Santiago 5:16 - Kaqchiquel Bible

¹⁶ Y rix, wi k'o mak ri ibanalon, kan tiq'alajirisala' k'a chiwech. Titola-iwi' richin yixch'on rik'in ri Dios, richin chi yixchojmir. Y wi choj ri ik'aslen chuwech ri Dios, y rik'in ronojel iwánima xkixch'on rik'in, kan k'iy k'a ri xtik'ul chire rija'.

နောက်ထပ်ဗားရှင်းများ

Kaqchikel Santo Domingo (Xenacoj)

¹⁶ Romariꞌ rix chiꞌiwachibꞌil iwiꞌ tiyaꞌ chiwij ri mak eꞌibꞌanaloꞌon, y tibꞌanaꞌ orar pa iwiꞌ chiwech chin ngixkꞌachaj chuwech ri iyabꞌil. Tiwetamaj chi ri oración ri ndubꞌen jun ri chojmilej rukꞌaslen, kꞌo ruchuqꞌaꞌ chin ndibꞌanatej ri ndukꞌutuj.

Kaqchikel Santa Maria de Jesus

¹⁶ Man tivavaj ri i-pecados, xa tiꞌej chivach, y tibꞌanaꞌ ayudar-iviꞌ riqꞌuin oración, chi quireꞌ nquixꞌan sanar. Y xa jun choj rucꞌaslien choch ri Dios, y riqꞌuin nojiel ránima nuꞌon orar, can xticꞌaxax.

Kaqchikel Central Guatemala

¹⁶ Y rix man c'a tivevala' vi c'o mac ri ibanalon. Xa tik'alajirisala' chivech, y titola-ivi' riq'uin oraciáon, richin yixchojmir. Y vi choj ri ic'aslen chuvech ri Dios, y riq'uin ronojel ivánima xtiben orar, q'uiy ri xtic'ul chire ri Dios.

Re C'ac'a Testamento pa Kach'abal

¹⁶ Yex man tivovaj vo xa c'o imac ibanalon. Xa tisekresaj chivach, y titola-ivi' riq'uin oración, chin yixchojmer. Y vo xa choj re ic'aslen chach re Dios, y can riq'uin ronojel ivánma xtiban orar, can q'uiy cosa xtic'ul riq'uin re Dios.

Kaqchikel Western Solola

¹⁶ Y riyix man c'a tiwewaj ta pa tak iwánima wi c'o mac ri ibanon. Xa tik'alajsala' chiwech, y titola' iwi' riq'ui oración, riche (rixin) chi yixchojmir. Ruma jun winek ri can choj ruc'aslen chuwech ri Dios, tek nuben orar riq'ui ronojel ránima, can q'uiy ri xtic'ul chare ri Dios.

Santiago 5:16 ပူးပေါင်းရင်းမြစ်များ

Wuj Richin Etamabel-Tzij 15:29

Ri Jehová man yeruk'ul ta ri winaqi' ri e banoy richin ri etzelal; jak'a ri ruch'owen ri wineq ri choj ruk'aslen, kan nrak'axaj k'a.

San Mateo 21:22

Kan ronojel wi k'a ri nik'utuj chire ri Dios kan xtik'ul-wi, wi nikuquba' ik'u'x chi keri', xcha'.

San Juan 9:31

Qetaman chi ri Dios man nuben ta ri nikik'utuj ri aj-maki' chire. Jak'a ri jun ri kan nuya-wi ruq'ij ri Dios y kan nuben chuqa' ri nrajo' rija', kan nak'axex-wi roma ri Dios, y nibanatej ri nuk'utuj.

Wuj Richin Bix Chire ri Dios 34:15

Ri rutzubal ri Jehová ruya'on k'a pa kiwi' ri choj kik'aslen. Y rija' nrak'axaj ri kich'owen.

1 Pedro 2:24

Ja rija' ri xuk'uan ri qamak chuwech ri cruz richin xojrukol pa ruq'a' ri mak richin niqachop ta el jun k'aslen choj. Ja rija' ri xsokotej y xken richin nichojmir ri qak'aslen.

