1 Jon 4:8 - Yesus kamo wakai

⁸ Te ta ye yomba pre munduwo paikran ana ye God mambunomo i ta pirkan erekrukwa. Sraglpre, wakai kanigwa mambuno i God yene moglkwa.

1 Jon 4:8 ပူးပေါင်းရင်းမြစ်များ

2 Korin 13:11

Angrima pirngi dingwa wagle, ka di uglo yei ana wakai we diga. Ene Kristen wakai kaima ya giglendi moraglkwa pre kongun yombuglo eraglkwa. Na ka diteinga ikra ene prapra pirtre duglo boraglkwa. Te enene mina prapra nomano suwara yei deno munduno argan ere moraglkwa. Ana God kanwakai yongwa ya bipokndi akiye ene bogl morambuka.

Efesus 2:4

Ba God nono pre mitno goglkwa ya kanwakai yongwa mambuno i pond kaima pangwa, mambuno igle mina nono kanwakai yongwa,

Hibru 12:29

Sraglpre, nono Godno i donga bauglo moglkwa ye taragl kanekane i gagl tenge orkwa donga.

1 Jon 1:5

Kamo i ye Wam mina no punga pre ana dipene ende ene tomga. God, yene ambuglange moglkwa, ye mina mim kaima ta paikrukwa.

1 Jon 2:4

Yomba ta yegl dinan, “Na God pirkan erika,” ba God lomo dumere ye erekran, ye kakimbi yomba moglkwa, te ka kaima ye nomanmo mina suna paikrukwa.

1 Jon 2:9

Yomba ta na ambuglange sumara mole dinambuka, ba ye angigle kankinde yei moran ana ye mim ormara sunakra wanmoglkwa.

1 Jon 3:10

Ana God nangiglma ya te Satan nangiglma meglkwa i kanpogl sinamnedi pun kade ana mambuno yegl mina kanamga: Yomba mambuno du-pamere erekre te angigle ta kanwakai yeikran, ana ye God yombamo kaima ta moglkrukwa.

1 Jon 3:6

Yomba ta Yesus mina sidakagl meglkwa, ye tandaglme aimande ta erekrikwa. Ba yomba ta tandaglme ningadi erikwa i ye Yesus ta kankre te pirkre erikwa.

1 Jon 4:16

Te nono ombugl God nono pre munduwo pangwa i mina pirpogl sindre ana i mina mounga. Ana munduno argan erikwa ya te kanwakai yengwa i God mambuno kaima moglkwa. Ta ye argan ere yomba kanwakai yei moran ana yombamo i God mina moglko te God ama ye mina moglkwa.

1 Jon 4:7

Angrima wagle, nono yomba tau pre munduno panan kanwakai yeinamga. Sraglpre, yomba kanwakai yengwa mambuno i God mina ungwa. Ana ta ye yomba pre munduwo panan, ye God nangigle moglkwa pre ana God mambunomo pirkan orkwa.