8 चिहुंक र'आ, अरा एज्रका र'आ। निम्है कोहाँ बैरी नाद मुर्ना लकड़ा लेक्खा इदिन बेद्दा कुद्दी का नॆकन चर्रोन मॊख़ोन।
अरा बैरी नॆ लट्टी बिहनिन चाँख़स आस सैतान हवे, अरा ख़ोयना ख़ॆख़ेल ही मुंज्रना हवे, अरा ख़ूयुर मेर्ख़ा पैकर हिकनर।
औंगे एज्रका र'आ, एन्देरगेका नीम बलदर का निम्है उर्बस एका उल्ला बर'ओस।
आ बारी ऎन बॆलन डेब्बा पक्खे ता आलारिन ब'ओन, ‘अना सरपारका आलारो, एंग्है मुन्द ती आ मल तेभ्रना चिच्ची नू किर्रिम बि'आ, एकदा नाद अरा अदही पैकर गे सपड़ाचका र'ई।
तहाँ धर्मेसी बॊलतस येसुसिन नाद ती बिढ़्र'आ गे टोड़ंग तरा कड़हाबाचस।
ख़ने नाद आसिन अम्बिया ती केरा अरा मेर्ख़ा पैकर बरचर ती आसिन तेतर-सुसर नंजर।
बिहनी खत्रका डहरे लेक्खा जोक्क आलर हिकनर। आर कत्थन मेन्नर, लिकिन लॆम सैतान बर'अरकी आर ही मेंजका कत्थन मॊधर'आ गे ननी।
नीम चिहुंक ननके। ख़ॆख़ेल ता ओन्ना-मॊख़ना ही चिबाख़ारना अरा उंखना अरा ख़ॆख़ेल ही जिनिस ता फिकर ती निम्है जिया अम्बन बेहड़ार'आ का आ उल्ला निमा गे अचका ही अंड़सा ख़च्चो।
औंगे उर्मी बेड़ा एज्रका र'आ। अरा गोहरार'आ का बर'ऊ अबड़ा जम्मा खिलपत ती बछर'आ गे सवंग अरा मनवा ख़द्दन एंग्हा मुन्दहारे इजना जॊगे मन्दर नेकअन।”
फिन उर्बस बाचस, “सिमॊन हे सिमॊन, सैतान निमन निम्है पत्त'अनन गहूँ जब्बना बेसे निंग्है पत्त'अनन बिढ़'आ गे धर्मेस ती नीचकी होच्चकी र'ई।
नीम निम्है बंगस सैतान ही र'अदर। अरा निम्है बंगासी मने गुट्ठिन पूरा नना बेद्ददर। आस गा ऒरे तिम पिटू रहचस। आस नू मानी मलकी, औंगे मानी आस नू इज्जकी र'आ पोल्ला। आस ठक'ओ बारी आसी मानी सुबहा आबोन ऎद्ददस, एन्देरगेका आस ठकवा हवदस, अरा ठकना गुट्ठी ही बंगस हवदस।
सैतान नमन अम्बो बगड़'आ गे अन्ने नंजकन। एन्देरगेका नाम आसी चाल गुट्ठिन बलना लेक्खा मल्ला।
अरा इत्रु ती नाद गे ठग'आ गे मोका अमा चि'आ।
नीम नाद ही फंदा गुट्ठी ही हुरभेटा नना गे धर्मेसी उर्मी कमहड़ आबोन अत्ता।
अन्नु हों मुक्कर पत्त'अना, चोन्हा अरा नेम्हा नू बड़ियर मन्नुम र'ओर होले, आर ख़द्द पाकना चड्डे नाड़र'ओर।
अन्नेम मुक्कर इल्चका लज्जे ती दौ गने दौले अत्तरकुन्दर'अर सिंगरारनर नेकअन। चुट्टी बिनयारना अरा सोना मोती गुट्ठी अरा बग्गे दामी किचरी गुट्ठी ती सिंगरारना मला।
एन्नेम आर ही मुक्कर हूँ मईन ही जॊगे र'अना र'ई। अरा आर दुस'ऊ अम्बोर र'आ। अरा आर चिहुंक अरा उर्मी कत्था नू पत्त'ऊ मन्नर नेकअन।
औंगे कलीसिया ही ईरु-ख़ूजू मुद्धासी उज्जना बिज्जना उजगो मन्ना र'ई। अरा आस ओन्टे लेका मुक्का उइय्युस अरा चिहुंक, अरा मईन जॊगे आल, अरा पाही ईरू अरा सिखाब'आ ऊंगू र'अना र'ई।
लिकिन उर्बस एंग्है गने रहचस ती एंगा सवंग चिच्चस। होले ऎन दौ कत्था बॆस लगे तेंगा ऊंग्कन, अरा नॆ यहूदी मलनर आर हूँ एंग्है ती अदिन मेना ऊंगियर। आस एंगन पिटरना ती बछाबाचस।
आस गे पाही ईरू, दौ नलख बिद्दू, खतीर ननू, नियाँव ननू, नेम्हा अरा जियन जतन'ऊ र'अना र'ई।
अरा नमन तिगाब'ई का नमा बिगर महबा उज्जना अरा पाप नन्ना ही चिबाख़ारना गुट्ठी ती जियन किर्त'अना मनो। अरा नाम बगड़ारका ई परिया नू नॆत नॆग अरा मानिम नन्ना ती महबा नू उज्जना र'ई।
पचगी आलारिन सिखाब'आ का आर गे चिहुंक अरा मईन जॊगे अरा नॆत नॆग ती उज्जू मन्ना र'ई। अरा आर गे बॆस पत्त'अना अरा चोन्हा ती अरा सहेलहे ती निन्द्रका आलर र'अना र'ई।
होले पेल्लो मुक्कारिन आर तम्है मॆतर अरा ख़द्दर ती चोन्हा नना गे अंगियाब'आ ओंगनर।
एन्नेम जॊंख़ मॆतारिन हों नॆत नॆग ती उज्जा गे रिझाब'आ।
औंगे नीम निमन सौंसे जिया ती धर्मेस गे सोंप'आ चि'आ, अरा नाद गने जुझ्र'आ, अरा आद निम्है गुसले उरखो बोग्गो।
औंगे नीम अपन अपन जियन नलख नना गे सपड़'आ। अरा खतिर नन्ना ती र'आ। अरा येसु मसीसी दहदर मन्ना ही बेड़ा नू निमा ख़क्ख्रना र'ई आ मया मइय्याँ निम्है उर्मी असरा आबोन उइय्या।
उर्मी कत्था गुट्ठी ही मुंज्रना हेद्दे अंड़सकी र'ई। औंगे नीम फरी जिया ती गोहरार'आ गे निमन सम्ड़ह'आ।
इदही ख़ॊख़ा ऎन मेर्ख़ा नू ओन्टा जॊरसरिया सड़ा एन्ने ब'अना मेंजकन, “अक्कु नाड़ना अरा सवंग अरा नम्है धर्मेसी राजी अरा आसी मसीसी राजी नन्ना ही अदिया बरचकी र'ई, एन्देरगेका नम्है भई बहिनर मइय्याँ बदी ननुस नॆ उल्ला माख़ा नम्है धर्मेसी मुन्दहारे आर ही मइय्याँ बदी नना लगियस, आस किइय्या हेबड़तारस केरस।
औंगे अनय मेर्ख़ा गुट्ठी, अरा अबड़ा नू र'उरो, रिरयार'आ। लिकिन अनय ख़ॆख़ेल अरा समुदर निम्है मइय्याँ ओहरे, एन्देरगेका नाद निम्है मइय्याँ इत्तकी बरचकी र'ई। आद कोड़हे खींस ती निंदकी र'ई, एन्देरगेका आद अख़'ई का तंग्है बेड़ा अक्कुन जुक्किम र'ई।”
अरा आ नगदे कोहाँ डेना र'ऊ नेर्रे किइय्या हेबड़तारा। ईदिम गोट्टा ख़ॆख़लन ठक'ऊ नाद अरा सैतान बारना पच्चा नेर्रे हवे। आद ख़ॆख़ेल नू हेबड़तारा अरा अदही उर्मी पैकर हूँ अदही गनेम ख़ॆख़ेल नू हेबड़तारर।
अरा अबड़ा आलारिन ठकचका आ नाद गन्धक लघरना चिच्ची ही समुदर नू हेबड़तार'ओस क'ओस, एकइय्या आ मेक्खो अरा ठकवा धर्मेसी कत्था तिंगुस र'अनर। अइय्या आर उल्ला माख़ा जनमजुग कलपार'ओर।
आस आ नगदे कोहाँ डेना र'ऊ नेर्रेन धरचस। ईदिम नाद अरा सैतान बारना आ पच्चा नेर्रे हवे। अरा आस अदन ओन हजार बछर गे हॆंचस।