Wuj Richin ri Jeremías 33:3

Kach'on k'a q'anej wik'in y yin xtink'uluba-pe ri ach'abel y kan xtink'ut k'a chawech nima'q taq banobel ri ewatel chawech rat.

1 Juan 3:22

Toq yojch'on rik'in ri Dios, rija' nuya' chiqe ronojel ri niqak'utuj chire, roma yeqaben ri yerubij, y chuqa' yeqaben ri yeqa' chuwech.

Wuj Richin Etamabel-Tzij 15:8

Ri Jehová kan nrixowaj k'a ri nisipex chire roma ri wineq itzel; jak'a ri ch'owen ri nuben ri choj ruk'aslen, kan nikikot rik'in.

Hechos 19:18

E k'iy k'a chike ri winaqi' ri kan kikuquban kik'u'x rik'in ri Jesús, ye'oqaqa chuq'alajirisaxik ri itzel taq kibanobal.

1 Tesalonicenses 5:17

Jantape' kixch'on rik'in ri Dios.

Wuj Richin ri Achin Job 42:8

Roma ri' wakami, rix tik'uaj k'a wuqu' nima-alaj achija' taq wákix y wuqu' achija' taq karne'l y kixbiyin k'a rik'in ri nusamajel Job, y tibesuju' poron chikopi' roma ri imak. K'ari' ri nusamajel Job xtich'on wik'in yin pan iwi' rix; y yin kan xtinwak'axaj k'a ri ruch'abel rija'. Richin keri' man jun ruk'ayewal xtinya' pan iwi', stape' kan ruk'amon ta ninya' rutojbalil ri imak, roma man qitzij ta ri xibij chuwij yin, rix kan man xiben ta achi'el xuben ri Job, ri nusamajel.

Wuj Richin ri Rutikeribel 20:17

Roma ri' ri Jehová kan xuben k'a chike konojel ixoqi' ri ek'o chiri' chi man xk'oje' ta chik kal, roma ri Abimélec xuk'en-qa ri Sara. Y k'a ja toq xch'on na ri Abraham rik'in ri Dios pa ruwi', k'ari' ri Abimélec y ri rixjayil xek'oje' chik kalk'ual y konojel ri rusamajela' e ixoqi' xek'oje' chik kal.

Wuj Richin Etamabel-Tzij 28:9

Ri wineq ri xa pa rubanik nuben chi man nrak'axaj ta ri rupixa' ri Dios, toq nich'on-q'anej rik'in ri Dios, kan man xtak'axex ta ri ruch'owen.

2 Crón 30:20

Y ri Jehová kan xrak'axaj k'a ri xuk'utuj ri Ezequías, y kan xukuy k'a kimak ri winaqi'.

Wuj Richin ri Q'axanri'il 11:2

Roma ri' ri winaqi' xkik'utuj to'onik chire ri Moisés y rija' kan jari' xch'on rik'in ri Jehová. Y kan jari' toq ri q'aq' xk'is-el.

Hebreos 12:13

kan nik'atzin chi tik'uaj jun choj bey, richin chi ri jetz' nichojmir-el ri raqen y man ninimatej ta.

1 Tesalonicenses 5:25

Qach'alal, kixch'on rik'in ri Dios pa qawi' roj.

San Mateo 3:6

Y ri winaqi' ri ye'apon rik'in nuqasaj ya' pa kiwi', y rije' kan nikiq'alajirisala' k'a ri kimak chuwech ri Juan.

Hebreos 13:18

Qach'alal, kixch'on rik'in ri Dios pa qawi', roma roj kan qetaman chi kan ch'ajch'oj ri qánima, y niqarayij chi ja ri utz ri niqaben ronojel bey.

Hebreos 11:7

Chuqa' ri Noé xk'oje' kuqubabel-k'u'x rik'in. Roma ri' toq ri Dios xch'on rik'in pa ruwi' ri man jani nibebanatej, rik'in rukiy ri Dios xuben jun nimalej barco richin xerukol ri e aj pa rachoch. Y rik'in ri' xbeq'alajin-pe chi ri ch'aqa' chik winaqi' man utz ta xkiben, y xq'at-tzij pa kiwi'. Jak'a ri Noé roma kan xukuquba' ruk'u'x, ri Dios xuben chire chi man jun rumak xk'ulun chuwech.

