Galesia 6:8 - Nupela Testamen long tokples Kandas

⁸ Osi ra i muri kut a kum sakino nemnem ina pinino, in pasong pas a minat tukum. Ma osi ra i mur a Tokodos na Nion, in pasong a nilaun tukum tan a Tokodos na Nion.

Galesia 6:8 ပူးပေါင်းရင်းမြစ်များ

Matiu 19:29

Ma det rop taktakai ra det sa wan gusun anundet a kum rumu, o gusun a kum tistisin det a kum musano ma a kum ino, o gusun a kum tamtaman det, o a kum nanan det, o a kum nutnutun det, o gusun anundet a kum piso, uni det mur iau, din pitar a marmar na utna lenri tandet, ma det in rakoni kai a nilaun tukum.

Matiu 25:46

Ra det in nan sur a ngunungut tukum. Ikut a kum tene tokodos det in nan sur a nilaun tukum.”

Luk 18:30

una nilaun ri, din tabori nama susut na utna lenri ra i sa wan pas gusuni. Ma una nilaun numur din tabori nama nilaun tukum.”

A Wakak na Wasiso un o Iesu Karisito o Jon i tumusi 4:14

Ikut det ra det in inum a danim ra an tabor det nami, ka det in muruk melet mo. A danim ra an tabor det nami, in elar nam ara matmatano danim una nundet a nilaun, ra in burburak pat ma in tabor det nama nilaun tukum.”

A Wakak na Wasiso un o Iesu Karisito o Jon i tumusi 4:36

Uniri a musano ra i pasong i los anun a ikul. Ma a win anun a pasong, a utna sur a nilaun tukum, sur osi ra i marmarut ma osi ra i pasong, der in gas tomo.

A Wakak na Wasiso un o Iesu Karisito o Jon i tumusi 6:27

Gong mot papam kut sur a utna na inangon ra i ser mereseng. Mot in papam sur a utna ra in kis tukum sur a nilaun kura numur, ra a Nutun a Musano in tabor mot nami. Uni o Tamano, o God i sa ese tari lena i mulaot un asau ra a Nutun a Musano i pami.”

A Pas anun o Pol torom a taro Rom 13:14

Ikut mot in emar nama nilaun anun a Labino o Iesu Karisito, ma gong mot nuknuk sur tu kisapi sur mot in ugasgas a sakino nemnem ina pinimot.

A Pas anun o Pol torom a taro Rom 6:13

Gong melet mo mot pitar tar tu du pinimot sur in elar nama utna na pinapam sur a pam sakino. Mot in pitar tar mot torom o God, uni mot sa laun melet gusun a minat. Ma mot in pitar tar a kum du pinimot rop torom o God, sur in elar nama kum utna na pinapam sur a tokodos na pinapam.

A Pas anun o Pol torom a taro Rom 6:23

Uni a kunukul ina sakino petutna, a minat. Ikut a etabor, ra o God i pitar orosi kut, i a nilaun tukum. A nilaun ra dat losi, kibino una pinapam anun o Karisito Iesu anundat a Labino.

A Pas anun o Pol torom a taro Rom 8:11

A Nion o God, ra i ukatutur pas o Iesu gusun a minat, i laun un mot. Una pinapam anun a Niono ra i laun un mot, i ra i ukatutur pas o Karisito gusun a minat, in pitar a nilaun una pinimot, ra i ser mat.

A Pas anun o Pol torom a taro Rom 8:13

Uni ra mot mur a sakino nemnem ina pinimot, mot in mat. Ikut, ra una dekdekin a Tokodos na Nion, mot in um doko ru a kum sakino petutna ra a pinimot i ser pami, mot in laun.

A Pas anun o Pol torom a taro Rom 8:6

Osi ra a nuknukino i kis utuntudu ina sakino nemnem ina pinino, in mat. Ikut, osi ra a nuknukino i kis utuntudu ina Tokodos na Nion, in laun ma in taramo a malmal.

1 Korin 15:42

I lenkutkai ra una katkatutur melet anun a kum minat. A pinindet ra di por det nami in mereseng kut, ikut ra in katutur melet, ken mereseng mo.

Galesia 6:7

Gong taio i toro pasi ut, uni katutaio in toro lar pas o God. A musano in pasong pasi ut asau ra i sa marut tari.

1 Timoti 1:16

Ikut o God i maris iau, sur o Karisito Iesu in ese anun a wowowon na petutna torom iau, ra a laulau sakit tan a kum tene sakino rop. I ulaun iau ma i unus ru anung a kum sakino petutna. Lenra, a wanpat a wakak na malalar, sur a taro det in tama asau ra o Iesu i pami un iau, ma det in nurnur un o Iesu, ma det in rakon a nilaun tukum.

Taitus 3:7

I ulaun dat, sur dat in rakon a nilaun tukum, ra dat kis langlang suri nama nurnur. Ra i ulaun dat, i watung dat lena dat tokodos umatano, kibino una nun a marmaris.

Jems 3:18

A tene malmal ra i ser papam nama malmal, i elar nama tene minarut. Ma a utna ra i pasong pasi, i a tokodos na petutna.

2 Pita 2:12

Ikut a kum torotoro na tene ususer ri, det elar nama kum kuabor na wewegua, ra ka det mananos, ma det muri kut a nemnem ina pinindet, ma di usus det kut sur din pam ukai det ma din um doko det. Det watung laulau i kut a kum utna ra ka det tasmani. Det in iru elar nama kum kuabor na wewegua.

2 Pita 2:19

Det liliman torom det lena, det in langolango, ikut det ut, ka det langolango, det tene ititula torom a kum dur na magirandet. Uni taio in tene ititula torom asau ra i labo doko una nun a nilaun.

A Pas anun o Jud 1:21

Mot in kis epotor una marmaris anun o God, ra mot kiskis langlang sur anundat a Labino o Iesu Karisito in tabor mot nama nilaun tukum. In tabor mot nami, uni i maris mot.

Tamtama 22:11

Osi ra a tene sakino din madek ru i sur in pami ut anun a kum sakino, ma osi ra i dur, din madek ru i sur in pami ut anun a kum dur na petutna, ma osi ra anun a petutna i tokodos, din madek ru i sur in pami ut anun a tokodos na petutna, ma osi kai ra anun o God, din madek ru i sur in pami ut anun a petutna ra o God i nemi.”