Ez 20:26 - Kaqchiquel Bible

²⁶ y chuqa' xinya' k'a q'ij chike richin xe'ok man e ch'ajch'oj ta rik'in ri kisipanik ri xkiya' chikiwech ri wachibel toq xekiporoj ri nabey taq kik'ajol. Xinben ronojel re' richin xtik'oje' ta xibinri'il kik'in y xketamaj ta chi ja yin Jehová.

Ez 20:26 ပူးပေါင်းရင်းမြစ်များ

2 Rey 16:3

Rija' xa xuben k'a achi'el xkiben ri rey richin Israel. Kan xusuj k'a ri ruk'ajol richin kamelabel, achi'el ri itzel taq banobel kichin ri tzobaj winaqi' ri kan ek'o chiri'. Y roma ri', ri Jehová xerelesaj-el chikikojol ri israelita.

2 Rey 17:17

Xekiporoj k'a ri kalk'ual richin xekisuj richin kamelabel. Xe'ok richin nikibananej richin nikiq'alajirisaj ri peteneq chikiwech, y xebe rik'in aj-itz. Kan xkijech k'a ki' richin xkiben ri etzelal chuwech ri Jehová, richin xkiyek janila royowal.

2 Rey 21:6

Xerusuj ri ruk'ajol richin kamelabel. Chuqa' kan xbe kik'in ri aj-itza' y xeruk'ulubej ri itzel taq espíritu. Chuqa' kan xuya-apo ri paban-che' richin Asera, chupan ri rachoch ri Jehová. Y ri itzel taq banobel ri' xuben richin xuyek royowal ri Jehová. Ri ojer kan ri Jehová xubij chike ri David y ri Salomón ri ruk'ajol: Yin xtinya' re nubi' richin q'asen chupan re jay re', re wawe' pa Jerusalem, ri kan xincha' chikikojol konojel ri tzobaj richin Israel.

2 Crón 28:3

Xuporoj k'a pom chiri' pa taq'aj kojol juyu' richin Ben-hinom. Chuqa' kan xeruporoj ralk'ual richin kamelabel achi'el xekiben ri winaqi' ri xek'oje' chiri' ojer. Re banobel re' man xqa' ta chuwech ri Jehová, y roma ri' xe'elesex-pe chikikojol ri israelita ri ojer taq winaqi' ri'.

2 Crón 33:6

Chuqa' kan xeruporoj ri ralk'ual richin kamelabel chiri' pa taq'aj kojol juyu' richin Ben-hinom. Kan xeruk'ulubej k'a ri yech'on kik'in ri espíritu richin nretamaj ri peteneq chuwech, y chuqa' xch'on kik'in ri kaminaqi'. Xuya' q'ij chi xek'oje' chik ri aj-itza'. Kan xik'o k'a ruwi' ri itzel xuben. Ronojel re' kan man xqa' ta chuwech ri Jehová, y roma ri' xyakatej janila royowal.

Ex 13:12

jari' toq xkeqaya' chire ri Jehová ri e nabey taq qak'ajol y chuqa' ri e nabey taq kal ri qawej, ri e achija'.

Wuj Richin ri Isaías 63:17

¿Achike roma Jehová naya' q'ij chiqe chi roj yojsach kan chupan ri abey, y kan niqakowirisaj ri qánima richin chi man niqaya' ta awejqalen? Pa ruk'exel re' tabana' utzil tajala' ri ach'obonik pa qawi', roma ja roj ri oj asamajela' ri janila yojawajo', y ri tzobaj ri akuchi e eleneq-pe ri awijatzul.

Wuj Richin ri Jeremías 19:4

Roma ri winaqi' israelita xinkimalij kan y kan xkiben chire ri taq'aj ri' chi xenoj chi dios ri man e aj wawe' ta y man xketamaj ta kiwech ri iwati't-imama', ni ri e rey ri xek'oje' ojer kan. Y wawe' xisuj pom chikiwech y kan xinojisaj ri tinamit rik'in kik' roma xe'ikamisaj ri winaqi' ri xa man jun kimak.

