Wuj Richin ri Rutikeribel 4:10 - Kaqchiquel Bible

¹⁰ Y ri Jehová xubij chire: ¿Achike xaben? Roma ri rukik'el ri achaq' ri xbiyin chuwech re ruwach'ulew, achi'el xa ta nich'on-pe wik'in richin nuk'utuj rutojbalil pan awi'.

Wuj Richin ri Rutikeribel 4:10 ပူးပေါင်းရင်းမြစ်များ

Wuj Richin ri Rutikeribel 18:20

Y roma ri' ri Jehová xubij chire ri Abraham: Roma ri sujunik chikij ri aj-Sodoma y ri aj-Gomorra xa xk'iyer y ri kimak kan nik'o chik ruwi'.

Wuj Richin ri Rutikeribel 3:13

Jari' ri Dios xubij chire ri ixoq: ¿Achike roma xaben kere'?, xcha'. Y ri ixoq xubij: Ri kumetz xiruq'ol y roma ri' xintej ri ruwech ri che' ri', xcha'.

Wuj Richin ri Rutikeribel 9:5

Roma kan qitzij ninbij chiwe, chi wi k'o jun chikop nukamisaj jun chiwe rix, k'o chi xtinch'ojij ri ik'aslen chire; y wi jun chiwe rix nukamisaj jun chik wineq, chuqa' xtinch'ojij ri ruk'aslen chire.

2 Rey 9:26

Yin kan xintz'et ri rukik'el ri Nabot, y ri kikik'el ri e ralk'ual ri xbiyin. Roma ri' xtinbenya' ruk'exel chawe chupan re ulew re', xcha' kan ri Jehová chire. Wakami k'a tak'uaj, y tabek'aqa' kan pa rulew kan ri Nabot, achi'el rubin ri Jehová, xcha' ri Jehú.

2 Crón 28:9

Y chiri' k'o k'a jun q'alajirisey ruch'abel ri Dios rubini'an Oded. Rija' xeberuk'ulu-el ri aj-labal ri xetzolin-pe pa Judá chiri' chuchi' ri Samaria, y xubij chike: Ri Jehová ri ki-Dios kan ri qati't-qamama' xpe royowal pa kiwi' ri aj-Judá, y roma ri' xerujech pan iq'a' rix. Jak'a rix xa kan rik'in janila iwoyowal xe'ikamisaj kan, y re banobel re' kan xapon-q'anej k'a chila' chikaj.

Wuj Richin ri Achin Job 16:18

Kan ek'o-wi k'a ri ye'ajowan nukamik, jak'a rat ruwach'ulew man taya' q'ij chi ri woq'ej nichup ruwi', y man nak'axex ta ri nink'utuj.

Wuj Richin ri Achin Job 24:12

Jak'a ri pa tinamit ek'o-wi ri yeken yan, kan rik'in k'a jiloj nikik'utuj to'onik, y ri kánima ri e sokotajineq, kan yesik'in nikik'utuj chuqa' to'onik, jak'a ri Dios kan man nrak'axaj ta ri kich'owen.

Wuj Richin Bix Chire ri Dios 50:21

Ja ronojel re' ri abanobal y yin kan man jun nubin. Roma ri', rat kan ach'obon k'a chi yin in junan awik'in rat. Wakami k'a xkatinch'olij, y xtinq'alajirisaj chawe ronojel ri abanobal.

Wuj Richin Bix Chire ri Dios 72:14

Xtukol k'a ri kik'aslen pa kiq'a' ri q'olonela' y ri kamisanela', roma ri kikik'el rije', kan janila k'a nupoqonaj rija'.

Wuj Richin Bix Chire ri Dios 9:12

Ri Dios kan ye'oqaqa chuk'u'x ri ek'o pa tijoj-poqonal y nrak'axaj ri kich'owen; y kan nuya' k'a rutojbalil chike ri kamisanela'.

