Epeses 4:14 - Nupela Testamen long tokples Kandas

¹⁴ I mo ra ka dat in elar melet mo nama kum nat liklik, ra anundet a nurnur i elar nama utna ra a top i woro tuptupukusi utong ma urin. Ka dat in mur a kum etowo tan a kum tene torotoro, elar nama utna ra a wuwu i wup pukpukusi. Ka dat in mur det ra det nem na ben raro a taro nam anundet a kum namnamin na wasiso.

Epeses 4:14 ပူးပေါင်းရင်းမြစ်များ

Matiu 11:7

Ra a kum nat na ususer anun o Jon det wan, o Iesu i inanos a kunur na taro un o Jon lena, “Una bung ra mot wan una nubual kalako taro uni torom o Jon, asau ra mot tamtama suri? Kutiro in nere ra i erere una wuwu? Awu.

Matiu 24:11

A susut na torotoro na poropet kai det in nanpat, ma det in toro pas a susut na taro.

Matiu 24:24

Uni lako kum torotoro na Karisito, ma lako kum torotoro na poropet det in nanpat. Det in pam lako kum labino ukinalong ma lako kum utna na ukisin sur det in toro pas a taro ra o God i sa pilok pas det, raut ko det in pet lar pasi. Ikut ka det in pet lar pasi.

Aposel 23:21

Gong u longoro det, uni a wat na noino ma i puku na taro det sa parau taru suri. Uni det sa liliman taru lena, ka det in nangon ma ka det in inum, tuk ut ra det sa um doko ru tar o Pol. Ra uniri det kis langlang sur anum tu nimulaot.”

1 Korin 12:2

Mot tasmani lena, ra ka mot nurnur utmakai, di ben raro pas mot torom a kum torotoro na god ra ka det ser wasiso, ma mot lotu torom det.

1 Korin 14:20

A kum tistising, gong a nuknuki mot i elar nama kum nat liklik. Una sakino petutna i wakak sur mot in elar nama kum nat miso. Ikut, una nuknuki mot, mot in elar nama kum lamlabino.

1 Korin 3:19

Uni a mananos tagun a rakrakon bual ri, i a longlong na utna kut umatan o God. Elar nami ra di sa tumus tari una Buk Tabu lena, “I ser kun ukai pas a kum tene mananos nama nundet a mananos ut.” Jop 5:13

2 Korin 2:17

Ka met elar nama susut na taro, ra det papam kut nama wasiso anun o God sur a mani. Ikut, un o Karisito met wasiso nama lingmulus umatan o God, uni i ut i tulu ru met.

2 Korin 4:2

Met sa mana gusun a kum sakino petutna ra di ser pam eno i, ma di ser maimai nami. Ka met papam nama torotoro, ma ka met palos raro a wasiso anun o God, awu. Met palos talapor a lingmulus na wasiso torom a taro, sur det in tasman lele i ut una nuknukin det lena, met watung a lingmulusino umatan o God.

Galesia 3:1

A taro Galesia, mot a kum longlong! Osi mo ra i sangsagor, ra i ulokolokor a nuknuki mot? A sa inanos talapor tar mot una minat anun o Iesu Karisito unin nanai kutus, i elar nami ra mot ut mot tama i.

Epeses 6:11

Mot in emar rop pas nama kum ememar na inaim anun o God, sur mot in turbat a kum usobor anun o Satan.

1 Timoti 3:6

Gong taio i mugumugu na lotu ra i nukpukus matok taru kut, sako in umuman labino, ra in puku, ma din warkurai i elar nam o Satan.

2 Timoti 1:15

U tasmani lena a taro rop, ra det kis una papor Asia, det sa wan pas gusun iau. O Pigelus ma o Emogenes aru tagun det.

2 Timoti 3:13

A sakino taro ma a kum tene torotoro det in laulau, ma det in laulau sakit. Det in toro a taro, ma det in toro pas det utkai.

2 Timoti 4:3

Uni, a bung in nanpat, ra a taro ka det in nemi mo a tokodos na etowo. Ma una nundet a kum nemnem, det in ben tomo a susut na tene ususer torom det, sur det in ususer det un asau ra det nem na longoro i.

Ibru 13:9

Gong mot mur a kum wur ngas na etowo ra i ben raro mot. I wakak ra a marmaris anun o God in udekdek a niondat. Ra dat mur a kum warkurai una utna na inangon, ken udekdek a niondat, ma ken warut det ra det ser mur a kum warkurai ra.

Jems 1:6

Ikut ra in wararing, in wararing nama nurnur, ma gong i wur nuknuk. Uni osi ra i wur nuknuk, i elar kut nama top, ra a wuwu i wup tuptupukusi.

Jems 3:4

Mot in tama i kai a sip sel. I labo doko, ma a kum dekdek na wuwu det ukalabori, ikut din ukodosi kut nama nat na stia ino, sur in mur a nemnem anun a kiapten.

2 Pita 2:18

Det ulabo pas det nama kum wasiso oros kut, ma det ulam a taro sur det in pam a pamuk na petutna ma det in mur a kum laulau na nemnem ina pinindet. Una ngasino ri, det ulam det ra ke suano det utmakai a inawan gisen gusun a kum tene sakino.

1 Jon 2:19

A kum ebar anun o Karisito, numugu det kis tomo nam dat, ikut det sa pirso pas gusun dat, uni awu sur det mulus tagun dat. Ra gunuk det mulus ut tagun dat, det in kis tukum nisan dat. Ikut, ra det sa wan gusun dat, i ese i lena, awu sur det tagun dat.

1 Jon 2:26

A tumus tar a kum utna ri torom mot, sur an utumarong mot un det ra det nem na ben raro mot.

1 Jon 4:1

A kum wakak na paspasang, gong mot nurnur oros un taio ra i watungi lena a Tokodos na Nion i pitar tar a wasiso toromi. I wakak sur mot in lari munung a kum nion, ra det tagun o God o awu. Uni, a susut na torotoro na poropet kuri det una rakrakon bual.

A Pas anun o Jud 1:12

Ra a taro ri det wangon tomo nam mot una anumot a kum inangon na marmaris, det elar kut nama dur na utna. Det tabor masmasur pas det ut, ma ka det urur sur a taro gisen. Det elar nama bakut ra a wuwu i wup tuptupukusi, ra katu utna i ubatbati. Det elar kai nama kum duwai ra ka det wu una kalang ra det ser wu uni, det sa mat. Ra di sa gat ru det, anundet a manru na minat mo ra.

Tamtama 19:20

Ikut di pam sikot pas a kuabor na wewegua tomo nama torotoro na poropet, i ra i pam a kum utna na ukisin una risan a kuabor na wewegua. Ra i pam a kum utna na ukisin ra, i toro pas det ra a ukinalong anun a kuabor na wewegua kura un det, ma det lotu torom a malalar ina kuabor na wewegua. Di woro lalaun tar a torotoro na poropet ma a kuabor na wewegua unin labino tung na sungun, ra i wangon nama salfa.