Wuj Richin ri Jeremías 19:9

Xtinben k'a chi ri e etzelanel iwichin xtikisutij-rij ri itinamit y roma ri wayjal, xtitej-qa ri iwalk'ual y chi'ijujunal xtitej-qa-iwi' chi iwachibil-iwi', xkacha'.

Wuj Richin ri Jeremías 32:35

Chuqa' xekipaba-q'anej porobel richin ri Baal chiri' pa taq'aj kojol juyu' Ben-hinom, richin chi chiri' yekiporoj-wi ri kimi'al-kik'ajol richin kamelabel chire ri ki-dios Moloc. Ronojel re' kan man xinbij ta chike chi nikiben, ni man jun bey xinch'ob rij. Y toq ri winaqi' ri' xkiben ri itzel taq banobel ri', xkiben richin xemakun ri ch'aqa' chik kiwinaq.

Wuj Richin ri Jeremías 7:31

Y xekipabala' k'a q'anej porobel ri chiri' pa Tófet*f3* pa taq'aj kojol juyu' Ben-hinom ri akuchi yekiporoj ri kalk'ual. Re' jun banobel ri man xinbij ta yin richin chi niban y kan man jun bey xpe ta pa wánima richin keri' nibanatej.

Ez 20:12

Y chuqa' xinya' chike ri q'ij richin uxlanen richin jun retal chiqakojol, richin tiketamaj chi yin Jehová xench'er richin xe'ok wichin yin.

Ez 20:20

Chuqa' kan tikichajij ri q'ij richin uxlanen, roma re' kan jun retal chiqakojol, chi ja yin Jehová ri in ki-Dios.

Ez 20:30

Tabij k'a chike ri awinaq re rutzijol re'. ¿Achike roma rix xixok man ch'ajch'oj ta, achi'el k'a xkiben ri iwati't-imama'? ¿Achike roma xa iya'on kiq'ij ri wachibel ri yenwixowaj yin?

Ez 20:31

Toq ye'isuj-apo ri ik'ajol richin yeporox richin jun kamelabel, rix kan yixok man ix ch'ajch'oj ta roma niya' kiq'ij ri wachibel, k'ari' niwajo' yinik'ulubej toq xa man utz ta ri ye'ibanala'. Roma ri' yin kan ninya' nutzij richin chi man xtink'uluba' ta pe ri ich'abel.

Ez 23:37

roma rije' xekitzeqelibej ch'aqa' chik dios achi'el nuben jun ixoq nutzeqelibej jun chik achin ri man rachijil ta. Chuqa' kan xe'ok kamisanela' roma xekisuj ri kal chikiwech ri wachibel. Re ak'uala' re' kan e wichin yin, jak'a xa xe'ok kiway ri wachibel.

Ez 6:7

K'a toq xtikitz'et na chi janila winaqi' israelita xkeken, k'ari' xtiketamaj chi ja yin Jehová.

Wuj Richin ri Chojmirisabelri'il 18:21

Man tisuj k'a jun chike ri iwalk'ual richin jun sipanik ri niporox chire ri dios rubini'an Moloc, richin man niyoq'otej ri nubi', yin ri in i-Dios. Yin Jehová ri yibiyin.

Wuj Richin ri Chojmirisabelri'il 20:2

tubij chike ri winaqi': Xabachike k'a iwinaq o man iwinaq ta ri ek'o chi'ikojol, wi k'o ta jun yerusuj ri ralk'ual chire ri dios rubini'an Moloc, yin kan xkitzu'un pa ruwi' rija', y xtinwetzelaj roma kan nuben chire ri wachoch man ch'ajch'oj ta. Roma rija' niyoq'otej ri nubi', roma ri' xtikamisex chi abej koma ri iwinaq.

San Lucas 2:23

Keri' xkiben roma ri pixa' nubij chi ronojel nimalaxel ala' pa jun jay, kan richin wi ri Dios.*f5*