Ex 32:32 - Kaqchiquel Bible

³² Ajaw, jak'a re wakami nink'utuj utzil chawe richin xtayoj ta jumul ri kimak. Roma wi rat man naben ta keri', xa kan más k'a utz tayojo' ri nubi' chupan ri wuj ri akuchi tz'ibatel wi ri kibi' ri kan e awichin rat, xcha' ri Moisés.

Ex 32:32 ပူးပေါင်းရင်းမြစ်များ

Wuj Richin Bix Chire ri Dios 69:28

Tayojo' kibi' chupan ri wuj ri akuchi tz'ibatel-wi kibi' ri kan yek'ase' richin q'asen, kan man tik'oje' ri kibi' chikikojol ri choj kik'aslen.

Apocalipsis 21:27

Jak'a ronojel ri xa tz'il, kan man jun bey xtok-apo chupan. Ni man jun chuqa' wineq ri xa nuya' ruq'ij jun chik dios, ni chuqa' ri e tz'ukuy taq tzij, ri xke'ok-apo ri chiri', xaxe ri tz'ibatel kibi' chupan ri wuj richin k'aslen, ri ruwuj ri Karne'l.

Filipenses 4:3

Nink'utuj k'a utzil chawe rat ri at wachibil, chupan ri samaj, chi xke'ato' ta k'a ri ka'i' qach'alal ixoqi' ri', roma rije' xenwachibilaj chuq'alajirisaxik ri utzilej ch'abel richin kolotajik junan rik'in ri qach'alal Clemente y ri ch'aqa' chik qach'alal, ri kan tz'iban chik ri kibi' chila' chikaj, chupan ri wuj richin k'aslen.

Romanos 9:3

Yin kan ninya-wi' richin yinelesex-el rik'in ri Cristo y niqa' ruk'ayewal pa nuwi' richin ta yento'.

Dn 12:1

Xtapon k'a ri ruq'ijul, y xtipe k'a ri ángel Miguel, ri chajinel richin ri atinamit. Ri q'ij ri' kan q'ij k'a richin q'axo'n, y kan man jun bey k'a banatajineq-pe keri', pa rutikeribel janipe' ek'o-pe ri winaqi', k'a toq xtapon ri q'ij ri'. Y chupan k'a ri q'ij ri' ri atinamit rat kan xkekolotej k'a chuwech ri tijoj-poqonal konojel ri tz'ibatel kibi' chupan ri wuj.

Apocalipsis 3:5

Ri xtich'akon, kan xtinwiq k'a rik'in seq taq tzieq. Y man xtinwelesaj ta ri rubi' chupan ri wuj ri richin k'aslen. Y kan xtinbij k'a chire ri Nata' y chike ri ángel, chi ri wineq kan wichin yin.

Wuj Richin Bix Chire ri Dios 139:16

Nimalej Jehová, rat kan xinatz'et toq k'a man jani kinalex. Ronojel k'a ri xtibebanatej chupan ri nuk'aslen, kan xtz'ibatej yan chupan ri awuj, Y ronojel re' rat awetaman chik.

Wuj Richin Bix Chire ri Dios 56:8

Rat awetaman janipe' mul in animajineq chuwech ri oyowal; re' kan atz'iban k'a chupan ri awuj. Ri ruya'al runaq'-nuwech kan ayakon k'a chupan jun jebelej k'ojelibel.

Apocalipsis 17:8

Ri chikop ri xatz'et, xk'oje' ojer kan y wakami maneq chik. Jak'a xa xtibek'ulun chik pe y xtel-pe chupan ri itzel siwan ri ruyon q'equ'm rupan richin xtibe chupan ri tojbel mak. Y ri janila chi winaqi' ri man xtz'ibex ta kibi' chupan ri wuj richin k'aslen, ri kan pa rutikeribel-pe ri ruwach'ulew, kan xtikimey k'a ri chikop ri xk'oje' ojer kan y xa maneq chik tz'eton, y xa kan xtibek'ulun chik pe jun bey.

Deut 29:20

Ri Jehová kan man jun bey xtukuy rumak ri wineq ri nich'obon keri', xa kan xtrelesaj royowal chirij ri wineq ri', y kan xtuya' ri itzel oyonik pa ruwi' achi'el ri tz'ibatajineq kan chupan re jun wuj re', y kan xtuk'is-el jumul ri rijatzul chuwech re ruwach'ulew.

Deut 25:19

Roma ri' toq ri Jehová ri qa-Dios xtuya' uxlanen chiwe pa kiq'a' ri e etzelanel qichin ri ek'o chupan ri ruwach'ulew ri xtuya' chiwe richin xtiwichinaj kan, jari' toq xtiyoj jumul ri rubi' ri Amalec chuwech ri ruwach'ulew. Man k'a timestaj chi k'o chi keri' niben.

Deut 9:14

Taya' q'ij chuwe richin yenk'is y kan xtiyojtej jumul ri kibi' chuwech ri ruwach'ulew, y xaxe k'a rik'in ri awijatzul rat xtinben jun nimalej ruwach'ulew y kan janila k'a xkek'iyer y xtik'oje' janila kuchuq'a' chikiwech rije', xcha' ri Jehová chuwe.

