Epeses 1:13 - Nupela Testamen long tokples Kandas

¹³ Ma mot kai tagun o Karisito, uni mot longoro a lingmulus na wasiso ri, a Wakak na Wasiso lena o God in ulaun pas mot. Ra mot nurnur un o Karisito, o God i ubek tar anun a ukinalong un mot, a Tokodos na Nion, ra i sa uliliman mugu taru uni.

Epeses 1:13 ပူးပေါင်းရင်းမြစ်များ

Luk 11:13

Mot a laulau na taro, ikut mot tasmani ut a wakak na etabor sur mot in tabor a kum nutnutu mot nami. Ra mot ser pami lenra, i lingmulus sakit lena, osi ra in saring a Tamamot ra i kis sapat una langit, in tabori ut nama Tokodos na Nion.”

Luk 24:49

Tama i, i ra o Tita i sa uliliman taru uni, an tulu ru i torom mot. Ikut mot in kis ut nin una tamon ri, tuk ra din mar tar mot nama dekdek tagisapat netes.”

A Wakak na Wasiso un o Iesu Karisito o Jon i tumusi 1:17

Un o Moses, o God i pitar tar a Warkurai torom dat, ikut un o Iesu Karisito i pitar tar a marmaris ma a lingmulus torom dat.

A Wakak na Wasiso un o Iesu Karisito o Jon i tumusi 14:26

A Tene Warut, a Tokodos na Nion ra o Tita in tulu ru i una risang. In ususer mot una kum utna rop, ma in unuk tar mot melet nama kum wasiso ra a sa watung tari tamot.

A Wakak na Wasiso un o Iesu Karisito o Jon i tumusi 15:26

“An tulu ru a Tene Warut torom mot tagisapat tan o Tita, i a Tokodos na Nion ra in upuaso a lingmulus. Ra in nanpat in wasiso puaso un iau.

A Wakak na Wasiso un o Iesu Karisito o Jon i tumusi 3:33

Ikut det ra det nurnur una nun a wasiso, det mulaot lena o God i a lingmulus.

A Wakak na Wasiso un o Iesu Karisito o Jon i tumusi 6:27

Gong mot papam kut sur a utna na inangon ra i ser mereseng. Mot in papam sur a utna ra in kis tukum sur a nilaun kura numur, ra a Nutun a Musano in tabor mot nami. Uni o Tamano, o God i sa ese tari lena i mulaot un asau ra a Nutun a Musano i pami.”

Aposel 1:4

Un ara bung tagun a kum bung numur tan anun a katkatutur melet gusun a minat, det kis tomo una inangon, ra i turbat det lena, “Gong mot wan gusun o Jerusalem, mot in kis langlang pas a Tokodos na Nion, ra o Tita i sa uliliman taru uni, ra a sa inanos tar mot nami.

Aposel 13:26

“A kum tistising, a kabotaro anun o Abaram, ma mot a taro gisen kai ra mot lotu torom o God, di sa pitar tar a wasiso torom dat lena o God i sa ulaun pas a taro.

Aposel 2:33

Di ulabo pasi ma di ukis tari una sot na laman o God, ma o God o Tamano i pitar a Tokodos na Nion toromi, elar nami ra i uliliman tari nami. Ra uniri o Iesu i sa pitar pirso a utna ri, ra mot tama i, ma mot longoro i.

A Pas anun o Pol torom a taro Rom 1:16

Ka maimai una Wakak na Wasiso, uni i a dekdekin o God sur in ulaun pas a taro rop ra det nurnur. Torom met a taro Juda mugu, ma uniri torom mot kai, ra awu sur a taro Juda.

A Pas anun o Pol torom a taro Rom 4:11

Ra kabaut di tok talilis o Abaram, o God i watungi lena i tokodos umatano, kibino una nun a nurnur ut. Ra o Abaram i los pas a ukinalong na tinotok talilis, i ese i lena i tokodos umatan o God. I mo ra o Abaram a taman a taro ra ka di tok talilis det. Det nurnur, ra o God i watung det, det tokodos umatano.

A Pas anun o Pol torom a taro Rom 6:17

A watung wakak torom o God, uni numugu mot a kum tene ititula anun a sakino petutna, ikut uniri mot mur a kum etowo nama balamot rop. A kum etowo ra di pitar tari tamot.

