2 Korin 11:3 - Nupela Testamen long tokples Kandas

³ Ikut uniri, a ngara, sako din ben raro a nuknuki mot gusun anumot a petutna ra katu dur uni, ma anumot a nurnur mulus un o Karisito, elar namin nusui i toro pas o Iwa.

2 Korin 11:3 ပူးပေါင်းရင်းမြစ်များ

Matiu 24:24

Uni lako kum torotoro na Karisito, ma lako kum torotoro na poropet det in nanpat. Det in pam lako kum labino ukinalong ma lako kum utna na ukisin sur det in toro pas a taro ra o God i sa pilok pas det, raut ko det in pet lar pasi. Ikut ka det in pet lar pasi.

A Wakak na Wasiso un o Iesu Karisito o Jon i tumusi 8:44

A tamamot ra o Satan, ma mot nemi ut lena mot in mur anun a nemnem. Tagun numugu utmakai, i a tene um doko a taro, ma ke tasman a lingmulus, uni katu lingmulus i kis uni. Ra i watung a torotoro, i wasiso nam anun a wasiso mulus, uni i ut a tene torotoro ma a taman a torotoro.

A Pas anun o Pol torom a taro Rom 12:8

Ma osi ra o God i pitar tar a etabor na ururagot tano, i wakak sur in uragot a taro nami. Ma osi ra o God i pitar tar a etabor sur in tene etabor, i wakak sur in palos lamano torom a taro. Ma osi ra o God i pitar tar a etabor sur in mugumugu, i wakak sur in papam dekdek sur in mugu wakak a taro. Ma osi ra o God i pitar tar a etabor sur in tene marmaris, i wakak sur in maris a taro nama gasgas.

2 Korin 1:12

Iri a utna ra met warango met nami: a balamet ke takun met un tu utna, uni met tasmani lena, ka met toro, met muri ut a tokodos na petutna tan o God, una numet a nilaun nin upiso, ma una numet a kinkinis tomo nam mot. Ka met mur a mananos anun a taro, met papam murmuri ut a marmaris anun o God.

2 Korin 11:20

I lingmulus, mot gas pas det, ra det ukarabus mot ma det ban laulau mot, ma det urop ru anumot a kum utna ma det ulabo pas det umatamot, ma det pasor a kum masmasari mot.

2 Korin 11:29

Ra taio tagun det, anun a nurnur i kis pirso, iau kai a pining in ngoro. Ra taio tandet di sa ben tari una sakino, in balang in sungun nami.

2 Korin 2:17

Ka met elar nama susut na taro, ra det papam kut nama wasiso anun o God sur a mani. Ikut, un o Karisito met wasiso nama lingmulus umatan o God, uni i ut i tulu ru met.

2 Korin 4:2

Met sa mana gusun a kum sakino petutna ra di ser pam eno i, ma di ser maimai nami. Ka met papam nama torotoro, ma ka met palos raro a wasiso anun o God, awu. Met palos talapor a lingmulus na wasiso torom a taro, sur det in tasman lele i ut una nuknukin det lena, met watung a lingmulusino umatan o God.

Galesia 1:6

A kisin doko lena, ke suano i ra mot sa wan gisen pas gusun o God, i ra i kabo pas mot una marmaris anun o Karisito. Ra uniri, mot sa tupukus sur a se etowo.

Galesia 2:4

Met wasiso una utna ri, uni a ramano kum torotoro na tene nurnur det sa ruk eno taru torom a kum tene nurnur, elar nama kum tene longoro eno. Det nemi sur det in longoro wasiso una nundat a kinkinis langolango, ra dat sa utur ukai i tan o Karisito Iesu, sur det in ker tar dat melet una kum Warkurai anun a taro Juda.

Galesia 3:1

A taro Galesia, mot a kum longlong! Osi mo ra i sangsagor, ra i ulokolokor a nuknuki mot? A sa inanos talapor tar mot una minat anun o Iesu Karisito unin nanai kutus, i elar nami ra mot ut mot tama i.

Galesia 4:11

A ngara doko sur mot, sako anung a pinapam torom mot in utna oros kut.

Epeses 4:14

I mo ra ka dat in elar melet mo nama kum nat liklik, ra anundet a nurnur i elar nama utna ra a top i woro tuptupukusi utong ma urin. Ka dat in mur a kum etowo tan a kum tene torotoro, elar nama utna ra a wuwu i wup pukpukusi. Ka dat in mur det ra det nem na ben raro a taro nam anundet a kum namnamin na wasiso.

Epeses 4:22

Di ususer mot sur mot in nan gusun a ngas na nilaun ra mot muri numugu. Mot in palos ru i elar namin turai na malu, uni i laulau ma i toro dat sur dat in mur a kum sakino nemnem.

Epeses 6:24

A marmaris torom det rop ra det nem anundat a Labino o Iesu Karisito nama marmaris ra ken rop.

