक्कु गूटी कैनो ठकवा मसीर चॊचकानर। इत्रु ती नाम अख़दत का छेद्दे बेड़ा अंड़सा ख़च्चकी र'ई।

1 यॊहन 4:1

अना दुलारो, ई सौंसार नू नगदे बग्गे ठकवा धर्मेसी कत्था तिंगुर चॊचका र'अनर। औंगे नेम्हा बॊलतस ती ब'अदन ब'ऊ उर्मी आलारिन अमा पत्त'आ। लिकिन बिढ़'आ ती ऎरा का अबड़ा बॊलता गुट्ठी धर्मेस ती बरचका का मल्ली।

यहूदा 1:4

ऎन इदगेम एन्ने लिखदन का जोक्क ठकवा सिखाब'उर निम्है मझी नू कलेकसे कोरचका र'अनर। आर धर्मेसिन नटनर। आर नम्है धर्मेसी मया आबोन मलदौ उज्जना ऎकना ही ओदहा नू बदलनर। आर नम्है ओन्टे लेका उर्बस येसु मसीसिन नटनर। आर ही नठारना चिरान नुम नेम्हा पुथी नू लिखिर ख़च्चकी र'ई।

दहदर मंजका कत्‍था 12:15

ख़ने आ नेर्रे आ आली ही ख़ॊख़ा तंग्है बई ती ख़ाड़ लेक्‍खा अम्मु तइय्या का आ आली बहड़ी नू बोहार'ओ क'ओ।

दहदर मंजका कत्‍था 12:9

अरा आ नगदे कोहाँ डेना र'ऊ नेर्रे किइय्या हेबड़तारा। ईदिम गोट्‌टा ख़ॆख़लन ठक'ऊ नाद अरा सैतान बारना पच्चा नेर्रे हवे। आद ख़ॆख़ेल नू हेबड़तारा अरा अदही उर्मी पैकर हूँ अदही गनेम ख़ॆख़ेल नू हेबड़तारर।

दहदर मंजका कत्‍था 20:2

आस आ नगदे कोहाँ डेना र'ऊ नेर्रेन धरचस। ईदिम नाद अरा सैतान बारना आ पच्चा नेर्रे हवे। अरा आस अदन ओन हजार बछर गे हॆंचस।