Wuj Richin Bix Chire ri Dios 93:1 - Kaqchiquel Bible

¹ Ri Jehová jari' ri rey y xuwiq k'a ri' rik'in ruwaq'ijaj. Rija' kan k'o ruchuq'a' y xuch'okoba' k'a jebel ri ruwach'ulew, xuben chire chi man nisilon ta ri akuchi k'o-wi.

Wuj Richin Bix Chire ri Dios 93:1 ပူးပေါင်းရင်းမြစ်များ

Wuj Richin Bix Chire ri Dios 96:10

Tiqabij k'a chike ri winaqi' ri man nikitzeqelibej ta ri Jehová chi ja rija' ri niq'aton-tzij. Ja rija' ri xjikiban ri ruwach'ulew y kan man jun xtisilon richin. Kan ja rija' ri xtiq'aton-tzij pa qawi' rik'in ruchojmilal.

Wuj Richin Bix Chire ri Dios 99:1

Ri Jehová ja rija' ri rey. Roma ri' kan tik'oje' k'a rukiy rija' chikiwech ri tzobaj winaqi' richin ri ruwach'ulew. Rija' kan tz'uyul k'a chikikojol ri querubín richin nuq'et-tzij. Y roma ri' chijun ri ruwach'ulew kan nisilon.

1 Crón 29:12

Awik'in rat nipe-wi ri beyomel y ri ruwaq'ijaj. Kan ja rat yaq'aton-tzij pa ruwi' ronojel, y pan aq'a' rat k'o-wi ri uchuq'a'. Keri' chuqa' pan aq'a' k'o-wi ri nanimirisaj ri kiq'ij ri winaqi', y naya' uchuq'a' pa kiq'a' konojel.

Apocalipsis 19:6

Y xinwak'axaj chi ri ch'abel ri niwajin ri chikaj, kan achi'el yewajin raqen taq ya', y chuqa' achi'el niq'ajan ri koqolajay. Y nikibij: Tinimirisaj rubi' ri ajaw ri qa-Dios, ri kan k'o ronojel uchuq'a' rik'in, roma ja rija' ri niq'aton-tzij.

Wuj Richin Bix Chire ri Dios 103:19

Ri Jehová kan k'a chila' chikaj k'o-wi ri rutz'uyubal richin niq'aton-tzij. Rija' kan nuq'et k'a tzij pa ruwi' ronojel.

Wuj Richin Bix Chire ri Dios 65:6

Rik'in ri nimalej awuchuq'a', rat xe'ajikiba' ri nimalej taq juyu'. Kan at nojineq k'a rik'in uchuq'a'.

Wuj Richin ri Isaías 45:18

Roma keri' ri Jehová nubij: Ja yin ri xibanon ri kaj y ri ruwach'ulew. Kan xinya' rutz'uyubal, y kan xinben richin ri winaqi' yek'oje' chuwech. Ja yin Jehová, y kan man jun chik achi'el yin.

Wuj Richin ri Isaías 45:12

Yin xinben re ruwach'ulew, y ja yin xibanon kichin konojel winaqi'. Kan ja ri nuq'a' yin xrik'on ri kaj; chuqa' kan ja yin xibin richin yek'oje' ri xmotza'.

Wuj Richin Bix Chire ri Dios 97:1

Ri Jehová niq'aton-tzij; kan kekikot k'a konojel winaqi' richin chijun ruwach'ulew. Konojel k'a winaqi' ri ek'o pa taq ruwach'ulew ri rusutin-kij chi ya', kan tikinimaq'ijuj k'a.

Wuj Richin Bix Chire ri Dios 59:13

Nimalej Dios, kan ke'ak'isa' k'a el rik'in ri awoyowal, ke'ak'isa' k'a el richin man yeq'alajin ta chik. Kan tetamex k'a chi rat naq'et-tzij pa qawi' roj ri oj rijatzul kan ri Jacob y pa ruwi' chijun ruwach'ulew.

Hebreos 1:8

Jak'a chire ri K'ajolaxel nubij:*f3* Ri awajawaren, rat Dios kan richin q'asen y ja rat xkaq'aton-tzij pa ruchojmilal.

Wuj Richin ri Isaías 59:17

Ri Dios xukusaj ri ruchojmilal y ri ruchuq'a' achi'el nikusex ri kamisabel richin yerukol ri choj kik'aslen y nuya' rutojbalil pa kiwi' ri man utz ta kik'aslen.

