1 Timoti 5:10 - Nupela Testamen long tokples Kandas

¹⁰ ra a taro rop det tasman anun a kum wakak na pinapam lenri: i ugu wakak a kum nat, i ser gas pas a taro una nun a rumu, i ser gos ru a kubus gusun a kikin a taro anun o God, i ser warut a taro ra a kum mamaut i los det, ma i pitar tar anun a nilaun sur a kum wakak na pinapam rop.

1 Timoti 5:10 ပူးပေါင်းရင်းမြစ်များ

Matiu 25:17

Lenkutkai ra torom o naro ra di pitar tar aru arip na mani tano, i ulabo melet pas aru arip taguni.

Matiu 5:16

Lenkutkai ra, anumot a talapor in sisio umatan a taro, sur det in tama anumot a kum wakak na pinapam, ma det in watung ulabo pas a Tamamot ra i kis sapat una langit.

Luk 7:38

Ma i tur taru numur tan o Iesu, nisan aru kikino. I tangis, ra a lurlur na matano i puku una ru kikin o Iesu, ma i wus der nama iwu na lorino, i gom der, ma i lingis in nopolo sangsangnain un der.

Luk 7:44

O Iesu i ger unago numur torom a ino, ma i watungi tan o Saimon lena, “Tama a ino ri. Ra a ruk una num a rumu ko pitar tar a danim sur din gos aru kiking nami. Ikut, a ino ri, i gos aru kiking nama lurlur na matano, ma i wus sengesenge der nama iwu na lorino.

Aposel 10:22

Detul balu i lena, “O Konelias, a mugumugu anun ara mar na taro na inaim i tulu ru metul. O Konelias i ara tene tokodos ma a tene urur un o God, ma a taro Juda rop det ru i. A ensel anun o God i inanos tari lena, in itula pas ui utong una nun a rumu, sur in longoro anum tu wasiso.”

Aposel 22:12

“Ara musano, a risano o Ananias, i ara lingmulus na tene lotu ra i ser mur a kum Warkurai anun o Moses, ma a taro Juda rop ra det kis tiro iai, det ser ru i. I wanpat torom iau,

Aposel 6:3

A kum tistisi met, mot in pilok pas lako wonom mawit na wakak na musano tagun mot, det ra det mananos ma det bukus nama Tokodos na Nion, sur met in pitar tar a pinapam na etabor ri torom det.

Aposel 9:36

Ara ino tagun a taro na ususer i kis tong o Jopa, a risano o Tabita, ma una wasiso Grik di watungi nam o Dokas. A ino ri, i ser pam a susut na wakak na pinapam, ma i ser tabor a sibo na taro.

Aposel 9:39

Ra o Pita i wan tomo nam detul. Ra i wanpat, det ben pasi usapat una kukur rumu sapat netes. Ra a kum ula rop det tur talilis pasi ma det domos. Det ese a kum kolos ma a kum malu, ra o Dokas i mabon tar det ra i laun utmakai.

A Pas anun o Pol torom a taro Rom 12:13

Ra a taro anun o God det sibo sur tu utna, mot in warut det. Mot in dekdek sur mot in gas pas a kum usiro.

Epeses 2:10

Dat a sap na laman o God. Dat tagun o Karisito Iesu, ma o God i ukis dat sur dat in pam a kum wakak na pinapam, ra o God i sa waninar tari sur dat in pami.

Kolosi 1:10

Mir wararing lenri, sur anumot a nilaun in elar nama petutna anun a Labino, ra mot in ser pam a kum utna ra in gas uni. Ra in lenra, anumot a nilaun in wu a wimot una kum wakak na pinapam rop ra mot in pami, ma mot in lubung una numot a tastasman un o God.

1 Timoti 2:10

A wardain ra det watungi lena det ser lotu torom o God, det in emar nama kum wakak na pinapam.

1 Timoti 3:2

A magiran a mugumugu na lotu in lenri: gong tu etakun i kis uni, in nolin kut nam ara ino, in tumarong a magirano, in tamtamabat wakak anun a nilaun, i a ngas na musano ra a taro det ser urur uni, in ser gas pas a taro una nun a rumu, ma i a wakak na tene ususer.

1 Timoti 3:7

I wakak sur a mugumugu i a ngas na musano ra a taro kai ra ka det ser lotu, det ser ru i. Ra awu, det in watung suri una nun a kum sakino petutna, ma in iru unin nukun anun o Satan.

