2 Korin 3:5 - Nupela Testamen long tokples Kandas

⁵ Met tasmani lena, met ut ka met pet lar pasi sur met in pam a pinapam ri, ikut o God ut i warut met sur met in pami.

2 Korin 3:5 ပူးပေါင်းရင်းမြစ်များ

Luk 21:15

Uni iau ut, an unuk tar a wasiso ma a mananos kai una nuknuki mot, ra anumot a kum ebar rop, ka det in balu lar pasi, ma ka det in ipul ru i.

Luk 24:49

Tama i, i ra o Tita i sa uliliman taru uni, an tulu ru i torom mot. Ikut mot in kis ut nin una tamon ri, tuk ra din mar tar mot nama dekdek tagisapat netes.”

A Wakak na Wasiso un o Iesu Karisito o Jon i tumusi 15:5

“Iau ut in nanai na wain, ma mot a kum kanokano. Osi ra i laun un iau, ma iau a laun uni, in wu a susut na wino. Ikut ra mot laun gisen gusun iau, ka mot in pam lar pas tu utna.

A Pas anun o Pol torom a taro Rom 15:18

Ka nem na wasiso un tu utna gisen. A nem na wasiso kut una pinapam, ra o Karisito i sa pam tari ulamang, sur an ben a kum taro ra awu sur a taro Juda sur det in mur a wasiso anun o God. Det muri kibino una nung a kum wasiso ma anung a kum pinapam.

1 Korin 15:10

Ikut, o God i pitar tar a nilaun ri a laun nami, kibino ut una nun a marmaris. Ma ke urop oros tari kut anun a marmaris un iau, awu. A papam dekdek doko taun det rop. Ikut, awu sur iau ut a papam, a marmaris anun o God i papam tomo nam iau.

1 Korin 3:10

Kibino una marmaris anun o God ra i sa pitar tari tang, a papam elar nama tene pam rumu ra i mananos. A sa utur tar a kibin a rumu, ra ara taro bulung det papam netes uni. Det rop taktakai ra det papam netes uni, det in tumarong det una si na ngas na pinapam ra det in pami.

1 Korin 3:6

A marut a wino, o Apolos i pukpuki nama danim, ikut o God ut i ulubung pasi.

2 Korin 12:9

Ikut i watungi lenri tang, “Anung a marmaris torom ui sa sot, ma kon sibo sur tu utna gisen. Uni din tama pupuaso a dekdeking un ui ra kalako dekdekim.” I mo ra a gas doko sur an warango pas iau lena, kalako dekdeking, sur a dekdekin o Karisito in kis un iau.

2 Korin 2:16

A sangnain na minat torom det ra det wan sur a iniru, ma a sangnain na nilaun torom det ra o God i ulaun pas det. Osi ra i pet lar pas a pinapam ri?

2 Korin 4:7

A talapor ri, ra kuri un met, i a utna ra i wakak ma i labo doko. Ikut, met elar nama kum kuro oros kut ra di pami nama piso, sur in ese i lena, a labino dekdek ra kuri un met, tan o God ut, awu sur tagun met.

Pilipai 2:13

Uni o God ut i papam un mot sur mot in nem asau ra i elar nama nun a nemnem, ma i pitar a dekdek torom mot sur mot in pami lenra.

Pilipai 4:13

A pet lar pas a kum utna rop kibino un o Karisito ra i udekdek iau.

2 Timoti 2:2

A kum etowo ra u sa longoro pasi tang umatan a susut na taro, un ususer lako taro nami. A taro ra u nurnur un det lena det in pet lar pasi sur det in ususer lako taro kai nami.

Jems 1:17

A kum wakak na etabor rop, ra det tokodos sakit, det wan pirso tagisapat una langit. Det wanpat tan o Tita, i ra i ukis in matanas, a kalang ma a kum nangnang. Ikut o Tita ke ser keles, ma ke pukpukus anun a ngasino elar namin matanas, ra in sisio pas una waspi ma una mirum awu.