Kolosi 3:17 - Nupela Testamen long tokples Kandas

¹⁷ Una kum utna rop ra mot pami ma mot watungi, mot in pami ut nama risan a Labino o Iesu, ma mot in watung wakak torom o God a Tamandat, kibino una pinapam ra o Karisito i pami un mot.

Kolosi 3:17 ပူးပေါင်းရင်းမြစ်များ

Matiu 28:19

I mo ra mot in nan, mot in ususer a taro tagun a kum gapman rop, sur det kai anung a kum nat na ususer. Mot in baptaiso det nama risan o Tita, ma o Nutunu, ma a Tokodos na Nion.

Aposel 19:17

A wasiso una utna ri, i wanpat torom a taro Juda ma a taro kai ra awu sur a taro Juda ra det kis tong o Epeses, ra det ngara rop, ma det urur sakit una risan a Labino o Iesu.

Aposel 4:30

Un warut met nama dekdekim sur a kum misait det in langolango, ma a kum utna na ukisin ma a kum ukinalong det in nanpat una risan o Iesu, anum a Tasur na Tultul.”

A Pas anun o Pol torom a taro Rom 1:8

Iri a mugano utna, una risan o Iesu Karisito, a watung wakak torom anung a God un mot rop, uni a taro tagun a rakrakon bual rop, det wasiso puaso una numot a nurnur.

1 Korin 10:31

Lenra, ra mot wangon, o mot inum, o tu ngas na utna kai mot pami, mot in pami sur mot in ulabo pas o God nami.

Epeses 1:17

A ser wararing lena a God anun anundat a Labino o Iesu Karisito, a Tamandat ra i bukus nama minamar, in tabor mot nama mananos tan a Tokodos na Nion, ma in papos a nuknuki mot, sur mot in tasman wakak o God.

Epeses 5:20

Ma una kum bung rop, mot in watung wakak una kum utna rop torom o God a Tamandat, nama risan anundat a Labino o Iesu Karisito.

Pilipai 1:11

Ma a wararing sur mot in bukus nama tokodosino, ra o Iesu Karisito in pam pati una numot a nilaun, sur a taro det in watung ulabo pas o God, ma det in rakon lekeleke pasi.

Pilipai 2:11

ma det rop det in watung puaso i lena, o Iesu Karisito i a Labino, sur det in ulabo pas o God a Tamandat.

Kolosi 1:12

ra mot in watung wakak torom a Tamandat, ra i warut mot sur mot in pet lari sur mot in rakon a kum utna tomo nam anun a taro. A kum utna ra i sa uliliman tari torom det, ra det kis una talapor.

Kolosi 2:7

Anumot a nilaun in wakakor un o Iesu sur in lubung, ma mot in tur netes uni. Mot in tur dekdek una nurnur elar nami ra di sa ususer tar mot uni, ma mot in bukus nama watung wakak torom o God ma anumot a watung wakak in pulpulas.

Kolosi 3:15

I wakak sur a malmal ra o Karisito i tabor mot nami in mugu mot una numot a nilaun. Uni mot ara pinin o Karisito kut, ma o God i kabo pas mot sur mot in kis tomo nama malmal. Ra i wakak sur mot in ser watung wakak torom o God.

Kolosi 3:23

Una kum pinapam rop ra mot pami, mot in pitar rop tar anumot a nilaun uni. Ra mot papam, mot in papam elar nami ra mot papam ut torom a Labino, ma awu sur torom a taro.

1 Tesalonaika 1:1

Iau o Pol, o Sailas, ma o Timoti, metul tumtumus torom mot a taro na lotu tong o Tesalonaika, mot ra mot laun un o God a Tamandat ma a Labino o Iesu Karisito. A marmaris ma a malmal torom mot.

1 Tesalonaika 5:18

Mot in watung wakak torom o God un asau rop ra i wanpat torom mot, uni iri a nemnem ut anun o God torom mot, a taro anun o Karisito Iesu.

2 Tesalonaika 2:17

in uragot mot ma in udekdek mot una numot a kum wakak na pinapam ma a kum wakak na wasiso kai.

Ibru 1:5

Uni o God awu sur i watungi torom tu ensel lenri, “Ui a Nutung, ma uniri a sa wanpat o Tamam.” Sng 2:7 ma awu sur i watungi kai un tu ensel lena, “Iau o Tamano, ma i a Nutung.” 2 Sml 7:14

Ibru 13:15

I mo ra, una kum bung rop dat in watung ulabo pas o God, una risan o Iesu. A wasiso na ulabo ra, in elar nama etabor ra dat pitari torom o God, ra a wandat i upuaso a risano.

1 Pita 2:5

Ra mot kai, mot elar nama kum watat ra det laun, ma o God i pam mot sur mot, a rumu anun a Tokodos na Nion. Mot in nanpat a kum tene tuntun etabor anun o God, sur mot in pitar a kum etabor ra i nion, ra i wakak umatano, i kibino un o Iesu Karisito.

1 Pita 2:9

Ikut mot a taro na pipilok, a kum tene tuntun etabor anun a King, a tokodos na kabotaro, ma a taro anun o God. O God i sa kabo pas mot gusun a dumirum sur anun a talapor ra i wakak doko, sur mot in wasiso puaso una anun a kum wakak na pinapam.

1 Pita 4:11

Ra taio i los a etabor sur in tene warawai, i wakak sur in warawai ut elar nama wasiso anun o God. Ra taio i los a etabor sur in tene warut, i wakak ra in warut nama dekdek ra o God i pitar tari tano, sur a taro det in watung ulabo pas o God una kum utna rop, kibino un o Iesu Karisito. Anunu kut a minamar ma a dekdek, ken rop ma ken rop. Amen.

1 Jon 2:23

Osi ra i ipul ru a Nutun o God, o Tamano kai ke kis tomo nami. Ma osi ra i mulaot pas o Nutunu, o Tamano kai i kis tomo nami.

1 Jon 3:18

A kum nutnutung liklik, gong dat marmaris nama wasiso, o nama wandat kut. Dat in marmaris nama wakak na pinapam ma a lingmulusino.