Kan nak'uluba' k'a pe ri qach'abel rik'in meyel taq banobel y pa ruchojmilal, ja rat nimalej Dios ri at qakolotajik, awik'in k'a rat kikuquban-wi kik'u'x konojel ri winaqi' richin chijun ri ruwach'ulew, konojel ri ek'o chuchi' taq palou ri k'a janila nej ek'o-wi.
Kan man jun k'a itzel ri xtik'uluwachitej chiri' pa juyu' Sión, roma chijun ri ruwach'ulew kan xtinoj rik'in etamabel richin ri Jehová, achi'el ri ya' nunojisaj ri palou.
Kan xya'ox k'a uchuq'a', ruwaq'ijaj y ajawaren chire. Konojel k'a ri winaqi', ri e richin chijun ri tinamit, ri ruwach'ulew y ri jalajoj ruwech ri kich'abel kan k'o chi nikisamajij. Ri ruq'atbal-tzij rija' kan richin k'a q'asen, y ri rajawaren kan man jun k'a xtiwulan richin.
Ri nuq'ij-nuk'ojlen kan yalan-wi nim chikiwech ri ch'aqa' chik winaqi' richin ri ruwach'ulew, nitiker-pe akuchi nel-wi-pe ri q'ij y napon k'a akuchi niqaqa-wi-qa. Kan konojel k'a nikiporoj pom chinuwech. Y ri sipanik ri nikisuj chuwe kan ronojel ch'ajch'oj.
Kan man jun k'a ri man ta xtuxibij-ri' chawech, y man ta chuqa' xtuya' aq'ij-ak'ojlen, rat ajaw. Y xaxe k'a rat ri at loq'olej. Y roma ri' konojel tzobaj winaqi' richin re ruwach'ulew xkepe chuya'ik aq'ij, roma xkitz'et chi xq'alajin yan ri aq'atoj-tzij, xecha'.