Wuj Richin ri Isaías 49:8

Kere' k'a ninbij yin Jehová: Kan pa taq ruq'ijul xtink'uluba-pe ri ich'owen, y chupan ri q'ij richin kolotajik, kan xkixinto'. Kan xkixinchajij; iwoma rix xtinyek chik el jun bey ri ruwach'ulew, y xtiwichinaj kan ri ulew ri e malin kan.

Wuj Richin ri Isaías 11:5

Roma ronojel xtuben pa ruchojmilal, man jun bey xtitzaq pa jun pajk'ibel; y roma kan jantape' xtuben ri nubij, xtitikir xtuk'achojirisaj ri rusamaj.

Wuj Richin Bix Chire ri Dios 145:13

Ri awajawaren kan richin k'a tibe-q'ij tibe-seq. Ri aq'atbel-tzij rat Jehová kan kichin k'a konojel sol winaqi'.

Wuj Richin Bix Chire ri Dios 18:32

Ja rija' ri niya'on ronojel wuchuq'a'. Kan nuk'ut k'a chinuwech ri chojilej bey.

Wuj Richin ri Achin Job 40:10

Wi keri', kan tak'utu' k'a chi k'o aq'ij y k'o chuqa' ak'ojlen. Kan tabana' k'a chi niq'alajin ri ak'aslen chi k'o ruchuq'a' y niyik'lun ri rusaqil achi'el ri wichin yin.

San Mateo 6:13

Man k'a taya' q'ij richin yojtzaq pa mak, xa kan qoj akolo' k'a chuwech. [K'o awuchuq'a', y k'o aq'ij-ak'ojlen richin jantape', kan keri' wi.]*f14* Kere' k'a tibij.

Wuj Richin ri Isaías 63:1

K'o k'a jun q'ij toq k'o jun ri xtuk'utuj: ¿Achike kami ri peteneq pa ruwach'ulew Edom, y k'o pa tinamit Bosrá, ri kan nich'ich'an ri rutziaq? ¿Achike kami ri rukusan-pe jun tzieq ri kan nitz'intz'ot y kan peteneq rik'in uchuq'a'?, xticha'. Ja yin Jehová ri yich'on pa ruchojmilal, y k'o wuchuq'a' richin yixinkol.

Wuj Richin ri Isaías 52:7

Kan janila jebel ok toq natz'et jun ya'ol utzilej rutzijol, ri peteneq pa ruwi' taq juyu' richin ri Jerusalem. Xtuk'en-pe ri utzilej rutzijol chi xtik'oje' uxlanibel-k'u'x, chi xtik'oje' kolotajik, y chi ri qa-Dios kan niq'aton chik tzij.

Wuj Richin ri Isaías 51:9

Y ri winaqi' nikibij: Jak'a rat Jehová, kan takusaj k'a ri awuchuq'a'. Kan takusaj achi'el xakusaj ri ojer kan kik'in ri winaqi' chi wiq chi tanaj. Ja rat xak'ajin richin ri Rahab*f12* y xakamisaj ri nimalej chikop ri'.

Wuj Richin Bix Chire ri Dios 75:3

Toq nisilon ri ruwach'ulew y konojel ri ek'o chuwech, ja yin ri yichapo ri temeyon richin.

Wuj Richin ri Isaías 51:16

Yin ri kan xinrik' ri kaj, y xinben ri ruwach'ulew, y xixincha' rix aj-Sión. Roma ri' ja rix ix nuwinaq. Yin kan xinya' ri nuch'abel pan ichi', y kan yixinto' rik'in ronojel, achi'el xa ta nuya'on ri nuq'a' pan iwi' richin imujal.

1 Crón 16:30

Kan konojel k'a winaqi' xkebaybot chuwech ri Jehová. Jak'a ri ruwach'ulew man xtisilon ta roma kan jebel jikil.

1 Crón 16:31

Kan tikikot k'a ri kaj; chuqa' kan tikikot k'a ri ruwach'ulew. Kan xtiqatzijoj chike ri winaqi' richin chijun ruwach'ulew chi ri Jehová, ja rija' ri rey.

Wuj Richin Bix Chire ri Dios 65:7

Rat kan naben k'a chi toq nijinin-pe ri palou, kan nitane-qa, Kan napaba' k'a ri ya' ri nibolqo't pa ruwi' ri palou, chuqa' kan natanaba' ri kich'abel ri winaqi' ri yeyakatej chawij rat.