Hechos 20:21 - Kaqchiquel Bible

²¹ Chike ri nuwinaq judío y chike ri winaqi' man e judío ta, nuq'alajirisan k'a chuqa' chi titzolej-pe kik'u'x rik'in ri Dios y tikikuquba' kik'u'x rik'in ri qajaw Jesucristo.

နောက်ထပ်ဗားရှင်းများ

Kaqchikel Santo Domingo (Xenacoj)

²¹ Chake ri israelitas y ri ma israelitas ta, xinbꞌij chi tikijalaꞌ kinoꞌoj y tikiyaꞌ kánima rikꞌin ri Dios y tikitaqij ri Qajaw Jesús.

Kaqchikel Santa Maria de Jesus

²¹ Y chica ri nuvanakil israelitas y chica ri man israelitas ta, xinꞌej jeꞌ chi titzalaj-pa cánima riqꞌuin ri Dios y tiquibꞌanaꞌ ri nrajoꞌ jajaꞌ, y tiquicukubꞌaꞌ quicꞌuꞌx riqꞌuin ri Kajaf Jesucristo.

Kaqchikel Central Guatemala

²¹ Y chique ri nuvinak israelitas y chique ri vinek man e israelitas ta, nuk'alajirisan c'a chuka' chi titzolej-pe quic'u'x riq'uin ri Dios y tiquinimaj ri Kajaf Jesucristo.

Re C'ac'a Testamento pa Kach'abal

²¹ Y chuka' can nbin chique re israelitas y re man je israelitas-ta, che tijalataj quic'aslen chach re Dios y tiquinimaj re Kajaf Jesucristo.

Kaqchikel Western Solola

²¹ Y chique ri wech aj Israel y chique ri winek ri ma ye israelitas ta, riyin nk'alajsan c'a chuka' chi titzolin pe quic'u'x riq'ui ri Dios y tiquinimaj ri Kajaf Jesucristo.

Hechos 20:21 ပူးပေါင်းရင်းမြစ်များ

Hechos 2:38

Ri Pedro xubij chike: Titzolej-pe ik'u'x rik'in ri Dios, y pa rubi' ri ajaw Jesucristo tiya' q'ij chi niya'ox ya' pan iwi', richin keri' nikuyutej ri imak. Y ri Dios xtuya' ri Loq'olej Espíritu chiwe.

Hechos 11:18

Toq rije' xkak'axaj re', man jun chik xkibij-apo. Jak'a nikiya' ruq'ij-ruk'ojlen ri Dios, y nikibij k'a: Ri Dios kan xuya' k'a chuqa' q'ij chike ri man e qawinaq ta richin chi nitzolin-pe kik'u'x rik'in rija', richin chi nikil kik'aslen rik'in, xecha'.

Hechos 20:24

Jak'a man ja ta ri' ri más ninch'ob rij, ni man ja ta chuqa' ri nuk'aslen ri ninch'ob más. Ri más k'a ninch'ob, ja ri samaj ri ruya'on ri ajaw Jesús chuwe, y rik'in ta k'a kikoten ri xtink'is rutzijoxik chike ri winaqi' ri utzilej ch'abel richin kolotajik, ri niq'alajirisan ri rutzil ri Dios.

San Lucas 13:3

Man keri' ta, roma rix chuqa' xa xkixken wi man xtitzolin ta pe ik'u'x rik'in ri Dios.

2 Corintios 7:10

Roma toq kan rurayibel-wi ri Dios ri bis, ri bis ri' kan nuben chire xabachike wineq chi nitzolin-pe ruk'u'x, y rik'in ri' nikolotej. Y ri xtibanon keri' man jun bey k'a xtutzolij-ri' chirij roma ruyon utz ri nuk'en-pe chire. Jak'a ri bis ri k'o kik'in ri winaqi' ri k'a kikuquban na kik'u'x rik'in re ruwach'ulew, xa kamik k'a ri nuk'en-pe chike.

Romanos 10:9

Richin yakolotej nik'atzin chi nabij chi ri Jesús jari' ri Ajaw, y nik'atzin chuqa' chi nanimaj rik'in ronojel awánima chi ri Dios xuben chire ri Jesús chi xk'astej-pe chikikojol ri kaminaqi'.

