1 Korin 16:13 - Nupela Testamen long tokples Kandas

¹³ Mot in tumarong, ma mot in tur dekdek una nurnur. Mot in elar nama kum dekdek na musano, ra ka det ngara.

1 Korin 16:13 ပူးပေါင်းရင်းမြစ်များ

Matiu 25:13

“I mo ra mot in tumarong, uni ka mot tasman a bung o a du bung ra a Labino in nanpat uni.

Matiu 26:41

Motul in koikoi, ma motul in wararing, sur gong motul puku una ululam. A niomotul i nemi, ikut a pinimotul i tungulu kut.”

Luk 21:36

Mot in tumarong mot una kum bung rop, mot in wararing sur mot in dekdek sur mot in walip gusun a kum utna rop ri ra milau det in nanpat. Ma mot in wararing kai sur mot in pet lar pasi sur mot in tur umatan a Nutun a Musano.”

1 Korin 14:20

A kum tistising, gong a nuknuki mot i elar nama kum nat liklik. Una sakino petutna i wakak sur mot in elar nama kum nat miso. Ikut, una nuknuki mot, mot in elar nama kum lamlabino.

1 Korin 15:58

I mo ra a kum wakak na tistising, mot in tur dekdek, ma gong i tugunu anumot a nurnur una katkatutur melet gusun a minat. Mot in pitar rop tar anumot a nilaun una pinapam anun a Labino, uni mot tasmani lena a kum pinapam rop mot pami torom a Labino awu sur a utna oros kut.

2 Korin 1:24

Awu sur met nem na warkurai sur a nurnur anumot. Met nemi kut sur met in papam tomo nam mot, sur mot in gas, uni mot sa tur dekdek una nurnur.

Galesia 5:1

O Karisito ut i sa ulangolango pas dat, sur dat in langolango mulus. Mot in tur dekdek, ma gong mot madek tar taio sur in ker ukai mot sur mot in elar nama kum tene ititula melet.

Epeses 3:16

Ma o God anun a ululeng i bukus nama minamar. Ra a wararing sur in tabor mot nama Niono, sur in udekdek a niomot,

Epeses 6:10

Anung a kum ururop na wasiso i lenri: Mot in tur dekdek una labino dekdekin a Labino.

Pilipai 1:27

Asau ra in nanpat, anumot a nilaun in mur sot pas a Wakak na Wasiso anun o Karisito. Ra an nan sur an tama mot, o ra an kis bakbak ma an longoro i kut a wasiso un mot, an tasmani lena, mot tur dekdek un ara nuknuk sot kut, ra mot papam tomo nam ara nuknuki mot kut sur a taro det in nurnur una Wakak na Wasiso,

Pilipai 4:1

I mo ra a kum tistising, mot in tur dekdek una Labino, lenutra a sa inanos tar mot nami. A nem doko mot, ma a nem doko i sur an tama mot, uni mot anung a gasgas ma mot elar nama ikul una nung a pinapam.

Pilipai 4:13

A pet lar pas a kum utna rop kibino un o Karisito ra i udekdek iau.

Kolosi 1:23

Ra mot in dekdek nama nurnur, ma mot in tur dekdek uni, o God in pam a utna ri. Ma gong mot wan gisen gusun a kinkinis langlang nama nurnur sur a kum utna ra o God in pami, ra mot sa longoro tari una Wakak na Wasiso. A Wakak na Wasiso ra, di sa inanos taru nami torom a taro rop una rakrakon bual. Iau, o Pol, a wanpat a tultul tagun a Wakak na Wasiso.

Kolosi 4:12

O Epapras, i ara ut tagun mot, ma a tultul anun o Karisito Iesu, i pitar anun a marmaris torom mot. I ser wararing dekdek sur mot, sur mot in tur dekdek una numot a kinkinis na nilaun un o Karisito, ma mot in tasman mulus a nemnem rop anun o God.

Kolosi 4:2

Mot in dekdek nama niaring. Ra mot wararing, a nuknuki mot in talapor, ma mot in watung wakak torom o God.

1 Tesalonaika 3:8

Uniri anumetul a nilaun i wakak doko, uni mot tur dekdek una Labino.

1 Tesalonaika 5:6

I mo ra gong dat elar nam ara taro ra det inep dumun. Dat in koikoi ma dat in tamtamabat wakak anundat a nilaun.

2 Tesalonaika 2:15

I mo ra, a kum tistisi metul, mot in tur dekdek, ma mot in utur ukai a kum etowo ra metul sa ususer tar mot nami. A kum etowo ra metul sa watung tari ma metul sa tumus tari kai, torom mot.

1 Timoti 6:12

Un tur dekdek una nurnur elar nama wakak na tene inaim. Ma un pam ukai a nilaun tukum. A nilaun ra o God i kabo pas ui suri, ra u wasiso talapor uni umatan a susut na taro.

2 Timoti 2:1

Timoti, o nutunglik una nurnur, un tur dekdek una marmaris anun o God, ra dat losi tan o Karisito Iesu.

2 Timoti 4:5

Un nuknuk wakak una kum bung rop. Ra un taramo a kum mamaut, un tur dekdek ut. Un dekdek nama warawai una Wakak na Wasiso, ma un pam sot pas anum a kum pinapam rop, ra o God i sa pitar tari tam.

2 Timoti 4:7

A sa pam sot pas anung a wakak na inaim ma anung a kinalabor una ililu, ma a sa mur sot pas a lingmulus na nurnur.

1 Pita 4:7

A ururop ina kum utna rop i sa milau. I mo ra mot in nuknuk wakak ma mot in tamtamabat wakak anumot a nilaun, sur mot in pet lari sur mot in wararing.

1 Pita 5:8

Mot in tumarong, ma mot in tamtamabat wakak anumot a nilaun, uni anumot a ebar, o Satan, i wan tuptupukus elar nama laion. I kukukuk tuptupukus, ma i sisio sur lako taro sur in nan det.

Tamtama 16:15

“Tama i, an nanpat elar nama tene wolong. Osi ra i kis na tamtamabat ma i waninar anun a kum malu, i dan, sur gong i mengere ma i maimai.”