1 Pita 3:18 - Nupela Testamen long tokples Kandas

¹⁸ Uni o Karisito kai i taramo a ngunungut ra i mat ara dino kut, una nundat a kum sakino petutna. A Tene Tokodos i mat sur det ra ka det tokodos, sur in ben pas mot torom o God. Det um doko ru a pinino, ikut di ulaun pasi una nion.

1 Pita 3:18 ပူးပေါင်းရင်းမြစ်များ

Matiu 27:19

Ra o Pailat kura utmakai i pam a warkurai, anun a ino i pitar ru a wasiso toromi lena, “Gong u pam tu utna una tene tokodos ra, katu niraro anunu. Uni nanganong mirum, a ririon, ma a kum utna a tama i una musano ra, i ban laulau anung a nilaun.”

Matiu 27:24

O Pailat i tama i lena, ke pet lar pas tu utna mo, ma a labino purpuruon milau in nanpat. Ra i los pas a danim, i gos pas aru lamano umatan a kunur na taro, ra i watungi lena, “A langolango gusun a gapin a tene tokodos ri. Mot ut din warkurai mot uni.”

A Wakak na Wasiso un o Iesu Karisito o Jon i tumusi 16:10

Ma in ese det kai una tokodos na petutna, uni an nan torom o Tita ma ka mot in tama melet iau mo.

Aposel 22:14

Ra o Ananias i watungi tang lena, ‘O God anun anundat a kabotaro tagun numugu i sa pilok tar ui, sur un tasman anun a nemnem, ma un tama a Tene Tokodos, ma un longoro anun a wasiso.

Aposel 3:14

Mot ipul ru a Tasur na Musano ma a Tene Tokodos, ra mot sasaring sur din palos tar a tene umum doko a taro torom mot.

A Pas anun o Pol torom a taro Rom 1:4

Ma una nun a katkatutur melet gusun a minat, a Tokodos na Nion i ese i lena, i a Nutun o God ma i dekdek. I ut o Iesu Karisito anundat a Labino.

A Pas anun o Pol torom a taro Rom 4:25

O God i pitar ru o Iesu, sur in mat una nundat a kum sakino petutna, ma i ukatutur melet pasi gusun a minat, sur dat in tokodos umatan o God.

A Pas anun o Pol torom a taro Rom 5:2

Ra dat nurnur un o Karisito, i mugu dat ma i uruk dat una marmaris anun o God. Ra uniri, dat sa laun uni. Ma dat gas, ra dat kis langlang nama nurnur sur a minamar anun o God, ra kura numur dat in kis uni.

A Pas anun o Pol torom a taro Rom 8:11

A Nion o God, ra i ukatutur pas o Iesu gusun a minat, i laun un mot. Una pinapam anun a Niono ra i laun un mot, i ra i ukatutur pas o Karisito gusun a minat, in pitar a nilaun una pinimot, ra i ser mat.

A Pas anun o Pol torom a taro Rom 8:3

A kum Warkurai anun o Moses ken pet lar pasi sur in turbat a sakino, uni a sakino nemnem ina pinindat, kalako dekdekino sur in mur a kum Warkurai. Ikut o God i pet lar pasi. I tulu ru o Nutunu urin upiso ma i wanpat a mulusino elar nam dat, a taro na pam sakino. I mat ma i sa ulaun pas dat gusun anundat a sakino. A warkurai na minabalu una kum sakino petutna anundat, o God i ubek tari una pinin o Iesu, ma i urop a dekdekin a sakino petutna.

2 Korin 1:24

Awu sur met nem na warkurai sur a nurnur anumot. Met nemi kut sur met in papam tomo nam mot, sur mot in gas, uni mot sa tur dekdek una nurnur.

2 Korin 13:4

I lingmulus, ra di sak wat o Karisito unin nanai kutus, katu dekdekino. Ikut una dekdekin o God, i laun melet. Lenkutkai ra kalako dekdeki met tomo nam o Karisito, ikut met laun tomo nami nama dekdekin o God, sur met in papam torom mot.

