Luk 12:33 - Nupela Testamen long tokples Kandas

³³ Mot in siuru anumot a kum ututna sur a mani, ma mot in tabor a kum sibo na taro nami. Mot in waninar pas anumot lako kum paus ra ken moroto, a wakak na ululeng sapat una langit ra ke ser rop, ma katu tene wolong in nan milau i, ma a koropos ken ban laulau i.

Luk 12:33 ပူးပေါင်းရင်းမြစ်များ

Matiu 19:21

O Iesu i balu i lena, “Ra u nemi sur un tokodos mulus, un nan ma un siuru ru anum a kum ululeng rop, ra a mani taguni, un tabor a kum sibo na taro nami. Ra un pami lenra, anum a wakak na ululeng kusapat una langit. Numur un nan urin ma un mur iau.”

Luk 11:41

Mot in tabor a kum sibo na taro nama utna ra kura ubalan anumot a kum kap ma a kum pelet, sur katu dur kura un mot umatan o God.

Luk 12:21

In lenra torom det ra det ubek tomo a ululeng sur det ut, ikut ka det gongon umatan o God.”

Luk 16:9

A watungi tamot, mot in umarom pas lako taro nama kum ululeng taginin upiso. Numur ra a kum ululeng ken gas mo sur tu utna, din gas pas mot sur mot in kis una kum rumu ra det in tur tukum.

Luk 18:22

Ra o Iesu i longoro i, i watungi tano lena, “Ara utna mukut ra kabaut u pami. Un siuru ru anum a kum utna rop, ra a mani taguni, un tabor a kum sibo na taro nami. Ra un pami lenra, anum a wakak na ululeng kusapat una langit. Numur un nan urin ma un mur iau.”

A Wakak na Wasiso un o Iesu Karisito o Jon i tumusi 12:6

O Judas ke maris a sibo na taro, awu. I watungi lenri uni i ser tamtamabat anundet a mani ma i ser los eno i, uni i a tene wolong.

Aposel 2:45

Ra det siuru anundet a kum du piso ma anundet a kum utna, ma a mani taguni, det isuaro i torom osi ra i sibo.

2 Korin 8:2

Det taramo a susut na mamaut, ikut anundet a gasgas i bukus. Ma una nundet a labino gasgas ma anundet a kinkinis na sibo, det gas ut sur det in etabor.