Ez 29:21 - Kaqchiquel Bible

²¹ Chupan k'a ri q'ij ri', xtinben chi ri awinaq israelita xtinimer ri kuchuq'a' y rat Ezequiel, kan xkatikir chik xkach'on kik'in. Y k'ari' xtiketamaj chi ja yin Jehová, xcha'.

Ez 29:21 ပူးပေါင်းရင်းမြစ်များ

1 Sam 2:10

Ri Jehová xkeruk'is ri etzelanel richin, kan xtuteq-pe koqolajay pa kiwi'. Ja ri Jehová xtiq'aton-tzij pa ruwi' chijun ruwach'ulew y xtuya' uchuq'a' pa ruq'a' ri rey ri rucha'on y xtinimirisex ri ruq'ij, xcha'.

San Lucas 21:15

roma kan ja yin ri xkiya'on ch'abel chiwe. Xtinya' chuqa' etamabel chiwe richin keri' man jun xketikir xtikibij chiwe ri ye'etzelan iwichin.

Wuj Richin Bix Chire ri Dios 132:17

Xabij chi wawe' xtaben chi xtibejotayin-pe ri ruchuq'a' ri David; y xtaben chike chi rije' man jun bey xkek'is, achi'el jun saqil ri man jun bey xtik'is.

Ez 33:22

Jak'a ri aq'a' toq man jani tapon ri uk'uayon ri rutzijol chuwe, ri Jehová xutzeqej yan ri ruq'a' pa nuwi' richin xitikir xich'on chik jun bey. Y ri nimaq'a' toq xoqaqa ri achin ri niya'on rutzijol chuwe xich'on rik'in.

Ez 24:27

Chuqa' xubij chuwe chi yin xkik'atzin chik richin jun retal y man xkitikir ta xkich'on. Jak'a chupan ri q'ij ri' xkitikir xkich'on chik jun bey y xkitikir k'a xkitzijon rik'in ri ya'ol rutzijol. Y rik'in ri' ri nuwinaq ri ek'o wik'in chiri' pa Babilonia xtiketamaj k'a chi ja ri Jehová ri qajaw.

Wuj Richin Bix Chire ri Dios 92:10

Jak'a yin kan xtaya' más wuchuq'a', achi'el ri ruchuq'a' ri juyubel bóyix. Xtaqasaj k'a aceite pa nuwi', retal richin kikoten.

San Lucas 1:69

Ri Dios nuya' jun nimalej qakolonel; jun ri kan riy-rumam kan ri David, ri rusamajel ri xk'oje' ojer.

Ez 29:16

Y ri tinamit Israel kan man jun bey chik xtukuquba' ruk'u'x rik'in, xa k'ari' xtiq'ax chuwech chi kan man utz ta ri xuben toq xberuk'utuj to'onik iwik'in. Keri' ri awinaq aj-Egipto kan xtiketamaj chi ja yin Jehová.

Ez 29:9

Ri ruwach'ulew Egipto kan xtok k'a jun tz'iran ruwach'ulew y k'ari' rix xtiwetamaj chi ja yin Jehová ri ink'o pa ruwi' ronojel. Y rat rey, roma xabij chi ri raqen-ya' Nilo awichin rat y ja rat ri xabanon,

Ez 29:6

Kan keri' chi'iwonojel rix winaqi' aj-Egipto xtiwetamaj chi ja yin Jehová ri ink'o pa ruwi' ronojel. Ri winaqi' israelita kan kikuquban kik'u'x iwik'in achi'el toq jun nukuquba' ruk'u'x rik'in jun ch'ame'y. Jak'a ri ch'ame'y ri' xa jun patz'en.

Ez 3:26

Y man xaxe ta ri', yin kan xtinben chire ri awaq' chi niq'ate' kan pan achi' y xkamemur, richin keri' man xkatikir ta xke'ach'olij ri awinaq, stape' rije' kan e jun ijatzul ri kan nikipaba-ki'.

Wuj Richin ri Jeremías 23:5

Xtoqaqa k'a jun q'ij toq yin xtinben chi ri David xtik'oje' jun rijatzul ri kan xtok jun rey ri xtuq'et-tzij rik'in na'oj. Rija' kan xtuq'et-tzij pa ruchojmilal y kan choj.

Wuj Richin ri Isaías 27:6

Chiqawech-apo ri qawinaq israelita xkejike' chik qa jun bey, achi'el jun che' ri yeruya-qa jebel ri ruxe' pan ulew. Ri qawinaq achi'el xkebejotayin-pe y xkek'oje' kisi'j, y kan xtikinojisaj ruwech ri ruwach'ulew, y kan xtikiya' kiwech.

Wuj Richin Bix Chire ri Dios 148:14

Rija' kan ruya'on k'a nimalej uchuq'a' chire ri rutinamit, konojel ri israelita kan tikiya' ruq'ij, roma ja rije' ri ek'o más naqaj chire rija'. ¡Kan tinimirisex k'a ruq'ij ri Jehová!

Wuj Richin Bix Chire ri Dios 112:9

Rija' kan man k'ek' ta; kan yeruto' ri man jun k'o kik'in. Ri ruchojmilal kan jari' ri nuben jantape'. Rija' xtuk'ul ruwaq'ijaj jantape'.

Wuj Richin Bix Chire ri Dios 51:15

Ajaw, tabana' chuwe chi yin yitikir yibixan, richin kan xkatinnimirisaj rik'in ri nubix.

Ez 3:27

Jak'a toq yin k'o ninwajo' ninbij chawe, xtinya' chik ri ach'abel y k'ari' xtabebij chike ri rutzijol. Y ri nrajo' nrak'axaj kan trak'axaj k'a. Y ri man nrajo' ta nrak'axaj kan man k'a trak'axaj, roma rije' kan e jun tinamit ri yalan itzel, xcha'.

Ez 30:1

Ri Jehová xch'on chik wik'in y xubij chuwe: