1 पतरस 2:12 - पुना गच्छरना NT (BSI)

¹² मल पत्त'उर ही मझी नू निम्‍है उज्‍जना ओक्‍कना बॆस र'अना र'ई। औंगे आर निमन मलदौ ननू ब'अनर ती बदी नन्नर ती हूँ, निम्‍है दौ नलख गुट्ठिन ऎरोर ती धर्मेस आलारिन नेंवई नना गे बरना उल्ला नू असिन महबा ननोर।

1 पतरस 2:12 ပူးပေါင်းရင်းမြစ်များ

मत्तायोस 10:25

चेलस गे तंग्‍है गुरुस लेक्‍खा अरा जॊंख़स तंग्‍है उर्बस लेक्‍खा मन्ना दिम कोड़हे र'ई। आर एड़पा उर्बस एंगन बॆलजेबूल बाचकानर होले, आसी एड़पातारिन एन्‍देर मल ब'ओर।

मत्तायोस 5:11

एकाबारी आलर नीम एंग्‍है गने चॊंख़्र'उर र'अना चड्डे निमन हींड़नर अरा दुक्‍खे सारत'अनर अरा दोस ठेकाबाच बाच उर्मी रकम ही मल दौ कत्था कछनख्रनर ख़ने, धर्मेस निमन आसीस ननोस।

मत्तायोस 5:16

एन्नेम निम्‍हा बिल्‍ली आलर गुसन बिलचते र'अन नेक‍अन, का आर निम्है दौ नलखन ऎरोर ती निम्‍है मेर्ख़ा ता बंगासी महबा ननोर।

मत्तायोस 9:8

इदिन ईरयर ती आलर इल्‍चियर केरर अरा धर्मेसी ओहमा नना हेलरर एकास आलर गे एन्ने आकुस चिच्कादस।

लू‍कस 1:68

“इस्राऎल ही धर्मे उर्बस गे ओहमा मनन नेकअन, एन्‍देरगेका आस तंग्‍है आलारिन नाड़ा गे बरचकादस।

लू‍कस 19:44

अरा आर निंगन अरा निंग्‍है उर्मी आलारिन नठाब'ओर, अरा निंग्‍है नू ओन्‍टा पखना म‍इय्याँ ओन्‍टा पखना र'आ गे मल चि'ओर, एन्‍देरगेका नीन निंग्‍है गुसन धर्मेस बरना ही बेड़न मल चिन्‍हचकी।”

लू‍कस 6:22

मनवा ख़द्दस चड्डे आलर निमन छिंडोर अरा निमन अम्‍बोर चि'ओर अरा निमन हींड़'ओर अरा निम्‍है नामेन मलदौ ब'ओर ती खंडोर चि'ओर होले धर्मेस निम्हा ती खुसमार'ओस।

यॊहनस 13:31

यूदस केरका ख़ॊख़ा येसुस बाचस, “अक्‍कु मनवा ख़द्दन एंगा महबा दहदर मनी, अरा एंग्‍है ती धर्मेसी महबा दहदर मनी।

त‍इरकर 15:14

सिमॊनस नमन तिंगियस का धर्मेस नन-यहूदीर ती जोक्क आलारिन तंगा गे चज्जियस ती पहिल खेप एकासे सोग्‍गे ईरियस।

त‍इरकर 24:13

एका कत्‍था ही बदी ईर एंग्‍है बिड़दो नू ओन्‍द्रनर, अदही एन्‍देर हूँ सबुती चि'आ पोल्‍लोर।

त‍इरकर 25:7

पौलुस बरचस ख़ने, येरुसलॆम ती बरचका यहूदीर ही अदिया उइय्युर आसिन बेड़हचर चिच्‍चर, अरा आसी म‍इय्याँ कैनो गोटंग कोड़हे कोहाँ बदी ठेकाब'आ हेलरर, लिकिन अदही आर सबुती चि'आ पोल्‍लर।

त‍इरकर 28:22

लिकिन निंग्‍है ब'अना एन्‍देर र'ई अदिनिम ऎम मेना बेद्ददम। एन्‍देरगेका ऎम अख़दम का उर्मी अड्डा ता आलर ई धरम खोंड़हा ही बिड़दो नू कछनख्रनर।”

