3 ऎम ई सौंसार नू उज्जदम, लिकिन सौंसार ता आलर लेक्खा चॆत मल नन्दम।
इकला नाम नम्है पाप सुबहा ही तबे नू रहचकत ख़ने पाप ही चिबाख़ारना नम्है नू नलख नंजा। अरा एमा ई पाप ही चिबाख़ारना पॆसका ही सवंग ती एमा गे खे'अना ही ख़ंजपा ओन्द्र'आ लगिया।
नीम गा पाप मॆद सुबहा ही लेक्खा उज्जोर होले केच्च ख़च्चोर। लिकिन नीम नेम्हा बॊलतासी सवंग ती पाप मॆद सुबहा ही नलखन मल ननोर होले नीम मानिम उज्जनन ख़क्ख'ओर।
धर्मेस इदिन इदगे नंजस का पॆसका नम्है एकासे उज्जनन बिद्दी अन्ने नाम उज्जा ओंग्दत। अक्कु नाम मॆद ही सुबहा लेक्खा मलकी लिकिन बॊलतासी मने लेक्खा उज्जदत।
ऎन मल बरचका ती नीम एन्देर सोचदर? एन्देर ऎन इदन चिताबुता नन्ना बारी सेब्बा ती नंजकन का? महले ओन घड़ी नू “हाँ हाँ” एन्ने, अरा “मला मला” एन्ने ब'अना लेक्खा ऎन सौंसार आलर लेक्खा चिताबुता नन्दन का?
एम्है चॆत ही कमहड़ गुट्ठी सौंसार ता आलर बउर'अना कमहड़ गुट्ठी मल्ली, लिकिन गढ़ें गुट्ठिन धंस'ऊ धर्मेसी सवंगिय कमहड़ आबोन बउर'अदम।
ऎन मसीस गने क्रुस नू ठोकरकादन, अक्कु ऎन मल्ला उज्जना, लिकिन मसीस एंग्है नू उज्जा लगदस। अक्कु ऎन एंग्है कया नू उज्जा लगदन होले धर्मेसी तंग्दस येसु मसीस नू पत्त'अना ती उज्जा लगदन, एकास एंगन चोन्हा नंजस अरा एंगा गे तंग्है उज्जनन चिच्चस।
अना तीमोथियुस एंग्है ख़द्द, मुन्द निंग्है पत्त नू तिंका धर्मेसी कत्था लेक्खा ऎन निंगन तिगाब'अदन। नीन इदिन सुरता नना अरा इदिन पॆस्र'आ ती बॆस लगे नना, एकासे बॆस सैनस तंग्है लड़ाइन लड़दस।
ऎन पत्त'अना ही दौ लड़ाई आबोन लड़चकन। एंग्है बोंगनन ऎन बोंगकन मुंजकन। ऎन पत्त'अनन मल अम्बकन।
औंगे ई लेक्खा नगदे बग्गे पत्त'अना ती उज्जका आलर ही पत्त ता गोवाह गुट्ठी कोहाँ बदाली बेसे नम्है ओनबेंड़र'आ र'ई। होले बरा, नाम छिक'ऊ उर्मी आलॊ गुट्ठिन अरा लॆम अड़झ'अना पाप गुट्ठिन अम्बोत ती धर्मेस नमा गे उइय्कादस आ बोंगना नू सहना ती चिहुट नन्ते बोंगदत नेकअन।