Wuj Richin ri Chojmirisabelri'il 26:11 - Kaqchiquel Bible

¹¹ Yin kan xkik'oje' k'a chi'ikojol y kan man xkixinwixowaj ta.

Wuj Richin ri Chojmirisabelri'il 26:11 ပူးပေါင်းရင်းမြစ်များ

2 Sam 7:7

Y janipe' ink'o-pe kik'in ri awinaq israelita, xenya' tata'al pa kiwi' richin xeyuq'un kichin. Y kan man jun bey xink'utuj ta chike chi xkipaba' ta jun wachoch ri banon rik'in tiox-che'.

1 Rey 6:13

Y kan xkik'ase' k'a chi'ikojol rix nuwinaq Israel chupan re jay re', y kan man xkixinmalij ta kan, xcha'.

1 Rey 8:13

Jak'a re wakami, yin xinpaba-q'anej re jun jebelej y nimalej awachoch rat richin yak'oje' chupan richin q'asen, xcha' chire ri Dios.

1 Rey 8:27

Chuqa' ri Salomón xubij k'a chire ri Dios: ¿Kan qitzij kami chi rat Dios yak'oje' chuwech re ruwach'ulew re'? Roma rat kan at nimalej-wi, y ri kaj chi tz'etel, chi man tz'etel ta kan man nitikir ta yarukuch; k'a ta la' chik re jay re xinpaba-q'anej re awichin rat.

Wuj Richin Bix Chire ri Dios 106:40

Roma ri' xyakatej royowal ri Jehová pa kiwi'. Y kan xeretzelaj, stape' kan e richin rija'.

Wuj Richin Bix Chire ri Dios 76:2

Ri rachoch, kan pa Jerusalem k'o-wi, rija' kan chiri' pa juyu' Sión k'es-wi.

Wuj Richin Bix Chire ri Dios 78:59

Toq ri Dios xutz'et ronojel re', kan janila k'a xpe royowal, roma ri' kan xeretzelaj k'a konojel ri qawinaq.

Ex 25:8

Y xeri' ri awinaq kan tikibana' k'a jun jay ri kan wichin yin, richin chi chiri' yinok'oje-wi-qa ri chi'ikojol.

Ex 29:45

Y keri', yin kan xkik'oje' k'a chi'ikojol y ja yin ri xkinok ri i-Dios.

Ex 29:46

Y xtiwetamaj k'a chi ja yin Jehová ri in i-Dios, ri xinelesan-pe iwichin chupan ri ruwach'ulew Egipto, richin chi yin yitikir k'a yik'oje' chi'ikojol rix. Yin Jehová Dios ri yibin.

Wuj Richin ri Jeremías 14:21

Man k'a tawetzelaj más ri qatinamit roma ruk'ojlen ri abi', ni man taqasaj ruq'ij ri tinamit akuchi naq'et-wi-tzij. Kan toqaqa k'a chi'ak'u'x ri jikibel-tzij ri xaben qik'in.

Wuj Richin ri K'uxla'anik 2:7

Ri Jehová kan xumalij k'a kan ri porobel ri k'o pa rachoch. Xuben kan chire ri rachoch chi kan man jun rejqalen. Xujech k'a pa kiq'a' ri e etzelanel qichin, ri rachoch ri rey. Ri e etzelanel qichin kan xkiraqala' k'a kichi' chupan ri rachoch ri Jehová; achi'el xa ta ja ri q'ij richin nimaq'ij xkiben chupan.

Joel 2:27

Richin keri', rix niwetamaj k'a chi yin pan inik'ajal rix ink'o-wi. Chuqa' rix niwetamaj chi ja yin Jehová ri i-Dios, y man jun chik achi'el yin. Chupan ri q'ij ri' kan man jun bey chik xkixk'ixbitej.

