San Mateo 6:25 - Kaqchiquel Bible

²⁵ Roma ri' toq yin ninbij chiwe chi man tich'ujerisaj-iwi' chuch'obik ri achike nik'atzin chiwe q'ij-q'ij, ri akuchi xtiwil ri iway-iwuk'ya' y ri akuchi xtik'en-wi ri itziaq. Roma wi ri Dios kan xuya-pe ik'aslen chuwech re ruwach'ulew, xa kan xtuya-pe ri iway-iwuk'ya' y ri itziaq.

နောက်ထပ်ဗားရှင်းများ

Kaqchikel Santo Domingo (Xenacoj)

²⁵ Romariꞌ nibꞌij chiwa: Ma kixel chꞌuꞌj chukanoxik ri ndikꞌatzin chiwa pa ikꞌaslen, ri achike xtikꞌux o xtitij, nixta kixel chꞌuꞌj chukanoxik tzieq chin ndikusaj. ¿La ma más ta kꞌa reqalen ri kꞌaslen ke chuwech ri achike ndikꞌuxeꞌ, y ri cuerpo ke chuwech ri tzieq ndikusex?

Kaqchikel Santa Maria de Jesus

²⁵ Rumareꞌ inreꞌ niꞌej chiva: Man tichꞌujirisaj-iviꞌ ruma ri chica nicꞌatzin chiva kꞌij-kꞌij, chica ntitej o chica ntikun, ni por ri i-cuerpo chi chica itziak ri nticusaj. ¿Man ja ta came ri icꞌaslien más rakalien choch ri ntitej y ri i-cuerpo más rakalien choch ri itziak?

Kaqchikel Central Guatemala

²⁵ Y romari' tok yin ninbij chive: Man tich'ujirisaj-ivi' roma ri achique nic'atzin chive k'ij-k'ij, ri acuchi xtivil-vi ivay-ivuc'ya'; ni man tich'ob ri acuchi xtiq'uen-vi itziak. Roma vi ri Dios can xuya-pe ic'aslen chuvech re ruvach'ulef, ¿nich'ob cami rix chi rija' man ta nitiquir chuka' nuya-pe ri ivay-ivuc'ya' richin c'o ic'aslen y ri itziak richin nicuchbej-ivi'?

Re C'ac'a Testamento pa Kach'abal

²⁵ Yen nimbij chiva, che man quixel ch'o'j chucanoxic re ndoc chiva k'ij-k'ij, che anche' xte'vila-va-pa re andex nitaj y re nikum, y anche' xte'c'ama-va-pa itziak. Roma mana-ta re vay re c'o más rajkalen que chach re ic'aslen, y chuka' mana-ta re tziak re c'o más rajkalen que chach re i-cuerpo. Roma re Dios can nuya-va-pa re ivay chin c'o ic'aslen y re itziak chin nicusaj.

Kaqchikel Western Solola

²⁵ Y rumari' tek riyin nbij chiwe: Ma tich'ujirisaj ta iwi' chupan ri ic'aslen chi acuchi (achique) nipe wi ri iway iwuc'ya', ni ruma ta ri itziak ri nicuchbej ri ich'acul. ¿La ma ya ta cami ri ic'aslen ri ruya'on ri Dios ri más rejkalen que chuwech ri iway iwuc'ya'? ¿La ma ya ta cami ri ich'acul ri más rejkalen que chuwech ri itziak?

San Mateo 6:25 ပူးပေါင်းရင်းမြစ်များ

Filipenses 4:6

Man tisach ik'u'x roma xabachike; xa tiya' pa ruq'a' ri Dios ronojel y tik'utuj chire ri nik'atzin chiwe. Y chuqa' man timestaj yixmatioxin.

1 Pedro 5:7

Y tiya' k'a pa ruq'a' ri Dios ronojel ri iq'axo'n, roma rija' kan yixruchajij-wi.

Romanos 8:32

¿Kan k'o ta kami ri man utz ta ri nuya-pe chiqe? Man jun; roma rija' man xupoqonaj ta k'a xuya-pe ri kan Ruk'ajol richin chi xken qoma qonojel roj.

Wuj Richin Bix Chire ri Dios 55:22

Taya' pa ruq'a' ri Jehová ronojel ri ruk'ayewal ri k'aslen, y rija' xtuben chawe chi kow xkak'oje'; roma rija' man xtuya' ta q'ij chi ri choj ruk'aslen xtitzaq jumul.

