Galesia 6:12 - Nupela Testamen long tokples Kandas

¹² A taro ra det ungongos pas mot sur din tok talilis mot, det pami kut uni det nem na ulabo pas det umatan a taro. Det pami lenra uni det ngara. Uni det nuki lena, ra det in warawai una nurnur unin nanai kutus anun o Karisito, din ukadik det.

Galesia 6:12 ပူးပေါင်းရင်းမြစ်များ

Matiu 23:27

“In laulau doko torom mot a kum tene ususer tagun a Warkurai ma a kum Parisi, mot a kum tene torotoro. Mot elar nama kum kulam na minat ra di pen tar det. Ra di tama det taginago upiso det wakak, ikut tiro ubalandet i bukus nama kum sursur na minat ma a kum utna rop ra i dur.

Matiu 23:28

Lenkutkai ra, a taro det tama a pinimot lena, mot a kum tene tokodos, ikut a balamot i bukus nama torotoro, ma a kum sakino petutna.

Matiu 23:5

Anundet a kum pinapam rop, det pami kut, sur a taro det in tama det. I perere bing anundet a kum boks liklik ra det ser uruk tar a kum du Buk Tabu uni ma det keri una kum masarindet. I walos bing anundet a kum kulo ra kura una sinisir ina nundet a kum malu na niaring.

Matiu 5:10

Det ra di ban laulau det uni det mur a tokodos na petutna, det dan, uni anundet a matanitu tagisapat una langit.

Matiu 6:16

“Ra mot in wewel sur mot in wararing, gong mot tamtama na marmaris elar nama kum tene torotoro, uni det tamtama na marmaris sur a taro det in tama i lena det wewel. A inanos mot nama lingmulus, ra a taro det ulabo pas det lena det a kum tene lotu mulus, i ut ra anundet a kudulano ikul.

Matiu 6:2

Ra un tabor a kum sibo na taro, gong u wasiso mugu sur a taro det in tama ui. A taro ra ka det etabor nama lingmulus una balandet, det ser wasiso mugu nam anundet a etabor una kum rumu na lotu ma una kum kisapi kai, sur a taro det in watung ulabo pas det uni. Gong mot pami elar nam det. A inanos mot nama lingmulus, ra a taro det ulabo pas det, i ut ra anundet a kudulano ikul.

Matiu 6:5

“Ra mot in wararing, gong mot elar nama kum tene torotoro. Det nem doko i sur det in tur ma det in wararing una kum rumu na lotu, ma una kum nubual ra a taro det wanan tomo iai, sur a taro det in tama det ma det in watung ulabo pas det. A inanos mot nama lingmulus, ra a taro det ulabo pas det, i ut ra anundet a kudulano ikul.

Luk 16:15

Ra o Iesu i watungi tandet lena, “Mot, mot ukodos pas mot kut umatan a taro. Ikut o God i tasman a balamot. Uni a utna ra i labo doko umatan a taro i laulau doko umatan o God.

Luk 20:47

Det ser urop a kum ululeng anun a kum ula, ma det ser pam a kum walalos na niaring sur a taro det in tama det. In labo doko a warkurai na minabalu anun o God torom det.”

A Wakak na Wasiso un o Iesu Karisito o Jon i tumusi 7:18

Osi ra i wasiso kut nama nuknukino, i nemi kut sur din ulabo pasi. Ikut iau, a nemi sur din ulabo pas o God ra i tulu ru iau urin. A wasiso nama lingmulus, ma katu torotoro i kis un iau.

Aposel 15:1

A ramano taro tagisapat una papor Judia det wan utong o Antiok, ma det ususer det ra det tar tistisino una nurnur lena, “Ra ka din tok talilis a pinimot elar nama Warkurai anun o Moses, ka din ulaun mot.”

Aposel 15:5

A ramano kum Parisi ra det nurnur un o Iesu, det katutur ra det watungi lena, “I tokodos ut sur din tok talilis a pinin a taro ra awu sur a taro Juda ra det nukpukus. Ma din ususer det, sur det in mur a Warkurai anun o Moses.”

2 Korin 10:12

Ka met ser elaro met nam det ra det watungi lena, det labo sakit. Det elaro etetalai det melet ut. Ka det mananos!

2 Korin 11:13

Uni a kum musano ra, a kum torotoro na aposel, a kum torotoro na tene pinapam, ma det pukus pas det sur det in tamtama elar nama kum aposel anun o Karisito.

Galesia 2:14

Ra a tama i lena, a utna ri, det pami ke elar nama lingmulus ina Wakak na Wasiso, a watungi torom o Pita umatandet rop lena, “Pita, ui a te Juda, ikut u laun elar nama taro ra awu sur a taro Juda. Asau a kibino ra u ungongos pas a taro gisen sur det in mur a kum petutna anun a taro Juda?

Galesia 2:3

Mir kis tomo nam o Taitus, a te Grik, ikut ka det ungongos pasi sur din tok talilis a pinino, elar nama Warkurai anun a taro Juda.

Galesia 5:11

A kum tistising, ka ususer meleti mo a taro una tinotok talilis. Iri a kibino ra a taro Juda det ukadik iau. Gunuk ra an ususer utmakai uni, ka det in ukadik iau. Ikut det ukadik iau, uni a ususer a taro sur det in nurnur kut unin nanai kutus anun o Karisito.

Galesia 6:13

Det ut ra di tok talilis det, ka det mur sot pas a Warkurai. Ikut, det nemi ut sur din tok talilis mot, sur din warango pas det un asau ra det pami un mot.

Pilipai 1:15

A lingmulus, ara taro det warawai un o Karisito uni det nuknuk laulau un iau. Ma ara taro kai, det warawai uni det nem na turbat iau gusun anung a kinkinis na mugumugu. Ikut, ara taro det warawai nama wakak na nuknukin det.

Pilipai 2:4

Gong mot nuknuk kut sur asau ra in uwakak mot. Mot taktakai mot in nuknuk kai sur a utna ra in uwakak a taro gisen.

Pilipai 3:18

Uni a susut na dino a sa inanos tar mot lena, a susut, det laun elar nama kum ebar anun in nanai kutus anun o Karisito. Ra uniri a inanos melet mot, ma a lurlur na matang i puku.

Kolosi 2:23

A lingmulus ut, a kum warkurai ri, det tamtama elar nami ra det tagun a wakak na mananos, uni a taro ra det ser mur det, det dekdek una lotu, ma det ser unatino pas det, ma det ser warkurai bat a pinindet. Ikut ka det pet lar pasi sur det in turbat a laulau na nemnem ina pinindet.