1 Jon 3:24 - Nupela Testamen long tokples Kandas

²⁴ Osi ra i mur anun a kum warkurai, i laun un o God, ma o God kai i laun uni. Ma dat tasmani lena o God i laun un dat, uni a Tokodos na Nion ra i tabor dat nami, kuri ut un dat.

1 Jon 3:24 ပူးပေါင်းရင်းမြစ်များ

A Wakak na Wasiso un o Iesu Karisito o Jon i tumusi 10:38

Uniri a pami ut anun a kum pinapam. Ikut ra ka mot nurnur una nung a wasiso, mot in nurnur un iau kibino una kum pinapam a pami, sur mot in tasmani lena o Tita kuri un iau, ma iau kura un o Tita.”

A Wakak na Wasiso un o Iesu Karisito o Jon i tumusi 14:17

I a Tokodos na Nion, ra in upuaso a lingmulus. A taro tagun a rakrakon bual ka det in nemi, uni ka det in tama lele i ma ka det in tasmani. Ikut mot, mot tasman a Tene Warut, uni i kis tomo nam mot ma in kis un mot.

A Wakak na Wasiso un o Iesu Karisito o Jon i tumusi 17:21

Tita, a wararing lena det rop ra det nurnur un iau, det in takai kut, elar nam ui kuri un iau ma iau kura un ui. A nemi sur det in laun un dar, sur a taro una rakrakon bual det in nurnur lena ui u tulu ru iau urin.

1 Korin 3:16

Pepetlai, ka mot tasmani lena mot a rumu anun o God, ma a Nion o God kura un mot?

1 Korin 6:19

Pepetlai, ka mot tasmani lena a pinimot i a rumu anun a Tokodos na Nion? A Tokodos na Nion ra i kis un mot, o God i sa tabor tar mot nami. Mot ut awu sur anumot,

2 Korin 6:16

A kum torotoro na god ka det in tur lar pas una rumu na etabor anun o God. Uni dat ut a rumu na etabor anun o God ra i laun. I elar nami ra o God i sa watung tari, “An kis tomo nam det, ma an nan epotor tandet. Ma iau a God anundet, ma det anung a taro.” Wkp 26:12

1 Tesalonaika 4:8

I mo ra osi ra i rosumur gusun a etowo ri, awu sur i rosumur gusun a taro, awu. I rosumur ut gusun o God, i ra i tabor dat nama Niono, a Tokodos na Nion.

2 Timoti 1:14

Una dekdekin a Tokodos na Nion ra i kis un dat, un tamtamabat wakak a Wakak na Wasiso ra o God i sa pitar tari tam.

1 Jon 2:24

I wakak ra a kum etowo rop ra mot sa longoro tari numugu in laun un mot. Ra in laun un mot, mot kai mot in laun un o Nutunu ma o Tamano.

1 Jon 2:3

Ra dat mur anun a kum warkurai, dat talapor lena dat tasmani ut o God.

1 Jon 2:5

Ra taio i mur a wasiso anun o God, a marmaris anun o God in kis mulus uni. A ukinalong ra dat tasmani lena dat anun o God i lenri:

1 Jon 2:6

Osi ra i watungi uni lena, i anun o God, in laun elar nama nilaun anun o Iesu.

1 Jon 3:22

Ma asau rop ra dat saringi suri, in pitari ut tandat, uni dat mur anun a kum warkurai, ma dat pam asau ra i ugasgasi.

1 Jon 4:7

A kum wakak na paspasang, dat in nem etetalai dat, uni a marmaris i wan tagisapat tan o God. Det rop ra det tastasman a marmaris, det a kum nutnutun o God, ma det tasman o God.