Ez 21:28 - Kaqchiquel Bible

²⁸ Rat Ezequiel, taq'alajirisaj ri nuch'abel yin Jehová pa kiwi' ri aj-Amón ri xetze'en chikij ri awinaq aj-Israel y tabij chike: Ri espada kan eleneq chik pa ruk'ojelibal richin niberubana' kamik. Kan jebel chik banon rey richin nikamisan. Xjosq'ix yan y kan nirepelun chik.

Ez 21:28 ပူးပေါင်းရင်းမြစ်များ

Ez 21:20

Y jun chike re bey re' napon pa tinamit Rabá ri k'o pa ruwach'ulew Amón. Y ri jun chik napon pa Jerusalem chupan ri ruwach'ulew Judá.

Wuj Richin ri Jeremías 12:12

Xkepe k'a ri itzel taq achi'a' pa ruwi' chijun ri juyu' richin ri tz'iran ruwach'ulew ri', roma rije' e achi'el jun nu-espada ri xtik'ison ri jun ruchi' k'a ri jun chik ruchi' ri ruwach'ulew y kan man jun chik nuwinaq ri xtikolotej kan.

Wuj Richin ri Isaías 31:8

Chupan ri q'ij ri' kan xketzaq k'a ri aj-Asiria chi espada, jak'a man roma ta ri uchuq'a' richin re ruwach'ulew. Ri labal xtuben chi xke'animej ri kiwinaq, y ri alaboni' kan xkekiya' pa kow taq samaj.

Wuj Richin ri Jeremías 46:10

Jak'a q'ij re' wichin yin Jehová k'iytisanel richin ronojel, jun q'ij toq xtinya' ri rutojbalil pa kiwi' ri e etzelanel wichin. Ri espada kan xkerukamisaj k'a konojel, k'a toq man nitikir ta chik, roma yin Jehová k'iytisanel richin ronojel xkixinkamisaj chi'iwonojel achi'el niban kik'in ri taq chikopi' richin kamelabel, chiri' chunaqaj ri raqen-ya' Éufrates, chiri' pa xaman.

Wuj Richin ri Jeremías 46:14

tinya' rutzijol chijun ri ruwach'ulew Egipto y ri pa taq tinamit Migdol, ri Menfis y ri Tafnes. Y tabij k'a: ¡Kixyakatej y tinaba-iwi', roma ri espada najin chik chi kamisanik!

Ez 36:15

Yin man xtinya' ta q'ij richin nak'axatej chik ri itzel ch'abel kichin ch'aqa' chik winaqi' richin ri ch'aqa' chik ruwach'ulew y chuqa' man xtinya' ta q'ij chi maneq chik winaqi' chupan ri kiruwach'ulew, xcha'.

2 Crón 36:17

K'ari' ri Jehová xuben chire ri rey richin ri Babilonia, richin xerukamisaj chi espada ri alaboni', stape' ek'o chupan ri rachoch ri Dios. Kan man xupoqonaj ta ri kik'aslen ri alaboni', ni ri xtani', ni ri rijita'q taq winaqi'. Konojel re' ri Jehová kan xerujech pa ruq'a' ri rey richin Babilonia.

Ez 17:13

Xeri' xpe chik jun bey ri rey richin Babilonia y xuchop jun chike ri rijatzul kan ri rey y xuben k'a jun jikibel-tzij rik'in, richin nuq'et-tzij ri chiri'. K'ari' rija' xeruk'uaj-el ri ch'aqa' chik winaqi' ri k'o más kejqalen,

Ez 17:15

Jak'a re rey re' kan xyakatej chirij ri rey richin Babilonia y ek'o xeruteq pa ruwach'ulew Egipto richin xuteq kik'amik kiej y chuqa' richin xuteq kik'amik pa ruk'iyal achi'a'. ¿Ninimaj kami rix ronojel re'? ¿Kan utz kami xtel chuwech ri xtitikir xtanimej-el y xtukol-el ri ruk'aslen? ¿Nitikir kami nanimej-el jun ri man xutaqej ta ri jikibel-tzij ri xuben?

Os 9:9

Kan nik'o chik k'a ruwi' ri mak ri xkiben, kan achi'el chik k'a ri mak ri xbanatej pa Guibeá. Jak'a ri Dios kan man xtumestaj ta k'a, kan xtuya' k'a rutojbalil re mak re'.