Kamambuno Wakai Jon muno boglkwa 1:29 - Yesus kamo wakai

²⁹ Ana enge tangina Jon kango Yesus ende ye moglmara ungwa. Ana Jon yegl dungwa, “Kaniyo, Yomba i God Sipsipmo Nangigle makandle yomba tandaglmeno koko endina pre ungwa.

Kamambuno Wakai Jon muno boglkwa 1:29 ပူးပေါင်းရင်းမြစ်များ

Matyu 1:21

Ye yagl gak ta kurambuka, ene kangiye Yesus we dinatnga. Sraglpre, ye yombama tandaglmeno koko ende te, ye ere-inambuka.”

Matyu 20:28

Yeglmere, Yomba Wam ye yomba akepledi naraglmedi pre ta ukrukwa. Ye yomba merkinde akepledi tendre, ana kor wanmoglkwa i kindekondo yomba merkinde topo ere i-ikine endinagledi pre ungwa.”

Kamambuno Wakai Jon muno boglkwa 1:35

Ana tangina Jon eremogl disaipelmo suwo bogl akiye aglke kordagl igle meglkwa.

Kamambuno Wakai Jon muno boglkwa 1:36

Jon kango Yesus konbauna ende wongo ana ye dungwa, “Kaniro, i God Sipsipmo Nangigle.”

Kamambuno Wakai Jon muno boglkwa 1:43

Ana tangina Yesus ende Galili kamun enagledi orkwa. Ye pi Pilip kan indre yegl ditongwa, “Na wimara wo.”

Kamambuno Wakai Jon muno boglkwa 2:1

Ande enge suwo endongo ana enge ta mina Galili dumo kande Kena kamun suna igle yaglambu suwo bogl inambrika enge plau dungo, ana Yesus mam ombugl suna igle moglkwa.

Kamambuno Wakai Jon muno boglkwa 3:16

“God eremogl makan yomba prapra wakai-yene kangwa pre, ye Wam suwara kaima tongwa. Yomba ye wedi pirngi dinaglkwa ta goglkraglkwa, ba kor aimande moraglkwa inaglkwa.

Kamambuno Wakai Jon muno boglkwa 4:42

Ana ye ambu i diteingwa, “Ene ka dinotnga i pre erme no ta pirngi dikunga, sraglpre erme nono ye dra mina dungo punga i pre, no pirkan ounga. Yagle i kaima yene dumo koglkoglo yomba prapra ikine endinambuka.”

Kamambuno Wakai Jon muno boglkwa 6:51

Na nana kor-meglkwa bret i heven imbo ende atne wingwa ba yomba ta bret i ninan, ye kor aimande morambuka. Ana bret na tenaglka i na nangina, yomba koglkoglo kor aimande moraglkwa ipre na tenaglka.”

Aposel 13:39

Ana Yesus wedi pirngi dingwa yomba tandaglmeno koko ende tendre yomba du-wakai we dinambuka ba Moses lomo i mina yomba du-wakai we ta dikraglkwa.

Aposel 8:32

Ana yaglmo kamambuno pepa mina pangwa kere umara ikra ka yegl ta pangwa: “Ye sipsip ta sigoramnedi mange i eimere yeglmere. Te sipsip nangigle yungo baiglko ana kaglkane erekrukwa yeglmere, ye ka ta dikre kiendi moglkwa.

1 Korin 15:3

Na ka komnaiye iga i pond kaima pangwa pre okuna kana ene diteinga. Kamo i yegl: Krais ye nono tandaglmeno pre ere goglkwa, i kamambuno pepa mina okuna beglko pamere plau dungwa.

2 Korin 5:21

Krais ye tandaglme ta paikrukwa, ba nono tandaglmeno ikra God ipi ye mina wendigl tongo tandaglme yomba kaima yeglmere moglkwa. Ye yegl orkwa i nono Krais mina suna moun ye yombuglomo akepledi noran nono God yombama du-yene moramga.

Galesia 1:4

Ana nono erme tandaglme mina suna mounga i Krais no ere-inagle pre ye na sigoraglmedi kanwinge orkwa, i God Neno nomane giglendi prumere ana Yesus pinande orkwa.

Galesia 3:13

Ana nono lo dumere sika sikun, God mangaglmo ene inaglme dungwa ikra Krais indre ana nono toposi ikine endungwa. Sraglpre, kamambuno pepa mina yegl dungwa, “Yomba ta endi-prak mina wendigl pandraglkwa, i ye God mangaglmo mina moglkwa pre.”

1 Timoti 2:6

Ana yagle ye yomba prapra topo ere i-ikine endina-pre goglkwa, i yomba prapra God ere-inagledi enge panduglmara yegl orkwa.

Taitus 2:14

Krais yene kor-moglkwa i kinde kondo yeglpre nono mambuno kinde mina wanmoungo ye nono toposi ikine ende erewakai ere norkwa. Ama yeglpre nono ye yombamo suwara mounga, yeglpre nono mambuno wakai panambere i keunde eramunga.