Hechos 26:18

Yatinteq k'a el kik'in, richin chi rije' nijaqatej ri runaq' taq kiwech, y ye'el-pe chupan ri q'equ'm y yek'oje' chupan ri saqil, ye'el k'a chuqa-pe chuxe' ri rutzij ri Satanás y ye'ok chuxe' rutzij ri Dios, y roma xkikuquba' kik'u'x wik'in, nikik'ul ri kuyubel kimak, y ri Dios k'o xtuya' chike richin nikichinaj, e kachibilan ri ch'aqa' ri ch'ajch'oj chik ri kik'aslen y e richin ri Dios, xcha' ri Jesús chuwe.

San Lucas 24:47

y chi ek'o ri xkebe pa nubi' yin richin xtibekitzijoj ri ruch'abel ri Dios chike ri winaqi', chi titzolin-pe kik'u'x rik'in ri Dios richin nikuyutej kimak. Nitikeribex-el re wawe' pa Jerusalem.

1 Juan 5:5

¿Achike ta k'a ri nich'akon chirij ri etzelal richin re ruwach'ulew? Kan xaxe k'a ri kuqul-ruk'u'x chi ri Jesús, jari' ri Ruk'ajol ri Dios.

Hechos 26:20

Roma ri' kan xinchop k'a rutzijoxik nabey chike ri winaqi' ri ek'o pa Damasco; k'ari' chike ri ek'o pa Jerusalem y chike k'a chuqa' ri ek'o pa ronojel tinamit pa Judea, y k'ari' chike k'a ri winaqi' ri man e judío ta, chi nej chi naqaj. Chike konojel k'a xinbij chi titzolej-pe kik'u'x rik'in ri Dios y tijalatej ri kik'aslen. Chuqa' xinbij chike chi kan tikiq'alajirisaj-ki' rik'in ri kibanobal chi e jalatajineq chik.

1 Juan 5:1

Xabachike wineq ri nunimaj chi ri Jesús jari' ri Cristo, kan ralk'ual chik ri Dios. Y toq k'o jun tata'aj ri yalan niqajo', kan yeqajo' k'a chuqa' ri e ralk'ual rija'.

Filemón 1:5

roma yin kan ninwak'axaj-wi chi rat jantape' nak'ut ri ajowabel kik'in ri qach'alal, y kan jebel akuquban ak'u'x rik'in ri ajaw Jesús.

Efesios 1:15

Yin wak'axan chi rix kan kuqul-wi ik'u'x rik'in ri ajaw Jesús. Y chi janila ye'iwajo' konojel ri ch'aqa' chik qach'alal.

Gálatas 2:20

Roma toq ri Cristo xkamisex, yin achi'el ta kan xiken rik'in. Y roma ri' re nuk'aslen re k'o wakami, man wichin ta yin, xa kan richin ri Cristo ri k'o pa wánima. Y ronojel k'a ri ninben-el chuwech re ruwach'ulew, xtinben k'a roma kan rik'in ri Cristo ri ruk'ajol ri Dios nukuquban-wi nuk'u'x; ri Cristo ri najowan wichin, y xuya' chuqa' ri' richin xkamisex woma.

Romanos 5:1

Kan man jun wi k'a qamak yojk'ulun chuwech ri Dios roma ri kuqubabel-k'u'x. Y roma ri' toq junan chik qawech rik'in ri Dios roma ri qajaw Jesucristo.

Romanos 4:24

xa richin chuqa' tiqatz'eta' roj chi man jun qamak yojk'ulun chuwech, wi niqakuquba' qak'u'x rik'in ri xk'ason-pe richin ri qajaw Jesús chikikojol ri kaminaqi'.

Romanos 1:16

Yin kan man yik'ix ta chire ri utzilej ch'abel richin kolotajik, roma re' kan uchuq'a' richin ri Dios richin nukol xabachike ri nukuquba-ruk'u'x rik'in. Ri ch'abel ri' nabey xtzijox chiqe roj judío; k'ari' xtzijox chuqa' chike ri man e qawinaq ta.

Hechos 17:30

Ri ojer kan ri winaqi' man ketaman ta achike rubanik nikiya' ruq'ij ri Dios. Jak'a rija' man xuya' ta rutojbalil pa kiwi'. Jak'a re q'ij re' rija' nubij chi konojel winaqi' titzolin-pe kik'u'x rik'in.