रोमी 12:17

मलदौ ही ऊजी नू मलदौ अमा नना। ओर्मा आलर ही ऎरना नू दौ नना गे चिहुट नना।

रोमी 13:13

उल्‍ला ता आलर लेक्‍खा नाम उजगो डहरे नू ऎकदत नेकअन। नाम रिझ रंग अरा ऊंक्‍खना अरा पेहरन ही सोतरा नलख अरा लम्‍पट नलख अरा अरबानखरना अरा डाहना आबो ती तरकूटी र'अदत नेक‍अन।

रोमी 14:18

एका ओर्तस ई लेक्‍खा मसीसी तेतर-सुसर नन्‍दस, आस धर्मेसिन रिझाब'अदस अरा आलर आसिन सहरारनर।

रोमी 15:9

अरा आस इदगे हूँ इदिन नंजस का नन-यहूदीर तम्‍है ख़क्ख्रका सोग्‍गे ही चड्डे धर्मेसी ओहमा नना ओंगोर। एकासे नेम्‍हा पुथी नू लिख्रकी र'ई, “औंगे ऎन नन-यहूदीर नू निंग्‍है ओहमा ननोन। अरा निंग्‍है नामे ही ओहमा पाड़ोन।”

1 कोरिन्‍थ 14:25

अरा आसी जिया ता नूख़्रका कत्‍था दहदर मनो क'ओ, अरा आस ख़ेडमूली खत्र'ओस ती धर्मेसिन ऒड़ लग्‍गोस, अरा ब'ओस का, “धर्मेस मानिम निम्‍है मझी नू र'अदस।”

2 कोरिन्‍थ 1:12

अक्‍कुन ऎम ख़ॆख़ेल नू अरा कोड़हे गा निम्‍है गने ता नता नू, धर्मेस चिच्का नेम्‍हा अरा मानिम गने ईक्‍कम, इदगे दिम ऎम फुल‍ई मन्‍दम। इदगे एम्‍है लखना गोवाह चि'ई। ऎम अदन ख़ॆख़ेल ता लूर ती मला, धर्मेसी मया तिम नंजकम।

2 कोरिन्‍थ 13:7

अक्कु ऎम धर्मेसिन गोहरारदम का नीम एकअम मलदौ मल ननोर। इदगे मला का ऎम जंचना नू जितचका ऎथ्र'ओम, लिकिन इदगे गोहरारदम का ऎम जंचना नू हार मंजकम एन्ने ऎथ्रना ती हूँ, नीम दौ ननोर।

2 कोरिन्‍थ 8:21

एन्देरगेका धर्मेसी ऎरना नू लेका मला आलर ही ऎरना नू हूँ उजगो आबोन नना गेम कोड़हे चिहुट नन्दम।

इफेसुस 2:3

अबड़र ही मझी नू नाम ओर्मत हूँ मुन्द ओंग्होल नम्है कया ही चिबाख़ारना ही लेक्‍खा उज्जा लिक्‍कत, कया अरा जिया ही मने गुट्ठी लेक्‍खा नना लिक्‍कत। अरा बछ्रका उर्मी आलर लेक्‍खा धर्मेसी कैर ही तबे नू रहचकत।

इफेसुस 4:22

औंगे नीम निम्है पच्चा उज्‍जना ओक्‍कनन अरा पच्चा आल सुबहन एकदा घुरिय'अना सुख-सौंरत चड्डे बगड़ारनुम काला लगी, अदन अम्बा चि'आ।

फिलिप्‍पी 1:27

ऎन निम्है गुसन बर'ओन ती ऎरोन मलता मल हूँ बर'ओन, नीम ओन्टे गुना बॊलता नू ओन्टा जिया मनरकी दौ कत्‍था ही पत्त'अना गे अर्जाना नुम र'अदर एन्ने ऎन मेना गे, नीम इवंदम नना का, निम्‍है उज्‍जना ओक्‍कना येसु मसीसी दौ कत्‍था गे जॊगे मनन।

फिलिप्‍पी 4:8

छेद्दे नू अना भईरो, एका एका कत्‍था मानिम र'ई, अरा एका एका कत्‍था मईन जॊगे र'ई, एका एका कत्‍था उजगो र'ई, अरा एका एका कत्‍था निमन र'ई, अरा एका एका कत्‍था चोन्हा र'ई, अरा एका एका कत्‍था दौ नामे ख़क्ख्र'ऊ र'ई, अरा एका एका कत्था कोड़हे बॆस अरा ओहमा जॊगे र'ई, अबड़ा ही पत्त नू लेका सोचते र'आ।