2 Korin 1:22

I sa ubek tar anun a ukinalong un dat sur in talapor lena, dat anunu ut. Ma i ukis a Niono unin balandat, elar nama ukinalong ra numur dat in rakon a kum utna, ra o God i sa waninar tari sur dat.

2 Korin 6:7

Met watung a lingmulus, ma met papam nama dekdekin o God. Met pam ukai a tokodos na petutna, elar nam anumet a utna na inaim una sot na lamamet ma una kair kai.

Galesia 3:14

O Karisito i kul langolango pas dat, sur o God in watung udan a kum kamkabo taro rop, elar nami ra i watung udan o Abaram, ma sur in pitar a Tokodos na Nion torom dat, ra dat nurnur un o Karisito Iesu, elar ut nama nun a liliman.

Epeses 4:21

A tasmani lena di sa ususer tar mot un o Iesu ma mot sa longoro tari, ma mot tasman a lingmulusino ra i kis uni.

Epeses 4:30

Ma gong mot utupunuk a Tokodos na Nion o God, ra o God i sa ukinalong tar mot nami lena mot anunu. Ma a ukinalong ra, i ese i lena a bung in nanpat ra o God in ulangolango mot.

1 Tesalonaika 2:13

Ara kibino kai ra metul ser watung wakak torom o God i lenri: Ra mot rakon ukai a wasiso anun o God, ra mot longoro i ta metul, mot mulaot pasi. Awu sur mot mulaot pasi elar nama wasiso kut anun a taro, awu, mot mulaot pasi uni a wasiso ra, i a wasiso ut anun o God. A wasiso ra, kura i papam una nilaun anumot ra mot sa nurnur.

2 Timoti 2:15

Un pitar tar ui ut torom o God ma un dekdek sur ui a lingmulus na tene pinapam, ra o God in gas nami. A tene pinapam ra ke ser maimai una nun a pinapam, ma i palos kodos a lingmulus na wasiso.

2 Timoti 2:19

Ikut, o God i sa ubek tar a kibin a nurnur ra ken tugunu, ma di sa tumus tar a wasiso uni lena, “A Labino i tasman det ra anunu.” Nam 16:5 Ma di sa tumus tari kai lena, “I ra i watungi lena i anun a Labino, in nan gisen gusun a sakino petutna.”

2 Timoti 3:15

ma u tasman a Buk Tabu turpasi ra u natlik utmakai. A Buk Tabu i utalapor a nuknukim, sur un nurnur un o Karisito Iesu, ra o God in ulaun pas ui.

Taitus 2:11

Uni a marmaris anun o God i sa wanpat puaso. Una marmaris ra, o God i papos a kisapi sur in ulaun pas a taro rop.

Ibru 2:3

Ra i lenra, in pepetlai torom dat, ra dat rosumur gusun a labino pinapam na ulaun a taro ra o God i sa pam tari? Ka dat in kalabor eno lar pas gusun anun a warkurai na minabalu. A pinapam na ulaun a taro, a Labino ut i sa wasiso puaso mugu taru uni. Ma det ra det longoro in nalngano, det upuaso i torom dat lena i lingmulus sakit.

Jems 1:18

Una nun a nemnem ut, o God i usus matok dat nam anun a lingmulus na wasiso. I pilok pas dat gusun a kum utna na ukukis rop, sur dat in elar nama kum mugano wino duwai ra di ser etabor nami torom o God.

Jems 1:21

I mo ra mot in mana gusun a kum dur na petutna, ma a kum sakino, ra kuri i bukus una rakrakon bual. Ra mot in unatino pas mot, ma mot in mur a wasiso ra di sa marut tari una balbala mot, a wasiso anun o God ra in ulaun mot.

1 Pita 2:10

Numugu, awu sur mot a taro anun o God, ikut uniri mot anun a taro. Numugu ka mot rakon a marmaris anun o God, ikut uniri mot sa rakoni.

Tamtama 7:2

A tama pas ara ensel bulung i wanpat tagun a matmatano tobar, i pam pas a ukinalong anun o God, ra i laun. I kakabo namin labino walngano torom a wat na ensel ra di sa pitar tar a dekdek tandet sur det in ban laulau a bual ma a tasi.