1 Tesalonaika 2:14 - Nupela Testamen long tokples Kandas

¹⁴ A kum tistisi metul, mot elar nama taro na lotu anun o God un o Karisito Iesu, ra det kis tong una papor Judia. Uni, mot kai, mot taramo a ngunungut tan a taro tagun anumot a tamon ut, elar nama taro na lotu tong o Judia det taramo i tan anundet a taro ut, a taro Juda,

1 Tesalonaika 2:14 ပူးပေါင်းရင်းမြစ်များ

Aposel 11:19

A taro na nurnur ra det wan sarara tagisapat o Jerusalem, uni di ban laulau det numur tan a minatin o Stiwen, det wan bakbak utong o Saipras, ma una papor Ponisia, ma a tamon Antiok. Det wasiso torom a taro Juda kut nama Wakak na Wasiso un o Iesu.

Aposel 13:50

Ikut a kum te Juda, det ukatutur a nuknukin a kum mugumugu na ino ra det ser urur torom o God, ma a nuknukin a kum mugumugu na musano kai tagun a tamon ra, sur det in ban laulau o Pol ma o Banabas. Ma det lakro ru der gusun anundet a papor.

Aposel 14:19

Numur a ramano kum te Juda det wanpat tagitong o Antiok ma o Aikoniam, ra det dat pukus pas a nuknukin a susut na taro gusun o Pol der nam o Banabas. Det duku o Pol nama watat, ma det dat pirso ru i gusun a tamon, ra det nuki lena i sa mat.

Aposel 14:2

Ikut a ramano taro Juda ra ka det nem na nurnur, det usungun balan a ramano taro ra awu sur a taro Juda. Det ban laulau a nuknukin det sur det in kankan torom det ra det tar tistisino una nurnur.

Aposel 14:4

A taro tagun a tamon ra det tapagol, ara taro det tur tomo nama taro Juda ra ka det nurnur, ma ara taro det tur tomo nama aru aposel.

Aposel 14:5

A ramano taro Juda ma ara taro kai ra awu sur a taro Juda tomo nam anundet a kum mugumugu, det epak pas sur det in ban laulau o Pol der, ma det in duku doko der nama watat.

Aposel 17:13

Ikut a taro Juda kurong o Tesalonaika det longoro i lena o Pol i warawai una wasiso anun o God tong o Beria, ra det wan utong ma det usungun balan a taro.

Aposel 18:12

Una kilalo ra o Galio i mugumugu tagun a gapman tong una papor Akaia, a taro Juda det tur tomo sur det in um o Pol, ma det beni sur in tur una warkurai.

Aposel 8:1

Ra o Sol i mulaot sur din um doko o Stiwen. Una bung ra di um doko o Stiwen, a taro det turpasi sur det in ukadik a taro na lotu sapat o Jerusalem, ma a taro na nurnur rop det wan sarara una aru papor Judia ma o Samaria. Ikut, a kum aposel ka det wan, det kis ut.

Aposel 8:3

Ra o Sol i ban laulau a taro na lotu. I ruk una nundet a kum rumu, i dat pas a kum musano ma a wardain, ra i uruk tar det una karabus.

Aposel 9:1

Una kum bung ra, o Sol i ungara a taro na ususer anun a Labino nama dekdek na wasiso lena, in um doko det. I wan torom a mugumugu na tene etabor torom o God,

Aposel 9:13

Ra o Ananias i balu i lena, “Labino, a sa longoro a susut na wasiso una musano ra, ma una kum laulau na utna ra i ser pami una num a taro sapat o Jerusalem.

Aposel 9:31

Numur a taro na lotu tong una tulu papor Judia, Galili ma o Samaria, det kis na malmal. Det kis nama urur torom a Labino, ra a Tokodos na Nion i uragot det. Ra a niluluk ina taro na nurnur i labo nanan.

1 Korin 10:32

Gong mot pam tu utna ra in upuku taio tagun a taro Juda, o tagun a taro ra awu sur a taro Juda, o tagun a taro na lotu anun o God.

1 Korin 7:17

Arara in laun ut elar nama nilaun ra a Labino i pitar tari tano, ma elar nama ngas na kinkinis ra kura tano, ra o God i kabo pasi. A pitar a warkurai ri torom a taro na lotu una kum tamon rop.

Galesia 1:22

Ikut a taro na lotu anun o Karisito tong una papor Judia ka det tasman iau.

1 Tesalonaika 1:1

Iau o Pol, o Sailas, ma o Timoti, metul tumtumus torom mot a taro na lotu tong o Tesalonaika, mot ra mot laun un o God a Tamandat ma a Labino o Iesu Karisito. A marmaris ma a malmal torom mot.

1 Tesalonaika 1:6

Mot sa mur pas a magirametul ma a magiran a Labino. A taro det ban laulau mot, ikut mot pam ukai a wasiso nama gasgas, ra a Tokodos na Nion i pitar tari tamot.

1 Tesalonaika 3:4

Ra dat kis tomo utmakai, metul ser inanos mot lena, din ban laulau dat. Ma mot sa tasmani lena, a kum mamaut ra, i sa wanpat ut.

2 Tesalonaika 1:1

Iau o Pol, o Sailas ma o Timoti, metul tumtumus torom mot a taro na lotu tong o Tesalonaika, mot ra mot laun un o God a Tamandat ma a Labino o Iesu Karisito.

2 Tesalonaika 1:4

I mo ra, metul ut metul ser warango pas mot torom a taro na lotu anun o God una kum tamon. Metul ser warango pas mot una numot a tuntunur dekdek ma anumot a nurnur, ubalan a kum mamaut ra mot taramo i ma a kum ngunungut ra a taro det ban laulau mot nami.