Kolosi 2:18

Ara taro det ser toro lena, det unatino pas det una nundet a ngas na lotu, ma det ser lotu torom a kum ensel, ma det ser wasiso una kum ririon ra det tama i. Gong mot madek tar det sur det in takun mot. Uni a ngas na musano ra, i uman labino kut nama nuknukino, ma a nuknukino i bukus nama kum laulau na nemnem ina pinino.

Kolosi 2:4

A watungi lenri torom mot, sur gong taio i toro pas mot nam tu namnamin na wasiso.

Kolosi 2:8

Mot in tumarong mot, sur gong taio i ukarabus mot nama mananos anun a taro kut, ra i a etowo oros kut ma a torotoro. A mananos ra, i wanpat kut tagun a kum etowo anun a kum tumtubun det tagun numugu, ma tan a kum laulau na nion tagun a rakrakon bual, ma awu sur tan o Karisito.

1 Tesalonaika 3:5

I mo ra a tulu ru o Timoti torom mot. A tulu ru i torom mot sur an mananos una numot a nurnur, uni a ngara doko un mot ma ka nem na kis liklik mo. A ngara, sako a tene ululam i sa ulam pas mot, ma anumetul a pinapam torom mot in utna oros kut.

1 Timoti 1:3

Uniri a udekdek melet ui sur un kis ut tiro o Epeses, elar nami ra a sa watung tari tam, ra a wan utong o Masedonia. Un kis sur un turbat det ra det ususer a taro nam lako kum torotoro na etowo.

1 Timoti 2:14

Awu sur o Adam ra o Satan i toro pasi. Awu! O Iwa kut ra o Satan i toro i ra i puku, ra i pam a sakino.

2 Timoti 3:13

A sakino taro ma a kum tene torotoro det in laulau, ma det in laulau sakit. Det in toro a taro, ma det in toro pas det utkai.

Taitus 1:10

Un pilok pas lako kum mugumugu na lotu, uni a susut na taro a kum tene pitarngat. Det ser wasiso una kum utna oros kut, ma det ben raro a nuknukin a taro. Ara taro tandet ra an utumarong ui un det, det ra det watungi lena, din tok talilis a pinin a taro ra awu sur a taro Juda.

Ibru 13:9

Gong mot mur a kum wur ngas na etowo ra i ben raro mot. I wakak ra a marmaris anun o God in udekdek a niondat. Ra dat mur a kum warkurai una utna na inangon, ken udekdek a niondat, ma ken warut det ra det ser mur a kum warkurai ra.

2 Pita 3:17

Ikut mot, a kum wakak na paspasang, mot sa tasman tar a kum utna ri. I mo ra mot in tumarong, sur gong a taro na lakai warkurai det ben raro mot nama nundet a kum etowo, sako mot in puku tagun a wakak na kinkinis ra uniri mot sa tur dekdek uni.

2 Pita 3:3

A labino utna sakit, mot in tasmani lena, una kum ururop na bung, a taro na urongon det in nanpat ra det in muri kut a kum sakino nemnem. Det in urongon laulau,

1 Jon 2:18

A kum nutnutung, uniri dat kis una kum ururop na bung. Mot sa longoro tari lena a ebar anun o Karisito in nanpat, ma uniri a susut na ebar ra, det sa wanpat. Iri dat sa tasmani lena a ururop na bung i sa milau.

1 Jon 4:1

A kum wakak na paspasang, gong mot nurnur oros un taio ra i watungi lena a Tokodos na Nion i pitar tar a wasiso toromi. I wakak sur mot in lari munung a kum nion, ra det tagun o God o awu. Uni, a susut na torotoro na poropet kuri det una rakrakon bual.

A Pas anun o Jud 1:4

A tumus a utna ri, uni ara taro det sa ruk eno taru torom mot. Ka det mur a nemnem anun o God, ma det in iru una warkurai anun o God, elar nami ra di sa tumus tari numugu utmakai una Buk Tabu. Det pukus laulau pas a marmaris anun o God, ra det watungi lena, “I wakak kut ra dat in pam a kum petutna na pamuk.” Ma det ipul ru i kut anundat a Mugumugu ma anundat a Labino o Iesu Karisito, i ara sot kut.

Tamtama 12:15

In nusui i muru ru a danim gusun a wano elar nama labino danim, sur in siliro ru a ino ra.

Tamtama 12:9

Di woro pirso ru in labino sui, in nusui tagun narap, ra di watungi a tene etakun, o Satan, i ra i ben raro a rakrakon bual rop. Di woro pirso ru i tomo nam anun a kum ensel urin upiso.

Tamtama 20:2

I pam sikot pas in labino sui, in nusui tagun narap, ra di watungi a tene etakun, ma o Satan. I sen ukai tari tuk ra ara arip na kilalo in rop.