Hibru 1:3

Yene Wam, Nem ambuglange i i-pene endungwa. Ana Wam yene Nem mere kuno yene kaima moglkwa, ye ka dumara i taragl prapra ake gidi pango yombuglo kande pangwa. Okuwo yomba prapra tandaglmeno koko ende kondo, ana ye ende heven suna pindre Nem yombuglo pond kaima pangwa moglmara ongo wokra amedi moglkwa.

Hibru 2:17

Ana taragl yegl kanekane erambuka i mina ye angiglma wagle meglmere yegl kaima kuno ere morambuka. Yegl ere yene pris kande mogl yomba mitno gogl tendre, te God kamo prapra duglo bogl kongunmo orko ana God eremogl yomba prapra tandaglmeno koko ende tongwa.

Hibru 9:28

Kuno yegl keme, Yesus bormaimo enge suwara ta ofa ertre, ana yomba prapra tandaglmeno koko endungwa. Ye aglkekor ende ikine unambuka enge, yomba tandaglmeno pre kongun kor ta erekrambuka, ba yomba ta Yesus pre sugl kan meglkwa i keme ere-inambuka.

1 Pita 1:19

Ba Yesus Krais bormaimo wakai kaima i mina ene topo orkwa. Ye sipsip nangigle mereyegl moglko num mo deglmbi ta ye nangiye mina paikrukwa.

1 Pita 2:24

Yesus Krais nangiye mina nono tandaglmeno indre ye endi-prak mina goglkwa. Ye yegl ormara i nono tandaglmeno prapra kinde kondo ana mambuno du-yene ere moramga. Ye sigo nangiye bogl bagla dumara i mina ene wu wakai eingwa.

1 Pita 3:18

Ana yomba prapra tandaglmeno koko endina pre Krais enge suwarata goglkwa. Ye yomba du-yene moglkwa, ba yomba yewe-mawe yeingwa auro ipi God mina ena pre goglkwa. Ye nangiye mina sigeglkwa ba Spirit mina ye andigl kor-moglkwa.

1 Jon 2:2

Ye yene kongun ere ana nono tandaglmeno koko ende norkwa, i nono keme pre manga. Ba makan yomba prapra tandaglmeno pre orkwa.

1 Jon 3:5

Ba ene pirkondingwa, Krais nono tandaglmeno koko endina pre wu pene ongwa. Ye yene mina tandaglme ta paikrukwa.

1 Jon 4:10

Yomba wakai kanigwa mambuno i yegl: Nono ta komnaiye kana God wakai kankunga, ba God yene komnaiye kana nono wakai kandre ana ye Wam nono tandaglmeno koko endinambuka pre di endungo makandle ungwa.

Ka Teke Pangwa 1:5

Te Yesus Krais ye God kamo pamere dindre, te geglkwa mina ye komnaiye andigl ukor pindre ana makandle king prapra ye sutno moglkwa. Ye ama arganmo ya dem munduwo pokndungwa ene tenambiwo. Ye nono wakai kandre ana bormaimo mina tandaglmeno koko endungo nono wu wakai omga.

Ka Teke Pangwa 12:11

Nono angro pirngi dingwa ye Sipsip Nangigle bormaimo mina ya God kamo kaima di nongugl endingwa igle mina ye pirngidi kunda yombuglo ere kunda ikine engre atne ende meglkwa. Yegl ere yene nangino ake-gingir dikre ana goramnedi pre kinde kondingwa.

Ka Teke Pangwa 13:8

te yomba makandle koglkoglo mogl-eingwa, ye God dumo makan ereyongwa enge kangino kor aimande meglkwa buk mina paikrukwa, ye kambu are dembiye karaugl ere tenaglkwa. Ana bukmo i Sipsip Nangigle okuna sigeglkwa ikra bukmo.

Ka Teke Pangwa 14:1

Ana na kan iro ende Sipsip Nangigle kamun muglo Saion andigl moglko kaniga. Te yomba 144,000 ye bogl akiye andigl meglkwa. Ana Sipsip Nangigle ya Nem kangino yomba i mamburo mina muno beglko pangwa.

Ka Teke Pangwa 14:10

ye wain ninambuka. Wainmo i God dem kumbrukwa. Ye niglkor bogl ta sikuglmagl endekrukwa, tamanga. Ye dem kumbrukwa i toindi kap mina ende topomo kinde bagl te ikine endinan ana yombamo ninambuka. Ana God angelomo holi ya te Sipsip Nangigle ongumutno-mugl yombamo i donga kombuglo salpa mina de wangigldi pamara igle giu kinde inambuka.

Ka Teke Pangwa 14:4

Yombamo i ambu bogl paikrikwa, ana ye Sipsip Nangigle dumo ta omara i ye ama sikasi eingwa. Ana God makan yomba tau meglmara suna igle ye toposi ikine endungwa. Yeglpre taragl mongo komnaiye koglmere yegl ye komnaiye mogltre, Sipsip Nangigle ya God yombamo meglkwa.