Wuj Richin ri Chojmirisabelri'il 20:23

Man k'a tiben achi'el ri kibanobal ri winaqi' e richin ri ruwach'ulew ri' ri xkenjech pan iq'a'. Roma ri itzel taq kibanobal roma ri' kan xkenwetzelaj.

Wuj Richin ri Chojmirisabelri'il 26:15

y wi rix xtiwixowaj ri pixa' ri nuya'on chiwe, y man xtitaqej ta ri nuch'abel, y wi xtiq'ej ruwi' ri jikibel-tzij ri qabanon,

Wuj Richin ri Chojmirisabelri'il 26:43

Rokik k'a ri iwijatzul ek'o chupan ri kiruwach'ulew ri etzelanel kichin, k'o chi xtitole' k'a kan ri iruwach'ulew rix richin xtuxlan. Jari' k'a toq rije' xtoqaqa chikik'u'x chi ek'o pa ruk'ayewal roma ri kimak, y chuqa' roma man xkiya' ta rejqalen ri nupixa' y man xkinimaj ta ri xinbij chike.

Wuj Richin ri Chojmirisabelri'il 26:44

Man rik'in ri' stape' ek'o pa kiruwach'ulew ri etzelanel kichin, man kan ta jumul xkenmalij kan richin man xkek'is ta jumul ri iwijatzul, richin keri' man xtik'is ta ri jikibel-tzij ri qabanon iwik'in rix israelita, roma ja yin Jehová ri i-Dios.

Wuj Richin ri Zacarías 11:8

Pa jun ik' xenwelesaj k'a el oxi' chike ri yuq'unela', roma xkiben chuwe richin xik'o yan nuk'u'x kik'in. Chuqa' ri winaqi' xa kan xinketzelaj.

Efesios 2:22

Rik'in rija', rix beneq-q'anej ik'iyinen junan kik'in konojel ri ch'aqa' chik ralk'ual ri Dios achi'el jun jay, richin yixok ri akuchi nik'ase' wi ri Espíritu richin ri Dios.

Deut 32:19

Y toq rija' xutz'et, xyakatej royowal, roma rix ri ix ralk'ual xiwixowaj, y roma ri' ri Jehová xixrixowaj chuqa'.

Wuj Richin ri Josúe 22:19

Wi rix nina' chi man ch'ajch'oj ta ri ruwach'ulew ri xiwichinaj kan, más utz kixq'ax k'a pe wawe' pa qaruwach'ulew ri kan qitzij richin ri Jehová. Kixk'oje' k'a chiqakojol ri akuchi k'o-wi ri rachoch ri Jehová, y xtok iwichin jun chike ri qaruwach'ulew roj. Jak'a man kixyakatej chirij ri Jehová, ni chuqa' chiqij roj; y man tipaba' chik q'anej jun porobel ri xa k'o chik, ri kan richin ri Jehová ri qa-Dios.

Wuj Richin ri Josúe 22:31

K'ari' ri Finees xubij chike ri ka'i' tzobaj rik'in nik'aj: Wakami xq'ax chiqawech chi ri Jehová kan k'o-wi chiqakojol. Rix man xiben ta re' richin xixyakatej chirij ri Jehová. Wakami xojijech'ej chuwech ri ruk'ayewal ri nuya' ri Dios pa qawi' roj, xcha'.

Apocalipsis 21:3

Jari' k'a toq xinwak'axaj chi k'o jun ri kan rik'in uchuq'a' nich'on-pe akuchi k'o-wi ri tz'uyubel ri chila' chikaj y nubij: Wakami ri Dios kan chikikojol ri winaqi' k'o-wi, kan xtik'ase' chikikojol jantape' y rije' xke'ok rutinamit y rija' xtok ki-Dios.

Apocalipsis 7:15

Roma ri' ek'o-apo rik'in ri Dios, chupan ri rachoch y chi paq'ij chi chaq'a' nikisamajij. Y ri Dios ri tz'uyul chupan ri rutz'uyubal xtik'ase' chikikojol y xkeruchajij re winaqi' re'.