1 थेस्‍सलोनिकॆयर 4:12

तहाँ निम्‍है उज्‍जना ती सौंसार ता आलर ती मईन ख़क्‍ख्र'ओ, लिकिन निमा निम्‍है चाड़ गे आरिन असरा नन्‍ना ती उज्‍जना मल्‍ला।

1 तीमोथियुस 2:2

बॆलर अरा आकुस नू र'उर गे बिन्‍ती नना, इदगेका नाम महबा अरा म‍ईन ती ख़न्न ऎख़ना अरा सल्‍ल गने उज्‍जोत।

1 तीमोथियुस 4:12

नीन जॊंख़य र'अदय, औंगे नॆका हूँ निंगन दुस'आ अमके चि'आ। लिकिन निंग्‍है ब'अना, अरा उज्‍जना ओक्‍कना, अरा चोन्‍हा, अरा पत्त'अना, अरा नेम्‍हा उज्‍जना नू पत्त‍'उर गे नीन चिन्‍हा मना।

1 तीमोथियुस 5:10

अरा आद दौ नलख गुट्ठी ती बॆस नामे ख़क्‍खकी र'ऊ आली मन्ना र'ई। एकाद ख़द्द-ख़र्रन पूसकी र'ओ, अरा पाहियर ही तेतर-सुसर नंजकी र'ओ, अरा नेम्‍हा आलर ही ख़ेड्डेन नूड़‍की र'ओ, अरा दुक्खे सार‍'ऊ आलर ही सहाड़ा नंजकी र'ओ, अरा उर्मी दौ नलख नू मने नंजकी र'ओ अन्ने आली मन्ना र'ई।

इब्रानी 13:18

एमा गे गोहरार'आ। एन्‍देरगेका एमा थितगर र'ई का एम्‍है लखना सफा र'ई, अरा ऎम नन्‍दम आ उर्मी कत्‍था नू म‍ईन जॊगे ती उज्‍जा गे बेद्ददम।

इब्रानी 13:5

ढिबा म‍इय्याँ अम‍के चिबाख़ार'आ, निंग्‍है गुसन ऎ बग्‍गे र'ई अत्रुम खतिर ननके। एन्‍देरगेका धर्मेस एन्ने बाचकादस, “ऎन निंगन इकला हूँ मल अम्‍बोन। ऎन निंगन इकला हूँ मल मॊधर'ओन।”

याकॊब 3:13

निम्है मझी नू नॆ लूरगर अरा बुझुर'ऊ र'अदस? आस तंग्है दौ उज्जना ओक्कना ती अदन ऎद्ददस नेकअन। अरा अदन लूर ती बरना लुदऊ मन्ना ती तंग्है दौ नलख गुट्ठिन नन्दस ऎद्ददस नेकअन।

1 पतरस 2:15

एन्देरगेका नीम निम्‍है दौ नलख ती लूर मलका आलर ही मलदौ कत्‍था कछनख्रनन मुढ़'आ गे धर्मेस बेद्ददस।

1 पतरस 3:16

लिकिन लुदऊ जिया अरा मईन गने इदन नना। अरा निम्‍है लखनन निमन उइय्या। ख़ने मसीस नू निमा गे र'अना बॆस जज्जना ओक्कना ही बिड़दो नू मलदौ सोच ती कछनख्र'उर तम्है हींड़ना कत्था ही पत्त नू लज्‍जे मॊंख़ोर।

1 पतरस 4:11

ओर्तस गे कत्था मेन्त'अना ही इनाम र'ई होले, आस धर्मेस तान आसी ती ब'अना लेक्खा कत्था मेन्त'अना र'ई। ओर्तस गे सुसर नन्ना ही इनाम र'ई होले, आस धर्मेस चि'अना सवंग ती अदन नन्ना र'ई। ख़ने नीम नन्ना उर्मी कत्था गुट्ठी येसु मसीस संगरा ती धर्मेस गे महबा ओन्द्रना र'ई। आस गेम उर्मी महबा अरा सवंग उर्मी उल्ला मनन नेकअन। आमेन।

2 पतरस 3:11

ई लेक्खम इबड़ा उर्मिम नठारना र'अना ती, नीम एका लेक्खा आलर र'अना र'ई? नीम धर्मेस गे इल्चका ती नेम्हा उज्जनन उज्जना र'ई।