Romanos 5:19

Roma ri Adán man xunimaj ta rutzij ri Dios, roma ri' qonojel roj winaqi' xojok aj-maki'. Jak'a roma ri Jesucristo kan xunimaj-wi rutzij ri Dios, roma ri' janila oj k'iy ri niban chiqe chi man jun qamak yojk'ulun chuwech ri Dios.

Romanos 3:10

Keri' chuqa' nubij ri ruch'abel ri Dios,*f6* ri tz'ibatel kan: Kan man jun ri choj ta ruk'aslen, kan man jun wi ri keri'.

Wuj Richin ri Josúe 10:12

Chupan k'a ri q'ij ri' ri Jehová xerujech ri amorreo pa kiq'a' ri israelita. Jari' toq ri Josué xch'on rik'in ri Jehová chikiwech ri ruwinaq, y xubij: Rat q'ij, kapa'e' pa ruwi' ri tinamit Gabaón y rat ik', kapa'e' pa ruwi' ri taq'aj kojol juyu' richin Aialón.

Hebreos 11:4

Roma ri kuqubabel-k'u'x, ri Abel xusuj jun kamelabel más utz chire ri Dios ke chuwech ri xusuj ri Caín. Roma ri' man jun rumak xk'ulun chuwech ri Dios y kan xuk'awomaj ri rusipanik. Y stape' ri Abel xken yan, roma ri rukuqubabel-k'u'x ri xk'oje', k'a nich'on na wakami.

Hechos 10:38

Iwetaman chuqa' ri' chi ri Jesús ri aj-Nazaret, kan k'o-wi ri Loq'olej Espíritu rik'in, ri ya'on-pe chire roma ri Dios. Roma ri' kan k'o-wi uchuq'a' pa ruq'a'. Kan xaxe k'a ri utz ri xerubanala' chike ri winaqi'. Xeruk'achojirisala' chuqa' winaqi' ri e chapon roma ri itzel-wineq. Kere' ri xerubanala' ri Jesús, roma kan k'o-wi ri Dios rik'in.

Wuj Richin ri Rutikeribel 19:29

Kere' k'a xk'uluwachitej toq ri Dios xeruk'is ri tinamit ri akuchi xk'oje-wi ri Lot. Ri Dios kan xuben k'a achi'el xuk'utuj ri Abraham chire y xerukol k'a pe ri Lot pa Sodoma toq achi'el xupiskolij kan ri' ri tinamit.

Wuj Richin ri Jeremías 15:1

Ri Jehová xubij chuwe: Stape' kan ja ta ri ánima Moisés y ri ánima Samuel xkepe wawe' richin nokik'utuj utzil chuwe richin chi xtinjoyowaj ta kiwech re winaqi' re', yin kan man xkento' ta. Tabij chike ri awinaq chi ke'el-el chinuwech yin y kan kebiyin nej.

1 Rey 13:6

K'ari' ri rey Jeroboam xubij chire ri q'alajirisey ruch'abel ri Dios: Nink'utuj utzil chawe chi kach'on rik'in ri Jehová woma yin, y tak'utuj utzil chire chi re nuq'a' xtisilon ta chik, xcha'. Y ri achin ri' kan xch'on rik'in ri Jehová pa ruwi' ri rey, y ri ruq'a' kan xsilon chik achi'el ri rubanon kan.

Wuj Richin ri Rutikeribel 32:28

Y rija' xubij chire ri Jacob: Man xtabini'aj ta chik Jacob, xa kan xtabini'aj k'a Israel, roma xatej-aq'ij richin xach'ek ri Dios y ri achi'a'; y kan xach'akon, xcha'.

Wuj Richin ri Rutikeribel 20:7

Wakami k'a tatzolij-el ri ixoq chire ri Abraham, ri rachijil y roma rija' jun q'alajirisey ri nuch'abel yin, kan xtuk'utuj chuwe yin pan awi' rat. Jak'a wi man xtatzolij ta xkaken rat y konojel ri winaqi' ri ek'o chupan ri aruwach'ulew, xcha'.

