1 Tesalonaika 1:5 - Nupela Testamen long tokples Kandas

⁵ uni a Wakak na Wasiso ra metul upuaso i, awu sur i wanpat torom mot elar nama wasiso kut, awu. I wanpat tomo nama dekdek ma a Tokodos na Nion, ma mot longoro lele i ra mot pam ukai i una balamot. Ra metul laun nisamot, mot tasman wakak a magirametul, ra metul ser upuaso i sur in uwakak mot.

1 Tesalonaika 1:5 ပူးပေါင်းရင်းမြစ်များ

A Wakak na Wasiso un o Iesu Karisito o Mak i tumusi 16:20

Anun a kum nat na ususer det wan, ma det warawai tuptupukus. Ma a Labino i papam tomo nam det, ma i ulingmulus anun a wasiso nama kum utna na ukisin.]

Luk 1:1

Torom o Tiopilus, A susut det lari ra det sa pam sot pas a tumtumus una kum utna ra i wanpat epotor tamet.

Aposel 11:21

A dekdekin a Labino i kis un det ra det wasiso, ma a susut na taro doko det nurnur ma det tupukus torom a Labino.

Aposel 16:14

Ara ino tagun det ra det longoro met, a risano o Lidia, a ino tagitong o Taiataira, a tene siuru pepol na malu ma a tene lotu torom o God. Ra a Labino i pukus pas anun a nilaun sur in mur a kum wasiso ra o Pol i watungi.

Aposel 2:33

Di ulabo pasi ma di ukis tari una sot na laman o God, ma o God o Tamano i pitar a Tokodos na Nion toromi, elar nami ra i uliliman tari nami. Ra uniri o Iesu i sa pitar pirso a utna ri, ra mot tama i, ma mot longoro i.

A Pas anun o Pol torom a taro Rom 1:16

Ka maimai una Wakak na Wasiso, uni i a dekdekin o God sur in ulaun pas a taro rop ra det nurnur. Torom met a taro Juda mugu, ma uniri torom mot kai, ra awu sur a taro Juda.

A Pas anun o Pol torom a taro Rom 15:13

A wararing torom o God, i ra dat kis langlang suri nama nurnur sur a wakakino ra in pami. A wararing sur in ubukus mot ra mot nurnur uni nama labino gasgas ma a malmal. Ma una dekdekin a Tokodos na Nion ut, mot in kis langlang nama labino nurnur sur a wakakino, ra numur o God in pami.

A Pas anun o Pol torom a taro Rom 2:16

Una bung na warkurai, o God in pitar tar a warkurai torom o Iesu Karisito, sur in warkurai det, una kum utna i kis eno una nuknukin det. Ra a ser warawai nama Wakak na Wasiso, a ser warawai una kum utna ri.

1 Korin 1:24

Ikut, o Karisito a dekdekin o God, ma a mananos anun o God, torom a taro ra o God i kabo pas det. A taro ra, tagun a taro Juda ma tagun a taro Grik.

1 Korin 10:33

A nemi sur an ugasgas a taro rop una kum utna rop ra a ser pami. Ka pam tu utna sur in uwakak iau, awu, a pam a kum utna sur in uwakak lako susut na taro, sur o God in ulaun pas det.

1 Korin 3:16

Pepetlai, ka mot tasmani lena mot a rumu anun o God, ma a Nion o God kura un mot?

1 Korin 3:6

A marut a wino, o Apolos i pukpuki nama danim, ikut o God ut i ulubung pasi.

1 Korin 4:20

Uni a matanitu anun o God awu sur tagun a wasiso, tagun a dekdek ut.

1 Korin 9:14

Lenkutkai ra, a Labino i warkurai tari lena, det ra det warawai nama Wakak na Wasiso, det in los a ikul tagun a Wakak na Wasiso sur det in laun nami.

2 Korin 3:6

I ut i ukis tar met sur met a kum tene pinapam una matok na kunubus, ma i pitar tar a dekdek tamet sur met in papam nami. A matok na kunubus ri, awu sur tagun a kum wasiso na Warkurai ra di sa tumus tari, i kibino pas ut una Tokodos na Nion. A wasiso na Warkurai i pitar pati kut a minat, ikut a Tokodos na Nion i pitar a nilaun.

Galesia 2:2

A wan uni o God ut i inanos iau sur an nan. A etorom det ra di watung det nama kum mugumugu anun a kum tene nurnur. Ra met kut met kis, a inanos det nama Wakak na Wasiso ra a ser warawai nami torom a taro ra awu sur a taro Juda. A nemi sur det in mulaot uni, sur gong i utna oros kut anung a pinapam na warawai tagitiro ut tuk uniri.

