Wuj Richin ri Esdras 6:3 - Kaqchiquel Bible

³ Chupan k'a ri nabey juna' toq niq'aton-tzij ri rey Ciro, xuya' k'a re ruchojmilal re' pa ruwi' ri rachoch ri Dios, ri k'o pa Jerusalem, richin tipabex chik q'anej jun bey ri jay ri', ri akuchi nisuj-wi kamelabel. Y kan jebel keban kan chire ri ruxe'. Y ri tz'aq richin ri jay k'o chi nuk'uaj waqlajuj jaj ri rujotolen y waqlajuj jaj ri ruwech.

Wuj Richin ri Esdras 6:3 ပူးပေါင်းရင်းမြစ်များ

2 Crón 36:22

Chupan ri nabey juna' richin ri q'atbel-tzij richin ri Ciro rey richin Persia, richin nibanatej achi'el rubin kan ri Jehová chire ri Jeremías, ri Jehová xusiloj ránima ri rey ri' y xuben chire chi tutaluj rutzijol y tutaluj wuj chupan chijun ruq'atbal-tzij. Y ri Ciro kere' k'a xubij:

Apocalipsis 21:16

Ri Jerusalem kan junan k'a ri raqen y ri ruwech. Y ri ángel xretaj ri tinamit, y ri tinamit ri' ruk'uan 2,200 kilómetro. Kan keri' k'a ri ruwech, ri raqen y ri rujotolen.

Wuj Richin Bix Chire ri Dios 122:4

Chiri' xejote-q'anej ri tzobaj winaqi' richin ri Jehová, richin nikiya' ruq'ij rija', achi'el nubij ri pixa'.

2 Crón 2:6

Stape' keri' rubanik ri jay, kan man jun k'a xtitikir xtipaban-q'anej rachoch rija', roma ri kaj chi tz'etel y ri man tz'etel ta kan man nitikir ta nukuch ri Dios. ¿In achike ta k'a yin richin ninpaba-q'anej jun rachoch, stape' xaxe xtik'atzin richin niporox pom chupan?

Wuj Richin ri Esdras 1:1

Chupan ri ruwach'ulew Persia, k'o k'a jun rey rubini'an Ciro. Chupan ri nabey juna' chire ri ruq'atbal-tzij, ri Jehová xusiloj ri ránima richin xuteq wuj chupan ronojel ri ruwach'ulew ri k'o pa ruq'a'. Ronojel re' xuben richin xbanatej achi'el xubij ri Jehová chire ri Jeremías toq k'a k'es na. Ri Ciro xerutaqala' wuj ri chiri', y kere' xubij:

Wuj Richin ri Esdras 3:7

Y xkiya' k'a méro chike ri aj-tz'aq y chike ri ajanela' ri xkebesamej. Y chuqa' xkiya' kiway-kuk'ya' y aceite, chike ri aj-Sidón y ri aj-Tiro, richin chi nikik'en-pe tiox-che' k'a pa Líbano y nikik'uaj k'a pa Jope pa ruwi' ya'. Y ronojel re' xban roma ri Ciro, rey richin Persia, kan xuya' q'ij chike.

2 Crón 2:3

Ri pa ruwach'ulew Tiro, k'o k'a jun rey rubini'an Hiram. Y ri Salomón k'o k'a ri xuteq rubixik chire, y kere' k'a xubij-el chire: Tabana' wik'in yin achi'el xaben rik'in ri David ri nata' toq xateq-pe k'iy tiox-che' chire richin xupaba-q'anej ri rachoch rija'.

Wuj Richin ri Esdras 1:2

Kere' k'a ri ninbij yin, Ciro, rey richin Persia: Ri Jehová, ri Dios richin ri kaj, xuya' ronojel ri q'atbel-tzij pa nuq'a' richin chijun ruwach'ulew. Y ri Dios xubij chuwe chi tinpaba-q'anej jun rachoch pa tinamit Jerusalem, ri k'o chiri' pa ruwach'ulew Judá.

Wuj Richin ri Esdras 6:14

Keri' ri aj-raqen ri ek'o pa kiwi' ri judío xkipaba' k'a q'anej ri rachoch ri Dios. Y ri winaqi' kan utz k'a xel chikiwech roma ri tijonik ri xkik'ul kik'in ri Hageo y ri Zacarías ri ruk'ajol ri Idó. Xkipaba' k'a q'anej, y xkik'is achi'el xubij ri ki-Dios ri k'o pan Israel, y achi'el xkibij ri e oxi' rey richin Persia: Ri Ciro, ri Darío y ri Artajerjes.