1 Korin 6:11 - Nupela Testamen long tokples Kandas

¹¹ Ara taro tagun mot, numugu mot ser pam a kum ngasino ri. Ikut, una risan a Labino o Iesu Karisito, ma una Nion o God anundat, o God i sa gos talapor pas mot gusun anumot a kum sakino petutna, sur mot anun a taro, ma i sa watung mot lena mot tokodos umatano.

1 Korin 6:11 ပူးပေါင်းရင်းမြစ်များ

Matiu 20:4

Ra i watungi tandet lena, ‘Mot kai, mot in nan, ma mot in papam una nung a kinobot na wain, ma an tokom mot nama sau ra i tokodos.’

Luk 18:14

A watungi tamot, a musano ri, ra i milet melet sur anun a rumu, i sa tokodos umatan o God, ma ara pasander awu. Uni det rop ra det ulabo pas det, din unatino det. Ma osi ra i unatino pasi, din ulabo pasi.”

A Wakak na Wasiso un o Iesu Karisito o Jon i tumusi 13:10

O Iesu i watungi tano lena, “Osi ra i sa rurus pas, a pinino rop i sa talapor, din gos tar aru kikino mukut. Mot, mot sa talapor, ikut, awu sur mot rop.”

A Wakak na Wasiso un o Iesu Karisito o Jon i tumusi 13:8

O Pita i watungi lena, “Gong! Gong u gos aru kiking.” O Iesu i balu i lena, “Ra kan gos aru kikim, ui awu sur ara tagun iau.”

Aposel 13:39

Ikut, det rop ra det nurnur un o Iesu, din watung det a kum tene tokodos.

Aposel 22:16

Ra sau mo ra u kis pasi? Un tur, ma din baptaiso ui, ma una risano, un wararing sur din unus ru anum a kum sakino petutna.’

Aposel 26:18

Un utamtama det sur det in tupukus gusun a dumirum sur a talapor, ma gusun a dekdekin o Satan sur o God, sur din unus ru anundet a kum sakino petutna. Det in nurnur un iau, ma una nundet a nurnur, det in kis tomo nam det ra o God i sa pilok pas det sur anun a taro.’

A Pas anun o Pol torom a taro Rom 3:24

Ikut, una marmaris anun o God, o God i watung det lena det tokodos. I pami lenra elar nama etabor oros kut, uni o Karisito Iesu i kul langolango pas det.

A Pas anun o Pol torom a taro Rom 4:5

Ikut o God ken watung taio lena i tokodos uni i pam tar a pinapam. In watungi lena, i tokodos uni i nurnur. Uni i nurnur un o God ra i ser watung a kum tene sakino lena det tokodos.

A Pas anun o Pol torom a taro Rom 5:1

Una nundat a nurnur ut, o God i watung dat lena dat tokodos umatano. I mo ra dat kis na malmal tomo nam o God, kibino una nundat a Labino o Iesu Karisito.

A Pas anun o Pol torom a taro Rom 5:9

Ma una gapin o Iesu, o God i watung dat lena dat tokodos umatano. I mo ra i lingmulus sakit lena, o Iesu in ulaun pas dat gusun a kankan anun o God, una bung na warkurai.

A Pas anun o Pol torom a taro Rom 8:30

Ma det ra o God i sa pilok pas det, i kabo pas det kai. Ma det ra i sa kabo pas det, i watung det, det tokodos umatano. Ma det ra i watung det, det tokodos umatano, i pitari kai a minamar torom det.

A Pas anun o Pol torom a taro Rom 8:33

Osi ra in takun a taro na pipilok anun o God? Katutaio in pet lar pasi, uni o God ut i sa watung tar dat lena dat tokodos umatano.

1 Korin 1:2

torom mot a taro na lotu anun o God ra mot kis tiro o Korin. Mot ra o Karisito Iesu i gos talapor pas anumot a nilaun, ma i kabo pas mot sur mot a taro anun o God. Mot a taro anun o God tomo nama taro rop una kum tamon rop ra det lotu una risan anundat a Labino o Iesu Karisito, i ra a Labino anundet ma anundat kai.

1 Korin 1:30

O God ut i sa pam tar a kisapi sur mot in laun tomo nam o Karisito Iesu, ma i pitar tari sur i a kimkibin anundat a mananos. Un o Karisito, o God i watung dat lena dat tokodos umatano, ma dat anun a taro. Ma una pinapam anun o Karisito, o God i kul langolango pas dat gusun anundat a kum sakino petutna.

1 Korin 12:2

Mot tasmani lena, ra ka mot nurnur utmakai, di ben raro pas mot torom a kum torotoro na god ra ka det ser wasiso, ma mot lotu torom det.

