Ex 9:29 - Kaqchiquel Bible

²⁹ Y ri Moisés xubij: Kan xaxe k'a xkinel-el chuchi' re nima-tinamit re', xtinyek ri nuq'a' chikaj, y xtink'utuj k'a chire ri Jehová, y kan xtitane' k'a ri koqolajay y ri saqboch, richin keri' nawetamaj chi ja ri Jehová rajaw re ruwach'ulew.

Ex 9:29 ပူးပေါင်းရင်းမြစ်များ

1 Corintios 10:26

Roma ri ruch'abel ri Dios*f13* nubij chi ronojel kan rik'in rija' peteneq-wi; richin k'a rija' re ruwach'ulew y ronojel ri yek'iy chuwech.

Wuj Richin ri Isaías 1:15

Toq rix nitzeqej ri iq'a' chikaj richin yixch'on wik'in, yin kan ninwelesaj ri nutzubal pan iwi'. Stape' janila chi ch'owen niben, yin kan man xkixinwak'axaj ta, roma ri iq'a' kan tz'ilobitajineq rik'in kik'.

Wuj Richin Bix Chire ri Dios 143:6

Ninyek k'a ri nuq'a' chawech richin nink'ul to'onik. Ri wánima kan at royoben, achi'el ri ruwach'ulew ri chaqi'j-chaqi'j rubanon roma maneq ruya'.

1 Rey 8:38

y wi k'o ta jun ri nutz'et ri nima-ruk'ayewal y nuna' ri q'axo'n pa ránima y xtuyek ta ri ruq'a' y xtitzu'un pa ruchojmilal ri awachoch richin nich'on awik'in o nuk'utuj chawe;

1 Rey 8:22

K'ari' ri Salomón xbek'oje' chuwech-apo ri porobel richin ri Jehová chikiwech-apo ri rijatzul ri Israel ri kimolon-ki' chiri', y k'ari' xutzeqej-q'anej ri ruq'a' chikaj,

Deut 10:14

Ri Jehová ri qa-Dios kan richin k'a rija' ri kaj ri tz'etel y ri man tz'etel ta, y chuqa' chijun ruwach'ulew, y ronojel ri ek'o chuwech.

1 Corintios 10:28

Jak'a wi k'o ta jun ri nibin chiwe chi ri ti'ij ri niya'ox chiwe richin nitej xa sujun chik chikiwech wachibel, rix kan man k'a titej ri ti'ij ri', roma wi rix xtitej, xa xtiben chi niq'axo ri ránima ri xbin chiwe, y man roma ta chi niq'axo ri iwánima rix. Y rik'in juba' ek'o chiwe rix ri yech'obon y nikibij-qa pa taq kánima: ¿Kan roma kami ri ruch'obonik rija' yin k'o chi ninq'et-wi' chire ri k'o chi ninben?

Wuj Richin Bix Chire ri Dios 135:6

Ronojel ri nrajo' nuben ri Jehová, kan nuben. Keri' nuben chikaj y chuwach'ulew, chupan ri nimalej taq palou, y k'a chupan-qa ri ruxe'.

Wuj Richin Bix Chire ri Dios 50:12

Wi ta yin yinum, man ta ninbij chawe rat, roma kan wichin yin ri ruwach'ulew y ronojel ri k'o chuwech.

Wuj Richin ri Achin Job 11:13

Xa ta rat najech jumul ri awánima chire ri Dios, y nayuq ri aq'a' richin naya-apo pa ruq'a' rija'.

Wuj Richin ri Esdras 9:5

Chupan ri ramaj ri' k'ari' xiyakatej-q'anej chupan ri poqonal ri ink'o-wi, y toq xinretz yan ri nutziaq ri nuq'un, xixuke-qa, y xinyek nuq'a' chikaj chuwech ri Jehová ri nu-Dios.

Ex 19:5

Wakami k'a, wi kan xtinimaj k'a ri nuch'abel y nitaqej ri jikibel-tzij ri nubanon iwik'in, rix kan xkixok k'a jun tinamit ri janila iwejqalen chikiwech ri ch'aqa' chik tinamit. Man rik'in ri' chijun re ruwach'ulew kan wichin yin.

Ex 9:33

Y toq ri Moisés xel-el chupan ri tinamit toq k'a juba' tich'on kan rik'in ri rey, jari' toq xuyek ri ruq'a' chikaj y xch'on rik'in ri Jehová y jari' toq xtane-qa ri koqolajay, ri saqboch y xtane' chuqa' ri job ri najin pa ruwi' ri ruwach'ulew.

Ex 8:22

Toq xtibanatej k'a keri', ri pa ruwach'ulew Gosen ri akuchi ek'o-wi ri israelita, kan man jun k'a botzaj amolo' xtapon chiri'. Y keri' xtawetamaj k'a chi yin Jehová ink'o chikikojol rije'.

Ex 20:11

Roma yin Jehová, pa waqi' q'ij xinben ri kaj, ri ruwach'ulew, ri palou y ronojel ri ek'o chupan, jak'a chupan ri ruwuq q'ij, yin kan xinuxlan chire ri samaj ri'. Roma ri' ri ruwuq q'ij kan xinch'er richin uxlanen.

Ex 8:6

Y ri Aarón xutzeqej k'a ri ruch'ame'y pa kiwi' ri ya' richin Egipto y kan chijun k'a kiruwach'ulew xnoj chi xkalet.