1 Korin 4:17 - Nupela Testamen long tokples Kandas

¹⁷ Iri a kibino ra a tulu ru o Timoti torom mot. I a nutung ra a nem doko i, ma i ser lingmulus una pinapam anun a Labino. In unuk tar mot melet una nung a kum petutna, ra i kibino pas tagun anung a kinkinis tomo nam o Karisito Iesu. Anung a petutna i elar nam anung a etowo torom a taro na lotu una kum tamon rop.

1 Korin 4:17 ပူးပေါင်းရင်းမြစ်များ

Matiu 24:45

“A tultul ra i lingmulus una nun a pinapam ma i mananos kai, anun a labino in ukis tari sur in mugumugu anun a kum tultul una nun a rumu, sur in ser tabor det nama andet a utna na inangon una kum du bung na inangon.

Matiu 25:21

Anun a labino i balu i lena, ‘Wakak sakit, ui a wakak na tultul, u lingmulus una num a pinapam. An ubek tar ui sur un tamtamabat lako susut na utna, uni u lingmulus una kum nat na utna ri. Ra uniri dar in nan ma dar in gas tomo.’

Matiu 25:23

Anun a labino i balu i lena, ‘Wakak sakit, ui a wakak na tultul, u lingmulus una num a pinapam. An ubek tar ui sur un tamtamabat lako susut na utna, uni u lingmulus una nat na utna ri. Ra uniri dar in nan ma dar in gas tomo.’

Aposel 16:1

O Pol ma o Sailas der wanpat tiro o Derbe ra numur utiro o Listra. Tiro o Listra, ara tagun a taro na ususer kura iai, a risano o Timoti. O nano a ino Juda ma a tene nurnur, ma o tamano a te Grik.

1 Korin 11:16

Ra taio in pukus a wasiso ri, anung a minabalu i lenri: Ka met mur tu ngasino gisen, ma a taro rop anun o God una kum tamon kai awu.

1 Korin 11:2

A watung ulabo pas mot, uni mot ser nuk pas iau una kum ututna rop, ma mot mur a kum etowo ra a sa ususer tar mot nami.

1 Korin 11:34

Ra lako taro tagun mot det murak, i wakak ra det in nangon mugu pas ut una nundet a kum rumu, sur gong a warkurai na minabalu anun o God in los mot, ra mot wan tomo. Ra an nanpat, an pitar melet lako kum wasiso na warkurai torom mot.

1 Korin 14:33

Uni o God, a God na malmal, ma ke nem a utna ra i lokolokor. I wakak ra a wardain det in kis wowowon kut una lotu, elar nama taro anun o God det ser pami una kum tamon rop. Ka di mulaot tar det sur det in wasiso. Det in unatino pas det, elar nama Warkurai anun a taro Juda i watungi.

1 Korin 16:1

An inanos mot un asau ra mot in pami nama mani ra mot woro tomo i sur a taro anun o God ra det kis sapat o Jerusalem. Mot in pami elar nami ra a sa inanos tar a taro na lotu una kum tamon tong una papor Galesia sur det in pami.

1 Korin 16:10

Ra o Timoti in nanpat torom mot, mot in tamtamabati sur gong i ngara ra i kis nisamot, uni i pam a pinapam anun a Labino, elar nam iau kai a pami.

1 Korin 4:14

Ka tumus a kum wasiso ri sur an ban umaimai mot nami. A tumusi sur an ukodos mot, uni mot elar nama kum nutnutung ra a nem doko mot.

1 Korin 4:15

Kutiro ra anumot tu noino arip na tene tamtamabat, ra det tamtamabat anumot a nilaun un o Karisito, ikut kalako susut na tamtama mot. Un o Karisito Iesu, iau a tamamot, uni a los a Wakak na Wasiso torom mot.

1 Korin 4:2

Det ra di sa pitar tar lako kum pinapam tandet, det in lingmulus uni.

1 Korin 7:17

Arara in laun ut elar nama nilaun ra a Labino i pitar tari tano, ma elar nama ngas na kinkinis ra kura tano, ra o God i kabo pasi. A pitar a warkurai ri torom a taro na lotu una kum tamon rop.