Wuj Richin ri Q'axanri'il 14:19

Roma nim ri ajowabel ri k'o awik'in, nink'utuj utzil chawe chi takuyu' kimak re winaqi' re', kan achi'el ri abanon-pe kik'in toq k'a ek'o na pan Egipto, k'a keri' na tabana' kik'in re wakami, xcha'.

Ex 32:10

Wakami k'a xa taya' q'ij chuwe yin richin chi ninwelesaj woyowal chikij y xkenk'is k'a konojel. Y xeri' yin xtinben k'a jun nimalej tzobaj winaqi' kik'in ri awijatzul rat, chuwech re ruwach'ulew, xcha' ri Jehová.

San Lucas 23:34

Ri Jesús xubij k'a: Nata' Dios, takuyu' kimak, roma man ketaman ta achike ri ye'ajin chubanik, xcha'. Ri aj-labal kan xkiya' pan etz'anen ri rutziaq ri Jesús, richin xkitz'et ri achike ri nuk'uan-el.

Am 7:2

Y chupan ri achik' ri', xintz'et k'a chi ri sak' xkik'is ronojel tiko'n. Y jari' toq yin xisik'in y xinbij: Jehová, takuyu' ri qamak. ¿Achi'el kami toq xtiqakoch' roj ri oj israelita, roma roj xa kan yalan oj juba' ok?, xicha'.

Ez 13:9

Kan xtinya' rutojbalil-mak pa kiwi' rije'. Re winaqi' k'a re' kan man xtikixol ta k'a ki' kik'in ri awinaq, stape' junan kijatzul. Chuqa' man xtitz'ibex ta kibi' chupan ri wuj ri akuchi tz'ibatel kan kibi' ri e aj pa rachoch kan ri Israel y kan man xketzolej ta chik pa kiruwach'ulew. K'ari' rije' xtiketamaj k'a chi ja yin Jehová.

Apocalipsis 22:19

Y wi k'o chik jun ri xa nrelesaj ch'abel y nujel rubanik ri nuq'alajirisaj ri Dios chupan re jun wuj re', ri Dios kan xtuben chire chi man nutej ta ri ruwech ri che' ri richin k'aslen, man xtuya' ta q'ij chire richin nok-apo chupan ri k'ak'a' tinamit ri ch'aron roma ri Dios y man xtrichinaj ta ri utz ri nubij chupan re wuj re'.

San Lucas 10:20

Jak'a rix man kixkikot xaxe roma ri itzel taq espíritu yixkinimaj. Xa kan kixkikot k'a roma kan tz'ibatel ri ibi' chila' chikaj rik'in ri Dios, xcha'.

Wuj Richin ri Q'axanri'il 11:15

Wi chaq chupan samaj kere' yinaya-wi, más utz tawelesaj ri nuk'aslen. Wi rat kan qitzij yinawajo', tabana' kere', richin chi man nintej ta chik poqon, xcha'.

2 Sam 18:33

Y toq ri David xrak'axaj ri', xpe k'a jun nimalej q'axo'n pa ránima. Xjote' k'a el chupan ri jay ri k'o pa ruwi' ri okibel richin ri tinamit. Y rokik jotol-el janila k'a noq' y nubij: ¡Nuk'ajol Absalón, nuk'ajol, nuk'ajol Absalón, k'ate' ta yin xiken pan ak'exel rat nuk'ajol!, xcha'.

Wuj Richin ri Isaías 4:3

Ri winaqi' ri xkek'oje' kan pa tinamit Sión kan e ch'aron roma ri Dios.

Wuj Richin ri Malaquías 3:16

Y toq xkak'axaj ronojel re', ri winaqi' ri k'o rukiy ri Dios chikiwech kan xech'on chikiwech ri chi kachibil-ki'. Y ri Dios kan xuya' ruxikin chike y xerak'axaj k'a. K'ari' ri Jehová xutz'ibaj kibi' chupan jun wuj richin natabel kichin ri k'o rukiy chikiwech, y ri nikinimirisaj ri rubi'.

Wuj Richin ri Malaquías 3:17

K'ari' ri Jehová ri k'iytisanel richin ronojel xubij: Rix kan ix achi'el jun beyomel ri janila rejqalen. Y toq xkipe richin nonq'ata-tzij, xtinben chiwe achi'el nuben jun tata'aj chire ri ruk'ajol ri nilin richin.

Wuj Richin ri Q'axanri'il 11:25

Y toq ri Jehová xqaqa-pe, kan chupan k'a ri sutz' peteneq-wi y xch'on rik'in ri Moisés. Xeri' ri Jehová xuya' chuqa' chike ri e oxk'al lajuj achi'a' ri Espíritu achi'el ri ruya'on chire ri Moisés. Jari' toq ri achi'a' ri' xebech'on-pe achi'el yech'on ri e q'alajirisey ruch'abel ri Dios. Jak'a xaxe jun bey ri keri' xkiben.