2 Korin 5:21

O Karisito ke pam tu sakino petutna, ikut o God i ubek tar anundat a sakino petutna netes uni, sur dat ra tagun o Karisito, dat in rakon a tokodos na petutna anun o God.

Galesia 1:4

O Iesu i ubek ru anun a nilaun una anundat a kum sakino petutna, sur in ulaun dat gusun a kum sakino petutna ra a taro det pami una kum kilalo ri. I elar nama nemnem anun anundat a God a Tamandat.

Galesia 3:13

A kum Warkurai i ubek tar dat una dekdek na kankan anun o God. Ikut o Karisito i kul langolango pas dat gusun a kankan ra. I ut i tur keles dat, ra i rakon pas a dekdek na kankan. I elar nami ra di sa tumus tari una Buk Tabu lena, “Osi ra di ukete i netes unin nanai, a dekdek na kankan anun o God i kis uni.” Lo 21:23

Epeses 3:12

Dat langolango sur dat in nan torom o God ma ka dat in ngara, uni dat tagun o Karisito ma dat nurnur uni.

Taitus 2:14

I pitar tar anun a nilaun sur dat, sur in kul langolango pas dat gusun anundat a kum sakino petutna rop, ma in gos talapor pas dat, sur dat anun a taro mulus ut, ra dat nem doko i sur dat in pam a kum wakak na pinapam.

Ibru 10:10

O Iesu Karisito i mur sot pas a nemnem anun o God ra i pitar tar a pinino ut, sur a etabor torom o God. I pitar tari ara dino kut ma ken pam meleti mo. Ra anun a etabor ra i gos talapor pas dat umatan o God.

Ibru 9:14

Ra i lingmulus lena di gos talapor a taro lenra, i lingmulus sakit ra a gapin o Karisito i gos talapor dat! Una dekdekin a Tokodos na Nion ra i kis tukum, o Karisito i pitar tar anun a nilaun torom o God. Anun a nilaun katu dur uni. Ra a gapino i gos talapor anundat a nilaun gusun a kum minat na pinapam ra dat in iru uni, sur dat in papam torom o God ra i laun.

Ibru 9:26

Ra gunuk o Karisito in pitar tari ut sur i a etabor torom o God una kum kilalo rop, in iru a susut na dino, turpasi ut una turturkibin ina rakrakon bual. Ikut una kum ururop na bung i wanpat ara dino kut. I pitar tari ut sur i a etabor torom o God sur in kamar ru a kum sakino petutna, ma ken pam meleti mo.

Ibru 9:28

Lenkutkai ra o Karisito i pitar tari ut sur i a etabor torom o God ara dino kut, sur in los gisen ru a kum sakino petutna anun a susut na taro. Ma in nanpat melet a manru na dino. Awu mo sur in los gisen ru a kum sakino petutna, awu. In nanpat sur in ulaun pas det ra det kis langlang suri.

Jems 5:6

Mot ben tar a kum tene tokodos una warkurai, ra mot um doko det, ikut ka det balu mot.

1 Pita 3:19

Ma i wan ra i warawai torom a kum nion ra det kis na karabus.

1 Pita 4:1

O Karisito i taramo a ngunungut una pinino. I mo ra, mot kai, mot in waninar sur mot in taramo a ngunungut elar nami. Uni osi ra i taramo a ngunungut una pinino, i sa mana gusun a pam a sakino petutna.

1 Pita 4:6

Iri a kibino ra di sa warawai taru nama Wakak na Wasiso torom a taro ra uniri det sa mat. Ra det mat det los a warkurai una pinindet, elar nama taro rop, ikut di warawai torom det sur a niondet in laun elar nam o God i laun.

1 Jon 1:9

Ra dat watung puaso anundat a kum sakino petutna, o God ut i tokodos, ma in pam sot pas anun a liliman, ma in unus ru anundat a kum sakino petutna, ma in utalapor dat gusun a kum petutna ra ke tokodos.