1 Korin 7:25

A Labino ke pitar tu warkurai torom iau un det ra ka det nolin. Ikut an inanos mot una nuknuking. Iau a ngas na musano ra a taro det nurnur un iau, uni a Labino i maris doko iau.

2 Korin 8:18

Met in tulu ru i tomo nam ara tisimet kai, ra a kum taro na lotu una kum tamon rop det watung ulabo pasi una nun a wakak na pinapam ra i warawai nama Wakak na Wasiso.

Epeses 6:21

O Tikikus, a wakak na tisindat ma a lingmulus na tene pinapam anun a Labino, in inanos mot una kum utna rop, sur mot in tasman asau ra a pami.

Pilipai 2:19

A nurnur una Labino o Iesu, ra milau mo an tulu ru o Timoti torom mot, sur an longoro tu wasiso un mot ra an gas.

Pilipai 2:22

Ikut mot sa tasman tar a magiran o Timoti, ra i papam tomo nam iau una warawai nama Wakak na Wasiso elar nama nat ra i papam tomo nam o tamano.

Kolosi 1:7

O Epapras i sa ususer tar mot uni. I a wakak na tultul, ra i papam tomo nam met, ra met nem doko i, ma i a lingmulus na tene pinapam anun o Karisito, ra i tur ukinalong met.

Kolosi 4:9

In nan tomo nam o Onesimus, a wakak na tisindat ra i lingmulus una nun a pinapam, i ara ut tagun mot. Der in inanos mot una kum utna rop ra i wanpat nin.

1 Timoti 1:18

Timoti a nutunglik, a kum etowo ri ra a pitari tam, i elar nama wasiso na poropet ra di sa watung tari un ui ra det wararing un ui. Ra un mur a kum etowo ri, ui ara wakak na tene inaim nama Wakak na Wasiso.

1 Timoti 1:2

A tumus a pas ri torom ui Timoti, a nutunglik mulus una nurnur. A marmaris ma a wakak na petutna ma a balano molmol, tan o God a Tamandat ma o Karisito Iesu anundat a Labino in kis torom ui.

2 Timoti 1:2

A tumus a pas ri torom ui Timoti, a wakak na nutunglik una nurnur. A marmaris ma a wakak na petutna ma a malmal, tan o God a Tamandat ma o Karisito Iesu anundat a Labino, in kis tomo nam ui.

2 Timoti 2:2

A kum etowo ra u sa longoro pasi tang umatan a susut na taro, un ususer lako taro nami. A taro ra u nurnur un det lena det in pet lar pasi sur det in ususer lako taro kai nami.

2 Timoti 3:10

Ui Timoti, u sa tasman rop anung a kum etowo, a magirang, a kum utna ra a ngara suri, anung a nurnur, anung a kinkinis wowowon, anung a marmaris, anung a tuntunur dekdek una kum ngunungut,

Taitus 1:5

A wan gusun ui tiro una ailan Krit, sur ui mo un urop a kum pinapam ra ke rop utmakai, ma un pilok pas lako kum mugumugu na lotu, una kum tamon rop, elar nami ra a sa watung tari tam.

Tamtama 2:10

Gong mot ngaran a kum ngunungut ra milau mo in monong mot. Tama i, o Satan in uruk tar a ramano taro tagun mot una karabus sur in lar mot, ma mot in taramo a ngunungut una noino bung. Ra a taro det nem na um doko mot, mot in tur dekdek ut una numot a nurnur, ra an pitar tar a nilaun torom mot elar nami ra di pitar a ikul torom taio ra i winim pas a kinalabor.

Tamtama 2:13

A tasman a tamon ra mot kis iai, a tamon ra o Satan i sa kis na king iai. Ikut mot tur dekdek un iau, ma anumot a nurnur ke wan gisen gusun iau. Mot pami utkai lenra una kilalo ra di um doko o Antipas. I ra anung a lingmulus na tene wasiso talapor, ra di um doko i una numot a tamon, ra o Satan i kis iai.