Galesia 2:16

Ikut, dat tasmani lena o God ke watung taio a tene tokodos uni i mur a kum Warkurai anun o Moses. Awu! O God in watung taio a tene tokodos uni i nurnur kut un o Iesu Karisito. Lenkutkai ra torom dat, dat nurnur un o Karisito Iesu, sur dat in tokodos umatan o God. Dat tokodos uni dat nurnur un o Karisito, ma awu sur i kibino uni dat mur a kum Warkurai. Uni o God ken watung taio a tene tokodos ra i mur a kum Warkurai.

Galesia 3:11

Katutaio in mur sot rop pas a kum Warkurai rop. I mo ra, i talapor lena, o God ken watung taio a tene tokodos, uni i mur a kum Warkurai. A Buk Tabu i watungi lenri, “Osi kut ra i nurnur, o God in watungi a tene tokodos ma in laun.” Hab 2:4

Galesia 3:24

A Warkurai i elar kut nama tene tamtamabat torom dat, sur in ben dat torom o Karisito, sur dat in nurnur uni, ra o God in watung dat lena dat tokodos.

Galesia 3:8

A Buk Tabu i sa wasiso mugu taru lena, o God in watung a taro ra awu sur a taro Juda lena det a kum tene tokodos uni det nurnur. O God i sa inanos mugu tar o Abaram una Wakak na Wasiso lena, “Un ui, din watung udan a taro tagun a kum gapman rop.” Stat 12:3

Epeses 5:26

sur det anun a taro mulus. Ma i rus talapor det nama danim ma anun a wasiso.

Epeses 5:8

Numugu mot kis una dumirum, ikut uniri, mot kis una talapor uni mot tagun a Labino. Mot in laun elar nama kum nutnutun a talapor.

2 Tesalonaika 2:13

A kum tistisi metul, mot ra a Labino i maris mot, i wakak sur metul in ser watung wakak torom o God un mot, uni o God i sa pilok pas mot tagun a turturkibino sur in ulaun mot. I ulaun pas mot una nirurus talapor ra a Tokodos na Nion i pami un mot, ma una numot a nurnur una lingmulusino.

Ibru 10:22

I mo ra, dat in nan milau o God nama lingmulus unin balandat ma a nurnur mulus, ma a nuknukin dat ra i langolango gusun a kum etakun una kum sakino petutna, uni o Iesu i sa lamir talapor tari nama gapino. Dat in nan milau i nama pinindat ra i sa gos tari nama danim ra i talapor.

Ibru 10:29

Ikut a warkurai na minabalu in dekdek sakit taun a minabalu ra, torom taio ra in pas tataun a Nutun o God, ma i nuki lena a gapin a kunubus, ra di sa rus talapor tari nami, i a utna oros kut, ma i watung laulau a Tokodos na Nion ra i pitar a marmaris.

Ibru 2:11

O Iesu tomo nama taro ra i rus talapor pas det gusun anundet a kum sakino petutna, det ara Tamandet kut. Iri a kibino ra o Iesu ke maimai sur in watung det, a kum tistisino.

1 Pita 1:2

O God a Tamandat i sa pilok pas mot ra i sa tasman mugu tar mot, ma a Tokodos na Nion i umatok pas mot sur mot a taro anun o God, sur mot in mur a wasiso anun o Iesu Karisito, ma in rus mot nama gapino. A marmaris ma a malmal in kis torom mot, ma in labo sakit.

1 Pita 1:22

Ma uniri, mot sa rus talapor mot, uni mot sa mur a lingmulus na wasiso, sur mot in nem mulus a kum tistisi mot una nurnur. I mo ra, mot in nem etetalai mot nama marmaris mulus una balamot.

1 Pita 3:21

In nolomom i tur ukinalong a baptais ra i ulaun mot uniri. Ka di baptaiso mot sur din rus ru a dur tagun a pinimot, awu. A baptais i elar nami ra mot pitar tar mot torom o God ma mot tasmani lena mot tokodos umatan o God. Ra i ulaun mot kibino una katutur melet anun o Iesu Karisito gusun a minat.

1 Jon 2:12

A tumtumus torom mot a kum nutnutung liklik, uni di sa unus ru anumot a kum sakino petutna una minatin o Karisito.

Tamtama 1:5

ma tan o Iesu Karisito, i a lingmulus na tene wasiso talapor un o God, ma a mugano tandet ra det in laun melet gusun a minat, ma a mugumugu anun a kum king una rakrakon bual. I maris dat, ma i ulangolango pas dat gusun anundat a kum sakino petutna nama gapino,

Tamtama 7:14

A balu i lena, “Labino, ui ut u tasmani.” Ra i watungi tang lena, “Det ri, a taro ra det sa laun sikot tagun a labino ngunungut ra i monong det, ma det sa gos kamkabang pas anundet a kum malu nama gapin a Barman na Sipsip.