Galesia 5:5

Ikut dat, una dekdekin a Tokodos na Nion dat kis langlang nama nurnur sur o God in watung dat lena a kum tene tokodos uni dat nurnur.

Epeses 2:10

Dat a sap na laman o God. Dat tagun o Karisito Iesu, ma o God i ukis dat sur dat in pam a kum wakak na pinapam, ra o God i sa waninar tari sur dat in pami.

Epeses 3:20

Dat in rakon lekeleke pas o God, o naro ra i dekdek, ma i pet lari sur in pam a utna ra i labo sakit taun a kum utna rop ra dat sasaring suri, ma dat nuki. Ma i papam nama dekdekino una nundat a nilaun.

Pilipai 2:13

Uni o God ut i papam un mot sur mot in nem asau ra i elar nama nun a nemnem, ma i pitar a dekdek torom mot sur mot in pami lenra.

Pilipai 4:9

Asau ra mot sa ususer pasi tagun iau, o mot sa rakon pasi, o mot sa longoro tari tagun iau, o mot sa tama tari un iau, mot in muri. Ra o God a tene malmal in kis tomo nam mot.

Kolosi 2:2

A pami lenra, sur in uragot anundet a nilaun, ma det in kis na marmaris tomo, sur det in bukus nama labino mananos, sur det in tasman a utna anun o God, ra numugu i kis eno, i ra o Karisito ut.

1 Tesalonaika 2:13

Ara kibino kai ra metul ser watung wakak torom o God i lenri: Ra mot rakon ukai a wasiso anun o God, ra mot longoro i ta metul, mot mulaot pasi. Awu sur mot mulaot pasi elar nama wasiso kut anun a taro, awu, mot mulaot pasi uni a wasiso ra, i a wasiso ut anun o God. A wasiso ra, kura i papam una nilaun anumot ra mot sa nurnur.

2 Tesalonaika 2:14

Una Wakak na Wasiso ra metul warawai nami, o God i kabo pas mot sur in ulaun mot, sur mot in los a tinibo kai tagun a minamar anun anundat a Labino o Iesu Karisito.

2 Timoti 2:10

I mo ra a taramo a kum ngunungut, ikut a tur dekdek ut, sur det ra o God i sa pilok pas det, det kai det in nurnur un o Karisito Iesu ma in ulaun pas det, ma det in los a minamar tukum.

2 Timoti 2:8

Un nuk pas o Iesu Karisito, i ra tagun a kabotaro anun o Dewid, ra i katutur melet gusun a minat. Iri a Wakak na Wasiso ra a warawai nami.

Ibru 10:22

I mo ra, dat in nan milau o God nama lingmulus unin balandat ma a nurnur mulus, ma a nuknukin dat ra i langolango gusun a kum etakun una kum sakino petutna, uni o Iesu i sa lamir talapor tari nama gapino. Dat in nan milau i nama pinindat ra i sa gos tari nama danim ra i talapor.

Ibru 6:11

Anumet a labino nemnem sur mot rop taktakai mot in dekdek una marmaris lenutra mot ser pami, tuk una ururopino. Mot in pami lenra, sur a kum utna ra mot kis langlang nama nurnur suri, in nanpat mulus ut torom mot.

1 Pita 1:12

O God i upuaso i torom a kum poropet lena, a kum utna ri, awu sur in nanpat una anundet a kum kilalo na nilaun, awu, o God in pami ut torom mot. Ra uniri, mot sa longoro tari tan a taro ra det warawai nama Wakak na Wasiso torom mot, nama dekdekin a Tokodos na Nion, i ra di tulu pirso ru i tagisapat una langit. Ma a kum ensel kai, det nem doko i, sur det in tama a kum utna ri.

1 Pita 1:3

Dat in watung ulabo pas o God, a Taman anundat a Labino o Iesu Karisito. Una nun a labino marmaris, i sa usus matok tar dat. I mo ra uniri, dat kis langlang nama nurnur sur a nilaun tukum, uni o Iesu Karisito i katutur melet gusun a minat,

1 Pita 5:3

Gong mot ulabo pas mot, ma mot warkurai dekdek det, ra di sa pitar tar det una numot a tamtamabat. A magiramot in wakak sur a kum sipsip det in tama i ma det in muri.

2 Pita 1:10

I mo ra a kum tistising, mot in papam dekdek sur mot in ese i una numot a nilaun lena, o God i sa kabo pas mot ma i pilok pas mot. Ra mot in pami lenra, ka mot in puku,

2 Pita 1:19

A kum utna ra met tama i, i ulingmulus pas a wasiso anun a kum poropet torom dat, ma i wakak sur mot in longoro i. Uni a wasiso anun a kum poropet i elar nama lam ra i kunabor una dumirum, tuk una lar, ra in borodo in utalapor anumot a nilaun.