Marcos 6:12

K'ari' ri tijoxela' xebe y xkibij chike ri winaqi' chi titzolej-pe kik'u'x rik'in ri Dios.

Marcos 1:15

y xubij: Ri q'ij ri rubin-pe ri Dios kan xtz'aqet yan, y xa naqaj chik k'o-wi-pe ri q'ij richin ri rajawaren ri Dios. Roma ri' titzolej k'a pe ik'u'x rik'in ri Dios y tinimaj ri utzilej ruch'abel richin kolotajik, xcha'.

San Mateo 4:17

Kan ja ri chiri' toq ri Jesús xuchop-pe rutzijoxik ri ruch'abel ri Dios, y nubij k'a chike ri winaqi': Kan titzolej k'a pe ik'u'x rik'in ri Dios, roma xa kan naqaj chik k'o-wi-pe ri q'ij richin ri aj-chikajil ajawaren, nicha' chike.

Gálatas 3:22

Jak'a ri ruch'abel ri Dios nubij chiqe chi kan qonojel roj winaqi' kan oj aj-maki-wi; richin keri' tiqetamaj chi k'o chi niqakuquba' qak'u'x rik'in ri Jesucristo richin niqak'ul ri rusujun kan ri Dios.

Gálatas 2:16

Man rik'in ri' qetaman chi ri wineq kan nik'ulun chi man jun rumak chuwech ri Dios*f3* xaxe toq nukuquba' ruk'u'x rik'in ri Jesucristo, y man roma ta chi nutaqej ri pixa'. Roma ri' roj judío chuqa' qakuquban qak'u'x rik'in ri Jesucristo richin chi man jun qamak yojk'ulun chuwech ri Dios, y man roma ta chi qataqen ri pixa'. Roma man jun nik'ulun chuwech ri Dios chi maneq ta rumak xaxe roma nutaqej ri pixa'.

1 Corintios 1:22

Ri nuwinaq judío nikik'utuj chi k'o ta meyel taq banobel richin retal ri yebanatej, y ri winaqi' griego nikikanoj na'oj.

Romanos 2:4

Rix iwetaman chi ri Dios yalan utz iwik'in y nikoch'on. Chuqa' iwetaman chi rija' keri' rubanon-pe iwik'in rix roma nrajo' chi niya' kan ri itzel taq banobel, man rik'in ri' xa man niwajo' ta nitzolej pe ik'u'x.

Romanos 1:14

Kan nik'atzin k'a chi yin nintzijoj ri ruch'abel ri Dios chike konojel kiwech winaqi', chike ri etamanela' y chike chuqa' ri man e etamanela' ta.

Hechos 28:23

Xkicha' k'a kan jun q'ij richin keri' nikimol-ki', y ri Pablo xtubij k'a ri achike nikajo' niketamaj. Y toq xapon k'a ri q'ij, janila k'a winaqi' ri xbekimolo-ki' rik'in ri Pablo, y rija' xuchop k'a nutzijoj y nuq'alajirisaj chirij toq ri winaqi' ye'ok pa rajawaren ri Dios. Xch'on kik'in toq xel-pe ri q'ij k'a toq xtzaq na qa, roma rija' xrajo' k'a chi xq'ax ta chikiwech chi ri Jesús jari' ri Cristo, ri tz'ibatel kan roma ri Moisés y koma ri q'alajirisey ruch'abel ri Dios.

Hechos 16:31

Ri Pablo y ri Silas xkibij chire: Takuquba' ak'u'x rik'in ri ajaw Jesucristo, rat y ri e aj pan awachoch, y xkixkolotej, xecha'.

Hechos 10:43

Kan ojer k'a ri bitajineq kan koma ri xeq'alajirisan ri ruch'abel ri Dios, chi qonojel k'a ri xqakuquba' qak'u'x rik'in ri Jesucristo, xtikuyutej qamak pa rubi' rija', xcha'.

Hechos 8:25

Toq ri e taqon roma ri Cristo kitzijon y kiq'alajirisan chik kan ri ruch'abel ri Dios chike ri winaqi' ri chiri', k'ari' rije' xkichop bey k'a pa Jerusalem. Jak'a chupan ri bey, k'iy k'a taq tinamit ri ek'o chuqa' chiri', ri xebe-wi richin xbekitzijoj ri utzilej ch'abel richin kolotajik.

