Wuj Richin Bix Chire ri Dios 72:19 - Kaqchiquel Bible

¹⁹ ¡Kan tinimirisex k'a ri nimalej rubi' jantape'! Kan chijun ta ri ruwach'ulew xtinoj rik'in ri ruk'ojlemal, ¡Kan keri' ta k'a xtibanatej, ja' kan keri'!

Wuj Richin Bix Chire ri Dios 72:19 ပူးပေါင်းရင်းမြစ်များ

Wuj Richin ri Q'axanri'il 14:21

Man rik'in ri', yin ninbij chi kan qitzij chi ri nuk'ojlen kan xtiq'alajin chijun re ruwach'ulew.

San Mateo 6:10

Ri awajawaren rat ja ta ri' ri xtik'oje' qik'in. Kan nibanatej ta k'a ri nawajo' rat richin nibanatej wawe' chuwech re ruwach'ulew achi'el nikiben ri ek'o awik'in ri chila' chikaj.

Wuj Richin ri Habacuc 2:14

Roma ri winaqi' ri ek'o chuwech chijun ri ruwach'ulew, kan xtiketamaj jebel ri ruchuq'a', ri ruq'ij-ruk'ojlen ri Jehová, achi'el nuben ri ya' toq napon chupan ri palou.

Wuj Richin Bix Chire ri Dios 41:13

Nimalej ruq'ij-ruk'ojlen ri Jehová ri qa-Dios, tibe-q'ij tibe-seq, kan keri' wi; ja' kan keri' wi.

Apocalipsis 5:13

Y xenwak'axaj k'a chuqa' konojel ri e ruk'iytisan ri Dios ri ek'o chupan ri kaj, re ek'o chuwech re ruwach'ulew, ri ek'o chuxe-qa ri ruwach'ulew y ri ek'o chupan ri palou; y nikibij: Chire ri tz'uyul chupan ri tz'uyubel y chuqa' chire ri Karne'l, xtiya'ox ronojel matioxinik, ruwaq'ijaj, k'ojlemal y ronojel uchuq'a' richin jantape', yecha'.

San Mateo 6:13

Man k'a taya' q'ij richin yojtzaq pa mak, xa kan qoj akolo' k'a chuwech. [K'o awuchuq'a', y k'o aq'ij-ak'ojlen richin jantape', kan keri' wi.]*f14* Kere' k'a tibij.

Wuj Richin ri Isaías 6:3

Y chikijujunal rije' yesik'in y nikibila': Loq'olej, loq'olej, loq'olej Jehová k'iytisanel richin ronojel. Chijun ri ruwach'ulew nojineq rik'in ri ruk'ojlemal, yecha'.

Wuj Richin ri Isaías 11:9

Kan man jun k'a itzel ri xtik'uluwachitej chiri' pa juyu' Sión, roma chijun ri ruwach'ulew kan xtinoj rik'in etamabel richin ri Jehová, achi'el ri ya' nunojisaj ri palou.

Wuj Richin ri Nehemías 9:5

K'ari' ri jun chik tzobaj levita; ri Josué, ri Cadmiel, ri Binuy, ri Hasabnías, ri Serebías, ri Hodías, ri Sebanías y ri Petahías, xech'on kik'in ri winaqi' y xkibij chike: Kixyakatej y tiqaya' ruq'ij ri Jehová ri qa-Dios ri kan k'o-pe y xtik'oje' ri tibe-q'ij tibe-seq, xecha'. Y jari' toq ri winaqi' xkibij chire ri Jehová:

Apocalipsis 22:20

Y ri niq'alajirisan ronojel re', kan nubij chuqa': Ja', kan qitzij wi chi yipe yan, nicha'. Y yin Juan ninbij: Kan keri' ta k'a. Katanpe yan k'a, ajaw Jesús.

Wuj Richin Bix Chire ri Dios 89:52

¡Kan nimalej k'a aq'ij rat Jehová, tibe-q'ij tibe-seq! Kan keri' wi, ja' kan keri'.

Wuj Richin ri Zacarías 14:9

Ri q'ij k'ari' kan ja ri Jehová xtiq'aton-tzij pa ruwi' chijun ruwach'ulew. Y xaxe chuqa' rija' xtiya'ox ruq'ij.

Apocalipsis 1:18

Ja yin ri kan in k'es, kan xiken na wi jak'a re wakami k'o nuk'aslen richin tibe-q'ij tibe-seq. Y k'o chuqa' q'atbel-tzij pa nuq'a' pa ruwi' ri kamik y pa ruwi' ri akuchi ek'o-wi ri kaminaqi'.

Wuj Richin ri Malaquías 1:11

Ri nuq'ij-nuk'ojlen kan yalan-wi nim chikiwech ri ch'aqa' chik winaqi' richin ri ruwach'ulew, nitiker-pe akuchi nel-wi-pe ri q'ij y napon k'a akuchi niqaqa-wi-qa. Kan konojel k'a nikiporoj pom chinuwech. Y ri sipanik ri nikisuj chuwe kan ronojel ch'ajch'oj.

Wuj Richin ri Jeremías 28:6

Y xinbij: Ja' kan k'ate' ta keri' ri xtuben ri Jehová. Kan xtujikiba' ta ri ruch'abel ri xuq'alajirisaj chawech richin chi nuben chi yetzolin-pe wawe' ri samajibel ri e richin ri rachoch ri Jehová, y keri' chuqa' konojel ri winaqi' ri xe'uk'uex-el pa ximonri'il chiri' pa Babilonia.

1 Rey 1:36

K'ari' ri Benaías, ruk'ajol ri Joiadá, xubij chire ri rey David: Kan keri' k'a xtibanatej, roma kan keri' rubin ri Jehová Dios chawe rat rey, wajaw yin.