1 Sam 12:18

Ri Samuel xch'on k'a rik'in ri Jehová, y ri Jehová xuteq k'a pe koqolajay y job chupan ri q'ij ri', y chijun k'a tinamit xkik'en rukiy ri Jehová, y chuqa' ri Samuel.

Ex 17:11

Y xk'uluwachitej k'a, chi toq ri Moisés yeruyek ri ruq'a' chikaj, ri israelita yebe k'a chikij y yekich'ek, jak'a toq ri Moisés xa nuqasaj-qa ri ruq'a', ri e rijatzul ri Amalec yepe chikij y yekich'ek.

Ex 9:33

Y toq ri Moisés xel-el chupan ri tinamit toq k'a juba' tich'on kan rik'in ri rey, jari' toq xuyek ri ruq'a' chikaj y xch'on rik'in ri Jehová y jari' toq xtane-qa ri koqolajay, ri saqboch y xtane' chuqa' ri job ri najin pa ruwi' ri ruwach'ulew.

1 Tesalonicenses 5:23

Rix iwetaman chi ja ri Dios ri niya'on uxlanen pa taq iwánima. Y ninwajo' k'a chi rija' yixruch'er richin kan ix richin rija'. Ninwajo' chi xtuchajij ta ri ik'aslen, ri iwánima y ri ich'akul, richin keri' man jun itzel nilitej chiwij toq xtipe chik jun bey ri qajaw Jesucristo.

Colosenses 1:9

Y roma ri xqak'axaj chupan ri q'ij toq xoqaqa ri qach'alal, beneq k'a ruwech oj ch'owineq-pe rik'in ri Dios iwoma rix, chi xtuben chiwe chi kan ta jebel xtiwetamaj ri rurayibel, y ri Loq'olej Espíritu xtuya' ta chiwe ronojel na'oj y etamabel.

San Lucas 9:6

Y ri tijoxela' xebe na wi. Xebe ri pa taq kokoj tinamit richin xbekitzijoj ri utzilej ch'abel richin kolotajik. Xekik'achojirisala' chuqa' yawa'i' akuchi ri xeq'ax-wi.

2 Sam 19:19

y xubij chire: Wajaw, tabana' utzil man naben chuwe richin ninwejqalej ri etzelal ri xinben chawe, ni man tik'oje' chi'ak'u'x ri xinben chawe toq rat xatel-pe pa Jerusalem. Tabana' utzil tamestaj ronojel re',

1 Sam 12:17

Wakami jare' ri q'ij richin nik'ol ri itiko'n richin ri trigo, jak'a yin xkich'on rik'in ri Jehová, richin nuteq-pe koqolajay y job richin xtinabej y xtitz'et chi kan janila nim ri imak ri xiben chuwech ri Jehová, chi xik'utuj jun rey, xcha' ri Samuel.

Wuj Richin ri Jeremías 42:2

wik'in yin Jeremías y xkibij chuwe: Niqak'utuj utzil chawe, kach'on rik'in ri Jehová ri qa-Dios pa qavi' roj, ri xojkolotej kan, roma re wakami xa oj ka'i-oxi' chik ok, y ri rubanon-pe janila oj k'iy.

Marcos 1:5

Y janila chi winaqi' ri xe'apon rik'in chiri' chuchi' ri raqen-ya' Jordán, winaqi' ri ek'o pa tinamit Jerusalem y chuqa' richin chijun ri ruwach'ulew Judea. Rije' kan yekiq'alajirisala-wi k'a ri kimak chuwech ri Juan, y rija' xuqasaj ya' pa kiwi'.

Hechos 8:24

Jak'a ri Simón xubij k'a chike ri Pedro y ri Juan: Kixch'on rik'in ri Dios woma yin, y tik'utuj chire richin man k'a tink'uluwachij ri achi'el ri xibij-qa chuwij, xcha'.

1 Sam 1:12

Rokik ri Ana nich'on rik'in ri Jehová y kan xyaloj yan juba', ri Elí rutzuliben k'a ri ruchi'.