Hechos 3:19

Wakami titzolej k'a pe ik'u'x rik'in ri Dios, y tijalatej ri ik'aslen, richin keri' nikuyutej y nisachatej ri imak. Y xkepe k'a q'ij richin uxlanen toq ri ajaw kan k'o chik iwik'in.

Hechos 2:40

Ri Pedro k'o k'a ch'aqa' chik ch'abel ri xeruq'alajirisala' chike. Rija' xuya' k'a rubeyal chikiwech ri winaqi' kik'in ch'abel achi'el re': Kixel-pe chikikojol ri winaqi' ri' ri xaxe itzel ri yekibanala', richin keri' yixkolotej pe, nicha' k'a chike.

San Juan 20:31

Jak'a ri e tz'ibatel kan, kan e tz'ibatel richin chi rix tinimaj k'a chi ri Jesús jari' ri Cristo ri ruk'ajol ri Dios. Y toq xtinimaj, xtik'ul ri ik'aslen ri man k'isel ta, roma kan xikuquba' ik'u'x rik'in.

San Juan 3:36

Achike k'a ri nukuquba' ruk'u'x rik'in re k'ajolaxel re', k'o ruk'aslen ri man k'isel ta. Jak'a ri man nikajo' ta nikikuquba' kik'u'x rik'in, man k'a xtik'oje' ta kik'aslen. Kan ek'o chik k'a richin niqaqa ri royowal ri Dios pa kiwi'.

San Lucas 15:10

Kan qitzij k'a ninbij chiwe, chi toq k'o jun ri man nutzeqelibej ta ri pixa' richin ri Moisés nitzolin-pe ruk'u'x rik'in ri Dios, k'o janila kikoten chikiwech ri ángel, xcha' ri Jesús.

San Lucas 15:7

Kan qitzij k'a ninbij chiwe, chi chila' chikaj k'o kikoten toq ek'o jumuch' belejlajuj winaqi' ri choj kik'aslen, ri man nik'atzin ta nitzolin chik pe kik'u'x rik'in ri Dios. Jak'a k'o más kikoten ri chila' chikaj, toq k'o jun ri man choj ta ruk'aslen, nitzolin-pe ruk'u'x rik'in ri Dios.

San Lucas 13:5

Man keri' ta. Jak'a rix wi man xtitzolin ta pe ik'u'x rik'in ri Dios, xa kan xkiken chuqa'.

San Mateo 3:2

Y rija' nubij k'a chike ri winaqi' ri xe'apon rik'in: Kan titzolej k'a pe ik'u'x rik'in ri Dios, roma xa kan naqaj chik k'o-wi-pe ri q'ij richin ri aj-chikajil ajawaren, nicha' chike.

Colosenses 2:5

Y stape' man ink'o ta apo iwik'in, chi kan ta in pa'el-apo pan inik'ajal, ri wánima kan k'o-wi-apo iwik'in. Yalan yikikot roma wetaman chi kan rik'in ruchojmilal ix beneq y kan kuqul ik'u'x rik'in ri Cristo.

Hechos 24:24

Toq ik'owineq chik k'a ka'i-oxi' q'ij, ri Félix xuteq k'a royoxik ri Pablo, roma rija' nrajo' k'a nretamaj achike rubanik ri' ri nakuquba' ak'u'x rik'in ri Jesucristo. Ri Félix rachibilan ri Drusila ri rixjayil, rija' jun ixoq judío.

Hechos 19:17

Re xbanatej xetamex k'a koma konojel. Kan xetamex k'a koma ri judío y ri man e judío ta ri ek'o chupan ri tinamit Éfeso. Rije' kan janila k'a xibinri'il xpe chike roma ri xbanatej. Y ri ajaw Jesús xuk'ul k'a ruq'ij-ruk'ojlen.

San Lucas 16:28

Roma ek'o wo'o' wach'alal, y ninwajo' chi nibech'on ta kik'in, richin man kepe rije' re wawe' re akuchi k'o janila tijoj-poqonal, xcha'.

Hechos 20:23

Ri wetaman, xaxe k'a ri ruq'alajirisan ri Loq'olej Espíritu chuwe, chi yin xkitz'apex pa cárcel, y xtintej poqon. Roma keri' ri ruq'alajirisan-pe ri Loq'olej Espíritu chuwe ronojel tinamit ri xiq'ax yan pe.