Ka Teke Pangwa 15:3

ana God kongunmo yomba Moses giglangemo dindre te Sipsip Nangigle giglangemo dingwa: “O God, Yaglkande, ene yombutn kande kaima pangwa. Ene kongun prapra etnga, i kande kaima pangwa, no kandre ana pirpogl sinamga mere manga! Ene yomba prapra kingno motnga, ene mambunon du-yene pandre te kaima keunde pangwa!

Ka Teke Pangwa 17:14

Ye kunda ere Sipsip Nangigle tenaglkwa, ba Sipsip Nangigle yombuglo ere ye engre atne endinambuka. Sraglpre, ye yagl kande prapra Kandeno mogltre te king prapra ye Kingno moglkwa. Ana yomba prapra ye agle dindre pinde i-pere endungo ye pirngi kaima dindre mokomugl wingwa i ye Sipsip Nangigle bogl akiye kunda yombuglo eraglkwa.”

Ka Teke Pangwa 19:7

Nono wakai pir gunyei kangiye kande tenamga! Sraglpre, Sipsip Nangigle ye ambu inambuka engemo yongo te ye inambuka ambumo i yene akekun ere kondungwa.

Ka Teke Pangwa 19:9

Ana angelo ta yegl dinarkwa, “Ka i muno boglo, ‘God digaglko yomba Sipsip Nangigle ambu ingwa kaiya mokna bir kande nemara wingwa yomba ye gun yenaglkwa.’” Ye ka i ama di ainungwa, “Ka i God kamo kaima.”

Ka Teke Pangwa 21:14

Siti toglmo akegi dinambuka i kombuglo kauglange 12 giglendi paingwa. Ana kauglange 12 i mina Sipsip Nangigle aposelma wagle 12 kangino bogl endigo pangwa.

Ka Teke Pangwa 21:27

Te taragl deglmbi yongwa ya yomba mambuno nikedi ertre ana bakagl kakimbi dingwa ye dumo kor suna igle ta pikraglkwa. Ba yomba kangino Sipsip Nangigle bukmo kor aimande moraglkwa i mina pangwa i keunde ende suna igle enaglkwa.

Ka Teke Pangwa 21:9

Ana angelo 7 eremogl God dem kumbrukwa dis 7 mina kausi yongwa ake meglkwa ikra suwarata na moglmara undre yegl di narkwa, “Endwo! Sipsip Nangigle embiye ene ombuno ditenaglka, ye ambu i erme ina orkwa.”

Ka Teke Pangwa 5:6

Ana na kaniga sia king yomara igle taragl kor-meglkwa 4 ikra ya ende okuna eingwa yomba 24 mogl winambo dimara sunawom igle Sipsip Nangigle sigeglkwa mereyegl singigle pango andigl moglkwa. Ye bre yongagle 7 pango te ongumuglo 7 pangwa. Ana 7 i God Holi Spiritmo, ye diendungo endpi makan koglkoglo eingwa.

Ka Teke Pangwa 5:8

Ana pepa i perkwa ake yungo, taragl kor-meglkwa 4 ikra ya yomba mina ende okuna eingwa yomba 24, ye Sipsip Nangigle moglmara gumamugl mangidi te meglkwa. Ana ye suwara suwarandi onguno mina gita mereyegl ya te gol mina dis bekingwa i endi inge demine wakai orkwa suna kausi moglko ye ake meglkwa. Ana inge demine orkwa i God yombamo du-wakai wagle ye kamangeno.

Ka Teke Pangwa 6:1

Okuwo na kaniga Sipsip Nangigle boma nuglo 7 pepa mina sidangingwa ikra komnaiye pangwa ye akepogl endungwa. Ana taragl 4 kor-meglkwa suwarata kamo nungo embriye na pirka kamun gurgagla dumere yegl orko dungwa, “Endwo!”

Ka Teke Pangwa 6:16

Ye paimogltre yegl di makan muglo ya kombuglo tengwa, “Ene yange no mounara sindre no simbre eriyo. Ana yomba sia king mina amedi moglkwa i no kankran te Sipsip Nangigle dem kumbrukwa i no mina ukrambuka.

Ka Teke Pangwa 7:14

Ana na ka yegl di ikine endiga, “Yagl kande, i ene pirkan etnga.” Ana ye yegl di narkwa, “Yomba i kunda ikine onguno mina ye pigle goglne wanmogl wingwa, te ye gatno suna Sipsip Nangigle bormaimo mina nigl keglko wu kruwo kaima ongwa.

Ka Teke Pangwa 7:17

Sraglpre, Sipsip Nangigle, God siamo king mina sunawom amedi mogl ana yomba i ye sutno wakai mogltre ana auro ipi niglkor aimande yange pamara suna igle enambuka. Te ye ongumutno mina kai nuglo prapra i God koko ende tenambuka.”