San Mateo 6:31

Roma ri' rix man tich'ujerisaj-iwi' chukanoxik iway-iwuk'ya' y ri itziaq.

Marcos 4:19

Jak'a ri winaqi' ri' roma xa janila poqonal nikiq'axaj, xa nijiq' k'a ri ruch'abel ri Dios ri k'o kik'in. Y chuqa' roma janila nikich'ob rij ri kibeyomel, y ri ch'aqa' chik ruwech rayinik ri yepe kik'in, xa nijiq'. Y ri winaqi' ri' kan man jun bey k'a xtiwachin jebel ri ruch'abel ri Dios pa kik'aslen.

San Mateo 10:19

Jak'a toq ri winaqi' xkixkijech pa kiq'a' ri q'atoy taq tzij, man k'a tich'ob ri achike ri xtibij y achike rubanik xtiben richin yixch'on chikiwech. Roma chupan ri ramaj ri', ri Dios xtuya' k'a pe chiwe ri ruk'amon chi nibij.

1 Corintios 7:32

Yin man ninwajo' ta k'a chi rix nich'ujirisaj-iwi' chuch'obik ri nik'atzin chiwe, y roma ri' man yixtikir ta niben ri rurayibel ri Dios. Ri achin ri man k'ulan ta, más nitikir nuch'ob ri achike nrajo' ri ajaw, y kan nutej wi ruq'ij richin nuben ri achike niqa' chuwech.

San Mateo 6:34

Rix kan man nik'atzin ta k'a chi nich'ujirisaj-iwi' chuch'obik ri achike xtuk'en-pe chiwe ri q'ij chua'q. Roma ri richin ri chua'q kan richin wi k'a ri chua'q ri'. Roma ri' tiya' kan richin ri chua'q ri ruk'ayewal ri kan richin ri chua'q.

2 Timoteo 2:4

Ri utzilej aj-labal ri', richin utz nik'ulun chuwech ri aj-raqen pa ruwi', man nuyoj ta ri' chubanik ch'aqa' chik samaj.

San Lucas 8:14

Ri ija'tz ri xqaqa kojol taq q'ayis ri k'o kik'ixal nich'on k'a chikij ch'aqa' chik winaqi' ri ye'ak'axan ri ruch'abel ri Dios. Jak'a toq q'axineq chik juba' q'ij, xa nijiq' ri ruch'abel ri Dios kik'in, roma xa ja ri nik'atzin chire ri kik'aslen wawe' chuwech re ruwach'ulew ri nikich'ob, roma chuqa' ri kibeyomel y chuqa' roma yekirayila'. Y man niwachin ta jebel ri kik'aslen.

San Mateo 13:22

Y ri ija'tz ri xqaqa kan kojol taq q'ayis ri k'o ruk'ixal, kan nich'on-wi k'a chikij ch'aqa' chik winaqi' ri nikak'axaj ri ruch'abel ri Dios. Jak'a ri winaqi' ri' roma xa janila poqonal nikiq'axaj, xa nijiq' k'a ri ruch'abel ri Dios ri k'o kik'in. Y chuqa' roma janila nikich'ob rij ri kibeyomel, xa yejiq'. Y ri winaqi' ri' kan man jun bey k'a xtiwachin jebel ri ruch'abel ri Dios pa kik'aslen.

San Lucas 12:11

Toq yixuk'uex chikiwech ri aj-raqen chiri' pa taq jay ri akuchi nikimol-ki' ri winaqi' richin nikak'axaj ri ruch'abel ri Dios, y toq yixuk'uex chikiwech q'atoy taq tzij, man k'a tiquqa' rij ri achike k'o chi nibij.

Marcos 13:11

Jak'a toq xkixuk'uex richin chi yixbejach pa kiq'a' ri q'atoy taq tzij, man tich'ob ri achike chi ch'abel ri xtibebij. Rix xaxe k'a tibij ri achike chi ch'abel ri xtuya' ri Dios chiwe, roma xa kan man ja ta chik rix ri xkixch'on ri ramaj ri', xa kan ja chik ri Loq'olej Espíritu ri xtich'on.

Wuj Richin ri Jeremías 45:5

Y roma ri' man tawajo' richin ninimirisex aq'ij, roma rija' kan xtuk'en-pe ri ruk'ayewal pa kiwi' konojel winaqi'. Jak'a rat xkaruchajij xabakuchi xkabe-wi, xicha' chire.