1 Timoti 5:16

Ra tu ino a tene nurnur, ma tu ula kura una nun a kabotaro, i wakak sur in tamtamabati, sur gong a taro na lotu det balon uni. A taro na lotu det in balon kut una kum ula ra kataio sur in tamtamabat det ma det sibo mulus.

1 Timoti 5:25

Lenkutkai ra, una kum wakak na pinapam. A kum wakak na pinapam anun a ramano taro i sa wanpat talapor. Ikut, anun ara taro kai, ka din tama lele i uniri, numur ut in nanpat talapor.

1 Timoti 6:18

Un inanos det sur det in pam a wakakino, ma det in bukus nama kum wakak na pinapam, det in ser etabor, ma det in ser isuaro a utna kai torom lako taro.

2 Timoti 1:5

A nuk pas anum a lingmulus na nurnur, ra i elar nama nurnur anun aru ino ri, o tubum o Lois ma o nam o Unis. A tasmani lena a ngas na nurnur ra, kura kai un ui.

2 Timoti 2:21

Ra taio in utalapor pas anun a nilaun gusun a kum dur na petutna, in elar nama dis tagun a kum lamlabino bung. Uni, i, anun a Labino, ra a Labino in papam una nun a nilaun sur in pam a pinapam anun a Labino, ma i sa kis waninar sur in pam a kum wakak na pinapam.

2 Timoti 3:15

ma u tasman a Buk Tabu turpasi ra u natlik utmakai. A Buk Tabu i utalapor a nuknukim, sur un nurnur un o Karisito Iesu, ra o God in ulaun pas ui.

2 Timoti 3:17

A Buk Tabu i waninar a taro anun o God sur det in pam a kum ngas na wakak na pinapam rop.

Taitus 2:14

I pitar tar anun a nilaun sur dat, sur in kul langolango pas dat gusun anundat a kum sakino petutna rop, ma in gos talapor pas dat, sur dat anun a taro mulus ut, ra dat nem doko i sur dat in pam a kum wakak na pinapam.

Taitus 2:7

Una kum utna rop ra u pami, un pam a wakakino, sur a wakak na etowo torom det. Ra u ususer det, un papam nama lingmulus, ma a urur.

Taitus 3:1

Un inanos melet anum a taro sur det in urur torom a kum mugumugu tagun a gapman, ma torom det rop ra a warkurai kura un det. Det in mur anundet a kum wasiso, ma det in kis na waninar sur det in pam a kum wakak na pinapam.

Taitus 3:14

Anundat a taro, det in lason sur det in pitar mulus tar det una wakak na pinapam, sur det in wu a wakak na windet una anundet a nilaun, ma det in warut a sibo na taro.

Taitus 3:8

A kum wasiso ri i lingmulus sakit. Ma a nemi sur un papam dekdek nami, sur a taro ra det nurnur un o God, det in pitar mulus tar det una wakak na pinapam una nundet a kum bung na nilaun. A kum wasiso ri i wakak ma i warut a taro rop.

Ibru 10:24

Dat in nuknuk sur lako kum kisapi sur dat in wangun etalai a nuknukin dat sur dat in nem a taro ma dat in pam a kum wakak na pinapam.

Ibru 13:2

Gong mot dumano i sur mot in gas pas a kum usiro. Uni ara taro ra det pam a ngasino ra, det sa gas pas a kum ensel, ikut ka det tasmani.

Ibru 13:21

A wararing torom o God sur in tabor mot nama kum wakak na petutna rop, sur mot in mur anun a nemnem. A wararing kai un dat, lena, una pinapam anun o Iesu Karisito, o God in papam una nilaun anundat sur asau ra in gas nami. Dat in watung ulabo pas o Iesu Karisito, ken rop ma ken rop. Amen.

1 Pita 2:12

Mot in pam a wakak na petutna epotor tan a taro ra ka det nurnur, sur det ra det takun mot lena mot a kum tene pam sakino, det in tama anumot a kum wakak na pinapam, ma det in watung ulabo pas o God una bung ra in nanpat uni.

1 Pita 4:9

Mot in gas etetalai pas mot una anumot a kum rumu, ma gong mot pami nama wasiso na ururai.

3 Jon 1:12

A taro rop det watungi un o Dimitrius lena, i ara wakak na musano. A magirano ra i mur a lingmulusino i ese i kai lena i ara wakak na musano. Met kai met wasiso talapor uni, ma u tasmani lena, anumet a kum wasiso i lingmulus.