Wuj Richin Bix Chire ri Dios 9:13

Tabana' utzil Jehová tajoyowaj nuwech yin; tatzu' re q'axo'n re nink'owisaj koma ri ye'etzelan wichin, kan kinakolo' k'a chuwech ri kamik,

Ex 3:7

Y ri Jehová xubij k'a chire: Yin kan nintz'et-wi ri tijoj-poqonal ri nuq'axaj ri nutinamit ri k'o pan Egipto, roma e ya'on pa kow taq samaj. Xinwak'axaj ri raqoj-chi'ij ri nikiben y re' kan nuya' k'a q'axo'n chuwe yin y ninjoyowaj kiwech.

Wuj Richin ri Isaías 5:7

Ri Jehová k'iytisanel richin ronojel, jari' ri rajaw ri tiko'n. Y ri tiko'n ri kan janila nrajo', re' kan nuk'exewachuj k'a konojel ri qawinaq israelita. Y re qejoj re' kan jare' ri k'o más rejqalen. Ri Jehová kan royoben k'a chi xkitaqej ta ri rupixa', jak'a xa ruyon kamik ri xkiben. Royoben k'a ruchojmilal, jak'a xa ruyon raqoj-chi'ij richin q'axo'n ri nrak'axaj.

Wuj Richin ri Q'axanri'il 35:33

Y man tiben chire ri itinamit ri akuchi yixbek'oje-wi richin nok man ch'ajch'oj ta roma ri kamik ri xiben, roma ri kik' nuben chi ri ruwach'ulew nok man ch'ajch'oj ta. Y ri ruwach'ulew xtok ch'ajch'oj k'a toq xtiken na ri kamisanel.

Hechos 5:3

Jari' toq ri Pedro xubij chire: ¿Achike k'a roma toq xaya' q'ij chi ri Satanás xunojisaj ri awánima, richin chi xatz'uk-tzij chuwech ri Loq'olej Espíritu, y xak'en kan ch'aqa' chire ri rajel ri ulew ri xak'ayij?

Hechos 5:9

Jak'a ri Pedro xubij chire: ¿Achike roma rix kan xiben chi achi'el xa ta man yixrutz'et ta pe ri Loq'olej Espíritu richin ri Dios? Roma ri' ri awachijil jari' xbemuq kan. Y ri e beneq muquy richin, jari' ye'ok yan pe, richin keri' yatokik'ama' chik el rat, richin yatbekimuqu' kan chuqa', xcha'.

Deut 21:1

Wi chupan ri ruwach'ulew ri xtiberuya' ri Jehová ri qa-Dios chiwe, nilitej ta jun wineq kamisan kan y rik'il kan pa juyu' y man netamex ta ri achike xkamisan kan,

Hebreos 11:4

Roma ri kuqubabel-k'u'x, ri Abel xusuj jun kamelabel más utz chire ri Dios ke chuwech ri xusuj ri Caín. Roma ri' man jun rumak xk'ulun chuwech ri Dios y kan xuk'awomaj ri rusipanik. Y stape' ri Abel xken yan, roma ri rukuqubabel-k'u'x ri xk'oje', k'a nich'on na wakami.

Hebreos 12:24

Ojk'o apo rik'in ri Jesús ri nisamajin ri k'ak'a' jikibel-tzij y rik'in ri rukik'el ri xbiyin ri xuch'ajch'ojirisaj ri qánima, roma ri rukik'el rija' más rejqalen chuwech ri rukik'el ri Abel.

Santiago 5:4

Rix xa rik'in q'oloj man e itojon ta ri isamajela' richin pa juyu' y rije' kan yejilo k'a. Jak'a ri nimalej ajaw, ri rajaw ronojel, kan xrak'axaj ri kiraqoj-chi'ij rije'.

Wuj Richin ri Josúe 7:19

Jari' toq ri Josué xubij chire ri Acán: Kan chuwech k'a ri Jehová ri qa-Dios tabij ri qitzij, y tabij chuwe wakami achike ri xaben. Man k'a tawewaj chinuwech, xcha'.

1 Sam 13:11

Jak'a ri Samuel xuk'utuj chire ri achike roma keri' xuben. Y ri Saúl xubij: Toq yin xintz'et chi ri aj-labal xkichop nikitaluj-el-ki', y rat man xape ta chupan ri q'ij ri abin kan chuwe, y ri aj-Filistea kimolon chik ki' chiri' pa Micmás richin yeyakatej chuwij,